Македонија
ВМРО-ДПМНЕ: Љупчо Николовски нелегално ги трошел народните пари за субвенции за фирми блиски до партијата

Ексминистерот Љупчо Николовски давал под закуп земја на фирми блиски до СДСМ, ја дозволувал нивната нелегална работа и го оштетувал буџетот кој се полни со пари на граѓаните, обвинија од ВМРО-ДПМНЕ преку допис до медиумите.
Владејачката партија тврди дека на фирмата ДЗС Илинден и се давале субвенции иако договорот за закуп бил раскинат.
„Во 2019 година е започнат спор за неплатен закуп за три години, односно за 2017, 2018 и 2019 година. Во овој период Дон Николовски го толерирал должникот. Неплаќањето се констатира од надлежните во 2021 година кога се носи Изјава за еднострано раскинување на договорот за закуп на земјоделско земјиште. Изјавата е потврдена со правосилна пресуда на Апелациски суд, Скопје.
И покрај фактот што Министерството за земјоделие носи Изјава за еднострано раскинување на договорот за закуп, не ја почитува понатамошната процедура, односно реализација на Изјавата.
Поради неизвршување на законските надлежности и обврски од страна на Министерството, поточно да спроведе постапка прво, за бришење од единствениот регистер на земјоделски стопанства, и второ, некоординација со Агенцијата за финансиска поддршка на земјоделството и руралниот развој, му овозможува на закупецот и по раскинувањето на договорот за закуп истиот да може да зема пари, односно субвенции.
Прво, ДЗС Илинден спротивно на член 14-а од Закон за земјоделство и рурален развој не е евидентиран на листите за должници. додека имал право да го користи договорот од страна на МЗШВ, во време кога Љупчо Дон Николовски е министер.
Второ, спротивно на член 15 од истиот Закон, Министерството не го избришало договорот за закуп од единствениот регистер на земјоделски стопанства кој е основ за апликација за субвенции и така фирмата нелегално добила 13 милиони денари или нешто над 200 илјади евра во период од три години или од 2021 заклучно со 2023 година.
Нерегуларностите се случуваат во период кога Николовски е вицепремиер во владата за борба против корупција и добро владеење. Значи тој ја дозволувал корупцијата.
Заклучок, Николовски доделувал неосновано, односно спротивно на закон субвенции во огромни суми. Или, според веќе познатите информации, Арекспорт неосновано земала половина милион евра субвенции, а ДЗС Илинден земала исто неосновано околу 200 илјади субвенции“, се наведува во партиското соопштение.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Големи гужви на Богородица, Табановце и на Меџитлија поради продолжениот викенд

Зголемени гужви се забележуваат на граничните премини во Македонија, каде што возачите се соочуваат со подолго чекање поради продолжениот викенд и летните патувања. Најголем застој има на Богородица, Табановце и Меџитлија, каде колоните од возила растат од час во час.
На граничниот премин Богородица чекањето за излез од државата е околу половина час, додека на Табановце задржувањата за влез и излез се движат од 40 минути до еден час. Слична состојба има и на Меџитлија, каде возачите известуваат за долги колони и нервозни реакции. На останатите гранични премини од македонска страна нема подолги задржувања.
И покрај гужвите на границите, од Авто-мото сојузот информираат дека сообраќајот на државните патишта се одвива непречено и по суви коловози, со зголемен интензитет надвор од градските средини. Поради летниот бран патувања, се бележи голема фреквенција на возила, а на некои делници е можен и краткотраен застој.
АМСМ апелира возачите да ја приспособат брзината, да ја почитуваат поставената сигнализација и да управуваат внимателно со возилата. Особено се посочуваат делниците низ котлините, речните долини и клисурите, каде што постои ризик од појава на одрони. Најризични делници се Катланово – Велес, Маврово – Дебар – Струга, Виница – Берово и Кочани – Делчево.
Македонија
Борова шума гори во Берово, депонии во Прилеп и во Долнени во пламен, чади и во Вардариште

Македонија денеска се соочува со сериозна слика на теренот – до 12 часот регистрирани се вкупно седум пожари на отворен простор. Од нив, три сè уште се активни, еден е ставен под контрола, додека три се целосно изгаснати, информираат од Центарот за управување со кризи.
Најсериозната состојба е во Берово, каде над туристичката населба Абланица огнот зафатил висококвалитетна борова шума. Силниот пламен и густата вегетација го отежнуваат гаснењето, а екипите се на терен и се борат за да го спречат огнот да се прошири кон населбата.
Во општина Долнени, депонијата во селото Дебреште е зафатена од пламен, што предизвикува дополнителни проблеми со густ чад и непријатен мирис кој се шири кон околните села. Слична е ситуацијата и во Прилеп, каде пожар избувна во фабриката „Изофас“, каде што огнот се проширил на ниска вегетација. Таму пожарникарите дејствуваат за да спречат ширење кон индустрискиот дел.
Во Скопје, на територија на општина Гази Баба, огнот зафати ѓубриште во Вардариште. Благодарение на брзата реакција, овој пожар е ставен под контрола и не претставува закана за пошироката околина.
Добра вест е што три пожари веќе се изгаснати. Во Гевгелија, кај селото Конско, пламенот кој зафатил ниска вегетација и дива депонија е локализиран. Исто така, изгаснат е и пожарот на депонијата во селото Банско кај Струмица, како и оној во Дебар, каде што огнот се проширил на плевна во близина на градските гробишта.
Од ЦУК апелираат на внимателност, бидејќи високите температури и сувото време создаваат услови за брзо ширење на пожарите. Граѓаните се предупредуваат да бидат претпазливи и веднаш да пријават секое забележано жариште.
Македонија
Трка во чест на херојот од Кочани кој 11 пати возеше до Скопје за да спаси животи и го загуби својот

Делчево е домаќин на првото издание на „Голак Треил“, спортски настан кој комбинира планинско трчање и брзо одење низ живописните предели на планината Голак. Настанот има хуманитарен карактер и е посветен на прерано починатиот Иле Гоцевски, возачот на Брза помош во Кочани, кој остана запаметен по својата пожртвуваност и хуманост.
Иле Гоцевски, во текот на трагичната ноќ кога животите беа во прашање, 11 пати возеше од Кочани до Скопје за да помогне во спасувањето на пациентите. Неговата посветеност и храброст станаа симбол на вистински хуман гест, но за жал тој го загуби сопствениот живот.
„Во негова чест, патеката на првото издание на ‘Голак Треил’ ќе биде долга 11 километри, симболично претставувајќи го патот на Иле и неговата борба за секој спасен живот,“ соопштија од Еколошкото друштво „Голак“, организатор на настанот.
Сите собрани средства од котизациите ќе бидат донирани на „Support Kocani“, а настанот, покрај хуманитарниот карактер, ќе има цел и да ја промовира планината Голак како природна дестинација за спорт, рекреација и туризам.
Организаторите нагласуваат дека преку вакви иницијативи сакаат да ја зголемат свеста за значењето на здравиот начин на живот, но и да го поттикнат развојот на туризмот во источниот дел на Македонија.