Oоштина Центар ја обвини ЈП „Комунална хигиена“ дека и викендов потфрлила и не ја завршила својата работа, оставајќи ја познатата локација кај „Круг“ во Дебар Маало затрупана со отпад.

Контејнерите што се наоѓаат веднаш до детската градинка „13 Ноември”, објект Парк и станбените згради околу беа преплавени со расфрлан смет. Екипите на Општина Центар веднаш интервенираа и го исчистија просторот околу контејнерите, со цел да обезбедат основна хигиена за жителите.

Паралелно, во Буњаковец е во тек расчистување на депонијата зад катната гаража. Со механизација се отстранува шут, стакло и друг отпад, со години складиран во оваа магацин- депонија од страна на несовесни лица.

„Чистотата и хигиената во нашата општина се наш приоритет. Ќе продолжиме со акциите за да обезбедиме поквалитетна и побезбедна средина за сите наши сограѓани,“ изјави градоначалникот Горан Герасимовски.

Се додава дека акцијата за чистење под мотото „Центар не чека, Центар чисти“, е поттикната од непостапувањето на „Комунална хигиена“.

Државниот секретар на МВР, Сашо Петрушевски, го одржа првиот состанок како национален координатор на Комисијата за борба против трговија со луѓе и илегална миграција на Македонија.

Национална комисија за борба против трговијата со луѓе и илегалната миграција е формирана 2001 година со одлука на влада со цел да ја следи и да ја анализира состојбата со трговијата со луѓе и илегалната миграција, да ги координира активностите на надлежните институции и да соработува со меѓународните и невладините организации, кои се вклучени во решавањето на проблеми од оваа област. Во Комисијата членуваат претставници од МВР, МСПДМ, МНРНТ, МП, МЗ, ДИТ, МОН/БРО, АВРМ, ОЈО за ГОКК и Суд.

Државниот секретар Петрушевски истакна дека оваа појава претставува кршење на основните човекови права и сериозен глобален проблем, кој остава длабоки последици врз жртвите и целото општество. Воедно, посочи на ефикасна соработка помеѓу сите институции и засегнати страни со цел да создавање силен и функционален механизам за превенција, заштита на жртвите и гонење на сторителите. Оваа Комисија има клучна улога во спроведувањето на стратегиите и мерките што ќе придонесат за елиминирање на овој сериозен проблем.

На состанокот беа разгледани тековните и идни активности во насока на подобрување на состојбата и надминување на предизвиците во областа на трговијата со луѓе и илегалната миграција, при што беа истакнати потребите за управување со миграциските текови, односно спречување на илегалните премини, зајакнување на граничната контрола и мониторинг, како и подобрување на сместувачките капацитети во прифатните центри, со цел обезбедување не сеопфатна заштита на државната граница, услови за згрижување и третман на мигрантите во согласност со меѓународните стандарди. Воедно, членовите беа информирани и за четвртиот круг на евалуација и посета на Групата на експерти за преземање акција против трговија со луѓе (ГРЕТА) со цел мониторинг на спроведувањето на конвенцијата на Советот на Европа за преземање акција против трговија со луѓе.

Министерот за дигитална трансформација Стефан Андоновски заедно со градоначалникот на општина Аеродром, Дејан Митески, денеска присуствуваа на музичко ликовен хепенинг, кој го приредија учениците од ОУ „Димитар Македонски“ во општина Аеродром по повод одбележување на Меѓународниот ден за побезбеден интернет.

„Одбележуваме еден значаен ден, првпат Меѓународниот ден на побезбеден интернет го одбележуваме во основно училиште ‘Димитар Македонски’ во Аеродром. На овој начин сакаме да ја поткренеме свеста на најмладите, особено на учениците за важноста на безбедното користење на интернетот, социјалните медиуми и модерните алатки. И оттука сметам дека ваква манифестација, еден музичко ликовен хепенинг, е вистинскиот начин на кој ќе ги презентираме и придобивките од интернетот и ќе разговараме со младите како побезбедно да ги користат овие алатки на современото живеење“ изјави Андоновски

Настанот беше органзиран во рамките на проектот „МКСафеНет/Центар за побезбеден интернет“, проект кој е дел од програмата „Дигитална Европа“. Министерот изрази благодарност до училиштето за организацијата, како и на општествено одговорните компании за поддршката на настанот.

„Во рамките на поддршката на општествено одговорни компании, како што е ‘А1’, кои обезбедија подароци за учениците и придонесоа да имаме еден симпатичен настан со кој ќе ја зголемиме свеста кај младите и кај учениците за безбедноста на интернет, продолжуваме со активности во целата држава, во делот на проектот за побезбеден интернет ‘МКСафеНет’ и отворањето на Центарот за побезбеден интернет. Очекувам дека со завршувањето на проектот в година ќе го имаме отворено како центар што ќе нуди секојдневна поддршка на младите, учениците, но и на училиштата и педагозите што работат со децата“, заврши министерот Андоновски.