На спортскиот аеродром Стенковец, денеска беа изложени 45 најразлични воздухоплови, авиони и хеликоптери кои учествуваат во вежбата „Брз одговор 22“. Вежбата се изведува на полгонот Криволак и во неа учествуваат 4.600 војници од осум држави. На настанот присуствуваа премиерот Димитар Ковачевски, министерката за одбрана Славјанка Петровска, началникот на Генералштабот, генералот Васко Ѓурчиновски и амбасадорките на САД и на Обединетото Кралство, Кејт Брнз и Рејчел Галовеј.

Ковачевски во изјава порача дека изложбата на хеликоптери вклучени во рамките на вежбата и прелетот на авиони изгледа импресивно, и им честиташе на министерката Петровска и амбасадорките Брнз и Галовеј за одличната организација. За вежбата „Swift Response“ порача дека е голема и сложена, а самиот факт дека Северна Македонија е нејзин домаќин покажува дека нашите армиски капацитети се подготвени и способни како и сите наши сојузнички армии.

„Вежбата, во целост ги демонстрира капацитетите и тренинг центарот Криволак. Подеднакво важно, оваа вежба ги покажува соработката и духот на единството во Алијансата, бидејќи во неа заедно соработуваат и се надградуваат македонските, но и американските, британските, француските, италијанските, црногорските, грчките и албанските армиски припадници“, рече Ковачевски.

Министерката Петровска им се заблагодари на граѓаните што присуствуваа на „Стенковец“ во огромен број и додаде дека денешниот отворен ден покажува силно единство и испраќа порака на заедништво помеѓу сојузниците.

„Оваа вежба демонстрира единство помеѓу сите НАТО сојузници и испраќа многу силна порака, а тоа е дека кога сте во НАТО, не сте сами, односно сите сме заедно. Истовремено, оваа вежба и она што денеска го видовте, односно перформансот на воздухопловите покажа одлична соработка помеѓу воздухопловните власти во нашата држава и воздухопловните власти во Република Грција, кои што практично се дел од “air policing” мисијата за обезбедување на воздушниот простор на нашата држава“, рече министерката Петровска.

Амбасадорката на САД, Брнз изрази задоволство од прикажаното и порача дека вежбата „Swift Response“ е дел од заложбата за обезбедување на мирна и сигурна иднина за цела Европа. Додаде дека иако Северна Македонија само пред две години се приклучи на НАТО, земјата ги стави на располагање своите ресурси за да и помогне на Алијансата да биде подготвена и ефикасна одбранбена организација.

Британската амбасадорка во Северна Македонија, Галовеј истакна дека тоа што можеше да се види на отворениот ден е приказ на способностите на НАТО и начинот на кој што сојузниците заедно функционираат и денеска и во иднина.

На Стенковец можеа одблиску да се видат хеликоптерите AH-64 Apache, UH-60 Black Hawk, CH-47 Chinook, HH-60, Mi-17, Bell, авионите Zlin, а прелети над спортскиот аеродром направија авионите A-10 Thunderbolt II и ловците F-16.