Македонија
Војници најрано утре заминуваат за Словенија, вели Петровска

Министерката за одбрана Славјанка Петровска најави дека утре за Словенија ќе заминат сто војници од различен состав кои ќе одговорат на потребите на словенечката армија.
– Жалам што и оваа трагедија што се случува во Словенија се користеше за разни шпекулации, изнесување лаги и невистини во македонската јавност, дека доцниме со помошта. Не сакавме да правиме маркетинг од тоа, дозволете да известам како течеше. Од првиот момент кога се случи несреќата во Словенија и поплавите, стапивме во контакт и јас со мојот колега, премиерот, претседателот на државата и сите министри и ја понудивме нашата поддршка. Од нивна страна беше одговорено дека штом ја направат анализата што им е потребно ќе бидат доставени барања и тие во текот на вчерашниот ден беа доставени. Веднаш вчера изреагиравме. Претседателот на државата во координација со началникот на Генералштабот и со мене денеска на седница на Влада ќе ја донесеме одлуката за упатување на сто војници од различен состав кои ќе одговорат на потребите на словенечката армија, рече Петровска.
Министерката рече дека војниците се подготвени да заминат уште денеска, во текот на попладнето ќе ги посети и најрано утре сабајле ќе заминат, а денеска на седницата на Владата ќе биде донесена одлука, формален дел од процедурата.
Петровска додаде дека засега е тоа побарано, а другите технички средства кои биле побарани, материјална техничка поддршка, во моментот државата не е во можност да одговори.
– Во иднина ако се испратат барања на кои ќе можеме да одговориме, ќе одговориме, кажа министерката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.
Македонија
Аеродром, Сопиште и Зелениково денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска, без напојување со електрична енергија ќе останат:
· од 08:00 до 15:00 часот, корисниците од дел од с. Долно Лисиче, општина Аеродром;
· во истиот термин од 08:00 до 15:00 часот, корисниците од објектите во околината на зградата на Алкалоид на ул. 3 -та Македонска Бригада., општина Аеродром;
· од 09:00 до 12:00 часот, корисниците од дел од с. Горно Соње, поточно улиците со бр. 10 и бр. 12, општина Сопиште;
· од 09:00 до 16:00 часот, корисниците од селата: Дејковец и Добрино, општина Зелениково.
Македонија
Променливо облачно со повремени врнежи од дожд и со ретка појава на грмежи

Времето денеска ќе биде променливо облачно со повремени локални врнежи од дожд и со ретка појава на грмежи. Ќе дува слаб до умерен северен ветер Минималната температура ќе биде во интервал од 4 до 10, а максималната ќе достигне од 11 до 18 степени.
Во Скопје, променливо облачно со повремен дожд и со услови за ретки грмежи. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 15 степени.
Времето во наредните денови
Продолжува периодот на променливо облачно време со повремени врнежи од дожд. Денеска и во четврток ќе има изолирана појава, а од петок на повеќе места ќе биде нестабилно со пороен дожд и грмежи. Од недела температурите ќе бидат во опаѓање.