Македонија
Во Битола засадени дрвца за незаборав по повод 78-годишнината од депортацијата на Евреите

Со полагање цвеќе пред споменикот на депортираните Евреи од Битола и на споменикот на Естреја Овадија Мара, од страна на битолската градоначалничка, Наташа Петровска, делегација на Советот на Општина Битола, директорките на здравственот дом „Д-р Хаим Абраванел“ и ЈОУДГ „Естреја Овадија Мара“ и претставници на Сојузот на пензионерите, во градот под Пелистер се одбележа 78-годишнината од депортацијата на Евреите во Втората свсетска војна.
„Денешниот ден побудува длабоки емоции кај сите нас како битолчани затоа што нè потсетува на еден трагичен настан од минатото кога нашите сограѓани од еврејската заедница беа депортирани од нашиот град. Одбележувањето на овој ден, што го правиме секоја година, е од единствена причина дека сакаме да се сеќаваме на тој ден затоа што ни значи да се сеќаваме на нашите сограѓани, на еврејската заедница, која постоела во Битола, меѓутоа со тоа сакаме да покажеме кон целиот свет дека се случило злодело што човештвото не смее никогаш да си дозволи да се повтори никаде на планетата“, рече градоначалничката Петровска.
Воедно, преку онлајн-платформата „Зум“, по повод денот на депортацијата на Евреите, се одржа настан на кој во градот Кирјат Оно во Израел свои пораки на сеќавање за жртвите, како и пораки за мир, испратија градоначалникот на овој град, Израел Гал, израелскиот амбасадор Дан Оријан, Александар Аврамовски од македонската амбасада во Израел и д-р Шели Леви Друмер.
По испраќањето на пораките, заеднички во исто време беа засадени дрвја во Битола и во Кирјат Оно.
Во Битола засадувањето се реализира во дворот на Здравствениот дом „Д-р Хаим Абраванел“, а покрај градоначалничката Петровска, јапонски цреши засадија и директорката на здравствениот дом, Весна Спирковска, и директорот на ЈП „Комуналец“, Панде Богоевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Постои сомнеж дека пожарот во Дрисла е подметнат

Скопската противпожарна бригада со сити сили се обидува да го локализира пожарот во депонијата Дрисла. Направен е противпожарен појас за да не се дозволи на огнот да тргне кон блиската трева, грмушки и шума од горната страна на депонијата., информира директорот на Дирекцијата за заштита и спасување, Стојанче Ангелов.
Како што додаде, постојат сомненија дека пожарот бил предизвикан намерно.
„Ќе потсетам само дека летово имавме рекордно високи температури но Дрисла не се самозапали“, рече Ангелов.
Противпожарните возила и дополнителните цистерни од „Комунална хигиена“ интервенираат на терен, а пожарот сè уште не е целосно локализиран.
Командантот на Територијалната противпожарна бригада на Град Скопје, Звонко Томевски посочи дека станува збор за посериозен пожар од поголеми размери, при што постоела опасност огнот да се прошири.
Македонија
Филипче од Париз: Потребен е проактивен пристап и политички консензус за напредок кон ЕУ

Претседателот на Социјалдемократскиот сојуз на Македонија, Венко Филипче, во рамки на еднодневната работна посета оствари повеќе средби со високи француски политички претставници, на кои во фокусот на разговорите беа реформската агенда и предлог Резолуцијата на СДСМ, како гаранција за заштита на националните интереси и решение за деблокирање на преговите со ЕУ.
Филипче одржа работна средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги, со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани, како и со директорот за Континентална Европа при Министерството за Европа и надворешни работи, Брис Рокфеј и со специјалниот претставник за Балканот, Рене Троказ.
На состаноците беше истакната поддршката од Франција во процесот на евроинтеграција, но и потребата од брзи резултати во исполнување на обврските и работа на реформите.
Филипче ги презентираше позициите на СДСМ и истакна дека партијата има проактивен пристап и работи на решенија за деблокирање на евроинтеграцискиот процес. Тој нагласи дека во завршна фаза е подготовката на Резолуцијата, со која ќе се потврдат националните црвени линии – македонскиот јазик, култура и идентитет, како и механизми за справување со евентуални непринципиелни барања што излегуваат надвор од Преговарачката рамка.
Во разговорите беше потенцирано дека во Европската Унија постои јасен консензус за проширувањето, и дека тоа е можност која Македонија мора да ја искористи. Француските претставници пренесоа очекувања дека нашата земја треба да направи напредок во евроинтеграцискиот процес, како што тоа веќе го прават државите од регионот, особено Албанија и Црна Гора.
Македонија
Пожар на депонијата Дрисла, Ангелов смирува дека не е алармантно, но е сложено поради хемиските процеси

Пожар избувна на депонијата Дрисла.
Директорот на Дирекцијата за заштита и спасување, Стојанче Ангелов, рече дека пожарот не е алармантен, а скопската противпожарна бригада работи на негово гаснење.
Сепак, како што објаснува Ангелов, гаснењето на било која депонија е сложен процес поради хемиските и биолошките процеси кои се одвиваат во внатрешноста на депонијата како резултат на кои се создаваат запаливи гасови.
(Фото: илустрација, архива)