Македонија
Во Брисел почна билатералниот скрининг за „Внатрешен пазар“

Денес, во Брисел, почнува билатералниот скрининг за вториот кластер, „Внатрешен пазар“, со скрининг-состанок за Поглавјето 3, „Право на основање и слобода на давање услуги“.
Делегацијата ја предводи заменичката на главниот преговарач на Северна Македонија со Европската Унија, Дрита Абдиу-Халили, а присутни се и координаторот на кластерот 2, вицепремиерот задолжен за економски прашања, координација на економските ресори и инвестиции, Фатмир Битиќи, како и Крешник Бектеши, министер за економија, како прв човек на институцијата која е носител на Поглавјето 3.
На денешниот билатерален скрининг-состанок за кластерот „Внатрешен пазар“, ќе бидат презентирани теми поврзани со борбата против корупцијата во вршењето на услугите и информативниот систем на внатрешниот пазар и заклучоците и препораките што ќе произлезат од него, ќе ги одредат нашите државни политики, како и следните реформски чекори во пристапниот процес.
„Ја препознаваме важноста на областите што се дел од Поглавјето 3, ‘Правото на основање и слобода на давање услуги’ и тоа го потврдуваме активното учеството на земјата во регионалната економска зона и исполнувањето на повеќегодишниот акциски план, каде што сите држави на Западен Балкан имаат цел да измерат колку што е можно повисоко ниво на усогласеност. Спроведуваме и вклучуваме активности за отстранување на пречките во процесот на признавање на професионалните квалификации и подобрување на обезбедувањето прекугранични услуги“, истакна во своето обраќање заменичката на главниот преговарач, Дрита Абдиу-Халили.
Исто така, пред претставниците на Европската комисија се обрати и вицепремиерот задолжен за економски прашања, координација на економските ресори и инвестиции, Фатмир Битиќи, кој, меѓу другото, истакна дека сме посветени и работиме напорно за секоја препорака нотирана во последниот извештај на Европската Унија.
„Со гордост можам да истакнам дека по повеќе од две години од процесот на консултации со сите релевантни актери, ние сме во завршна фаза на изработка на новиот систематски закон за работните односи. Со одобрувањето на овој закон, како и со веќе утврдениот предлог за измени на Законот за поштенските услуги, ќе се осврнеме на препораките од Поглавјето 3 – ‘Правото на основање и слободата на давање услуги’“, посочи вицепремиерот Битиќи.
Министерот Бектеши во воведното излагање рече дека Министерството за економија, како надлежно министерство, во соработка со други институции континуирано спроведува активности за почитување на законодавството на Европската Унија и зајакнување на административните капацитети во областа на услугите.
Со оглед на комплексноста на ова поглавје и хоризонталната поврзаност што ја има меѓу кластерите и поглавјата, делегацијата на Северна Македонија на оваа билатерална скрининг-средба е составена од претставници од: Министерството за економија, Министерството за транспорт и врски, Министерството за финансии, Министерството за образование и наука, Министерството за правда, Централниот регистар, Агенцијата за храна и ветеринарство и Агенцијата за катастар.
Денес и утре завршуваат скрининг-состаноците за Поглавјето 3, а до крајот на неделата ќе се одржат и билатералните состаноци за Поглавјето 6, „Право за трговски друштва“ и за Поглавјето 7, „Право за интелектуална сопственост“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Aктивна забраната за тешки товарни возила на патот Тетово – Попова Шапка

Сообраќајот на државните патишта се одвива по наместа влажни коловози.
На патниот правец Тетово – Попова Шапка се уште е активна забраната за тешки товарни возила, а за останатите видови на возила задолжителна е употреба на зимска опрема (ланци).
Патниот правец Крушево – с.Долно Дивјаци – с.Кочиша е небезбеден за сообраќај и претсавува опасност за нормално одвивање на сообраќајот. Од 04.4.2025 година е затворен за секаков вид на сообраќај. Може да се користат регионален пат с.Пуста Река -Крушево.
Според известување од Виадукт Треј Дооел – Гостивар од 09.04.2025 година(среда), ќе се врши реконструкција на дилатациони спојки на дел од автопатот Неготино-Велес (клучка Неготино), каде сообраќајот ќе се одвива во една сообраќајна лента во правец од Неготино кон Велес во времетраење од 15 дена.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Меџити-Сецуко: во фокусот подобрување на еколошките услови за сите граѓани на Македонија

Првиот вицепремиер и министер за животна средина и просторно планирање Изет Меџити денеска на работна средба ја прими амбасадорката на Јапонија во Скопје, Кавахара Сецуко.
Меџити и Сецуко ја истакнаа важноста од блиско и долгорочно партнерство меѓу двете земји, особено во областа на заштитата на животната средина.
Меџити рече дека оваа средба е доказ за посветеноста на новата Влада за интензивирање на соработката со Јапонија и заедничко реализирање на одржливи еколошки иницијативи и зелен развој во Северна Македонија.
Амбасадорката Сецуко ја изрази подготвеноста на Јапонија да продолжи со поддршка на проекти поврзани со заштита на природата, подобрување на квалитетот на воздухот, управување со водите и зачувување на биолошката разновидност во Северна Македонија.
Меџити ѝ се заблагодари на Јапонија за досегашната поддршка и за експертизата што ја понуди во спроведувањето на еколошките проекти во земјата, но и во регионот, нагласувајќи ја важноста на меѓународната соработка во справувањето со глобалните прашања како што се климатските промени и зачувувањето на биолошката разновидност, ценејќи ги можностите што ги нуди ова партнерство.
Амбасадорката Сецуко и министерот Меџити ја изразија посветеноста на двете страни да продолжат со тековното партнерство, обезбедувајќи блиската соработка да води кон подобрување на еколошките услови за сите граѓани на Северна Македонија
Македонија
Колку вреди животот во Македонија – со две години треба да и запалам свеќа на сестра ми и да и речам биди задоволна, порача сестрата на загинатата Теодора

Судот во Тетово пресуди две години затвор за Менсур Пајазити кој на пешачки премин ја прегази 22-годишната Теодора Ристовска. Нејзинита сестра Ева со солзи и неверување дека казната за сторителот е само две години.
Плачејќи рече дека казната од две години нема да ја врати жртвата, ама ќе ја олесни маката на семејството. Таа праша, како да запали свеќа на гробот на нејзината сестра и како да и каже да биде задоволна со казната.
„Колку вреди животот во Македонија, колку вреди животот на сестра ми? Дали може некој да ја врати нејзината младост, мојата младост? Две години го осудија човеков, што уби човек. Две години го осудија. Дали некој ќе ми објасни некој колку вреди животот на сестра ми? Со две години треба да бидеме задоволни, со две години треба да и запалам свеќа и да и речам: со две години биди задоволна, ова е законот во Македонија. Не, не може со две години. Максималната казна од пет години мене нема да ми ја врати Теодора, ќе ми ја олесни маката, ќе каже на секој еден што ќе го доживее истово, не дај Боже, дека ќе има правда. Сите веруваа во правда и јас верувам. И јас верувам дека ќе се смени оваа од две години и ќе остане барем максималната казна. Верувам силно дека Теодора нѐ гледа и плаче многу повеќе отколку јас. И верувам дека силата нејзина е во мене. Нема да се откажам, Теодора мора да спие мирно“, порача Ева Ристовска.