Македонија
Во избришаната порака не пишувало „кажете само колку пари треба“, туку „полицијата не презема ништо, тврди дека Вања е избегана“, уверува Туфегџиќ

По денешното судење за убиствата на 14-годишната Вања Ѓорчевска и Панче Жежовски, адвокатот на таткото на Вања, Владимир Туфегџиќ, укажа дека полицискиот началник Дејан Димовски во сведоштвото не дал доказ дека татакото на Вања избришал порака на „Вибер“, во која зборувал за пари што бил спремен да ги даде. Началникот Димовски, објаснувајќи зошто се посомневале во таткото на Вања, Александар Ѓорчевски, рече дека една од причините била избришана порака во група на „Вибер“, која некои родители ја виделе и на полицијата ѝ кажале дека гласела „кажете само колку пари треба“.
„Началникот бил должен да спроведе целокупна постапка и да достави доказ дека тоа е така. Тој денес потврди дека, освен избришана порака, таква содржина во вибер-група меѓу другите родители нема. Кажува свои претпоставки што ги добил како сознание од други родители, па сега јас поставувам прашање, па зошто не е опфатен некој од тие родители денеска да биде дел од постапката. Тврдам, се знае и кој е родителот и кое е лицето. Александар има комуникација на прашање од тоа лице како загрижен родител, одговара на прашање и одлучува по ова, да ја избрише комуникацијата бидејќи смета, вели и самиот, да не сфати полицијата дека ја попречува истрагата. Тоа е лична комуникација во вибер-групата, од која се издвојува еден родител и упатува прашање, на кое тој одговара и потоа одлучува да ја избрише пораката, како што и самиот ми кажа – ‘за ако прочита полицијата, да не ми забележат дека ја опструирам постапката’. Инаку, неговиот одговор е баш така, децидно: што преземаат? – ‘ништо, тврдат дека Вања е избегана’“, рече адвокатот Туфегџиќ во изјава за медиумите по судењето.
Адвокатот тврди дека таткото на Вања, Александар, и неговиот кум Гоце Трајковски, три дена пред полицијата да дознае за смртта на Панче Жежовски побарале снимка од бензинска станица во Велес оти таткото на Вања се раководел од лични чувства, а пријателите од „Сејв сити“ им посочиле дека на снимката има автомобил што се бара, па затоа ја побарале и ја предале на полицијата. Туфегџик вели дека таа снимка е клучна за откривање на целиот случај.
„Јас лично тврдам, да не биле вклучени овие двајца луѓе, ние и денеска ќе имавме состојба при што Панче и Вања ќе се водеа за исчезнати и немаше да бидат пронајдени и во тоа сум сигурен“, рече адвокатот Туфегџиќ.
Ставот на одбраната е дека полицијата постапувала, без да следи правила и стандарди за постапување во вакви случаи, постапувале според свои видувања, а денешното сведочење на началникот го потврдило тоа.
Туфегџик сведоштвото на началникот го оцени како контроверзен исказ за кој ќе приговараат како одбрана, а по сослушувањето на таткото на Вања, за целосно расчистување на работите, ќе побараат негово соочување со началникот и неговиот колега, со кои бил во постојан контакт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За зелена иднина на новите генерации – Вработените од Mozzart засадија 2500 садници во Кучково

Голема акција за пошумување на планината Жеден, во атарот на селото Кучково беше реализирана од лидерот во приредување игри на среќа.
Во соработка со ЈП Национални Шуми, вработените во Mozzart засадија 2500 садници од чемпрес,црн бор и јасен.
Во големата акција се вклучи и дел од администрацијата на Општина Ѓорче Петров како и Здружението Отаку.
„ Ни преставува вистинско задоволство што имавме можност да реализираме една ваква голема акција, особено што со ова допринесуваме во зелена и здрава иднина за најмладите. Со позитивна енергија и соработка, уште еднаш покажавме и докажавме дека Mozzart е тимот кој секогаш победува. Реализацијата на ваквите проекти продолжува и натаму” , изјави Ивана Стефановска Крстевска од Mozzart.
За донацијата на садници и вклученоста на компанијата во еко акцијата, тимот на Mozzart доби благодарница од ЈП Национални Шуми.
Кога се работи тимски и сложно, резултатите се секогаш позитивни. Со ова вработените во Mozzart уште еднаш дадоа пример како треба да изгледа еден тим кој цели на успех.
Со реализацијата на вакви и слични проекти, компанијата само ја зацврстува лидерската позиција во општествена одговорност.
ПР
Македонија
Нема повеќе седење дома и земање плати, потребна ни е ефикасна администрација, порача Мицкоски

„Јавната администрација не е само механизам за спроведување на законите и политиките, таа е лицето на државата, одраз на нејзината ефикасност и посветеност кон граѓаните. Колку е подобро организирана, толку побргу и поквалитетно ќе ги испорачува услугите. За жал, во изминатите години сведочевме на слабости, партизираност, неефикасност, недоволна компетентност на одредени кадри. Сега е време за промени“, рече премиерот Христијан Мицкоски на втората по ред седница на Советот за реформа на јавната администрација.
Мицкоски исто така истакна дека нема веќе седење дома и земање плати и дека Владата ќе се фокусира на одредени елементи во јавната администрација да ја направи поефикасна.
„Можам да соопштам дека нема повеќе луѓе што седат дома и земаат плата.
Се бориме за систем на заслуги наместо партиски влијанија.
Професионалната администрација подразбира дека вработувањата и унапредувањата се засноваат на знаење, вештини и резултати, а не на политички или лични врски. Воведувањето транспарентни критериуми за селекција, тестирање и континуирана евалуација ќе гарантира дека само најдобрите ќе бидат дел од институциите.
Според него, професионалец не е само оној што знае, туку и оној што работи одговорно и транспарентно.
„Ќе ги зајакнеме етичката свест и механизмите за отчетност на администрацијата кон граѓаните.
Дигитализацијата за поголема ефикасност е многу значајна. Современата јавна администрација мора да биде технолошки напредна. Ќе инвестираме во дигитални алатки, кои ќе го намалат времето на обработка на барањата, ќе ги елиминираат непотребните чекори и ќе ја зголемат ефикасноста.
Квалитетната администрација бара мотивирани и задоволни службеници. Тоа значи подобри работни услови, фер плати и можности за напредување врз основа на реални заслуги“, рече тој.
Мицкоски нагласи дека јавната администрација е сервис за граѓаните и дека реформата мора да се спроведе ако сакаме европска држава.
„Ова не е промена што се случува преку ноќ, но е реформа што мора да ја спроведеме доколку сакаме модерна, европска држава. Јавната администрација мора да биде сервис за граѓаните, а не институција што ја кочи државата. Време е да создадеме систем во кој професионалците ќе ја движат администрацијата напред“, заклучи Мицкоски.
Македонија
Набавка на 120 еколошки автобуси, изградба на нови и реконструкција на постојните објекти во културата, одлучи Владата

На денешната 65. владина седница беше разгледана и усвоена информацијата за содржината на програмата за изградба на нови објекти и за реконструкција, санација и адаптација на постојните објекти што ги користат јавните установи во областа на културата за 2025 година, која содржи 11 проектни активности, кои ќе се реализираат од страна на Министерството за култура и туризам и националните установи од областа на културата, кои се носители на активностите.
Со оваа програма, како што информираат од Владата, се предвидуваат активности за продолжување со изведување градежни работи за изградба на нов објект наменет за театар и библиотека во Тетово, изградба на објектот на НУ Турски театар – Скопје и изградбата на Стариот театар во Струмица, се продолжува и со реконструкција на објектот на театарот во Куманово, како и почеток со реконструкција на објектот НУ Музеј на Македонија и почеток со реконструкција – санација и адаптација на објектот на поранешно кино „Партизан“ во Битола при НУ Народен театар – Битола.
Финансиските средства потребни за реализација на активностите од програмата се предвидени во буџетот на Министерство за култура и туризам за 2025 година во износ од 123.775.000 денари.
Исто така, Владата ја разгледа и усвои информацијата од Министерство за транспорт во врска со доставените писма за интерес од единиците на локалната самоуправа за потребата од набавка на еколошки автобуси за јавен превоз. Имајќи ги предвид финансиските средства обезбедени во рамките на буџетот на Министерството за транспорт за оваа намена, предвидена е набавка на 120 еколошки автобуси, од кои 80 се ургентно потребни за обнова на возниот парк на ЈСП „Скопје“ и подобрување на јавниот превоз, а другите 40 ќе бидат распределени во согласност со економската оправданост и реалните потреби на секоја од единиците на локалната самоуправа.
Набавката на еколошките автобуси за јавен превоз ќе придонесе за подобрување на квалитетот на услугите за граѓаните, како и намалување на загадувањето на воздухот во општините, одржлив развој и заштита на животната средина, нагласуваат од Владата.