Во Скопје почнува пилот-проект за тестирање нов вид контејнери за отпад од домаќинствата, односно полуподземни контејнери.

Во врска со ова, скопскиот градоначалник, Петре Шилегов, градоначалникот на општина Карпош, Стефан Богоев, и директорот на ЈП „Комунална хигиена“, Абдусамед Шабани, денеска одржаа прес-конференција на улицата Никола Русински во Карпош 3, каде што се поставени полуподземни контејнери.

„Овие контејнери имаат извесни предности во однос на другите видови, од кои може да се издвојат поради поголемиот капацитет, мал надземен дел, побрзо празнење, можност за заклучување и поголем век на експлоатација“, рече Шилегов.

Тој објасни дека станува збор за полуподземни контејнери со капацитет од 3 до 5 кубни метри од финско производство.

На улицата Никола Русински, зад ТЦ „Лептокарија“ во Карпош, поставени се 6 вакви контејнери, од кои два се со капацитет од три кубни метри, а четири се со капацитет од 5 кубни метри.

Шилегов појасни дека овој пилот-проект дава и можност за селектирање отпад, односно дека граѓаните, покрај селекцијата на комуналниот отпад, ќе може да селектираат и електронски и кабаст отпад.

„Во неколкумесечниот тест-период во рамките на овој пилот-проект ќе ги согледаме сите предности и предизвици од користењето на овие садови за отпад од домаќинствата по што ќе бидат направени внимателни анализи за исплатливоста на инвестирањето во вакви контејнери барем за оние делови од градот каде што просторните услови тоа го дозволуваат“, кажа градоначалникот.

Шилегов воедно упати апел граѓаните прописно да го фрлаат отпадот од домаќинствата користејќи ги садовите исклучиво во согласност со нивната намена и да го фрлаат отпадот во пропишаното време, односно од 19 до 22 часот навечер, во затворени пластични кеси, не оставајќи храна и облека надвор од контејнерите.