Македонија
Се поминува на црвено, се вози бесно, се користат телефони: во Македонија сообраќајните правила тешко се почитуваат

Во текот на вчерашниот ден 700 возачи се казнети за брзо возење. Полицијата направи контроли во Скопје, Битола, Штип и Тетово. Во сите градови, најголем дел од изречените казни биле за брзо возење.
„Од нив, 82 возила се движеле со брзина над 50 километри на час повеќе од дозволеното, а 10 возила се движеле со дури над 70 километри на час повеќе од дозволенота брзина. Притоа, 331 возачи ја пречекориле брзината во населено место, а 369 надвор од населено место“, посочија од МВР.
Во Скопје се казнети 193 возачи. Меѓу нив имало и такви кои минувале на црвено светло.
„За возење повеќе од дозволената брзина 50 санкции, 20 санкции за управување под дејство на алкохол, 20 мерки за возење без возачка дозвола, 23 санкции за прекршоци што ги прават возачите на мотоцикл. Изречени се четири санкции за минување на затворен сигнал (црвено светло), три санкции за некористење сигурносен појас, 18 мерки за технички неисправни и нерегистрирани возила“, додаваат од МВР.
За шест часа во Битола казнети се 161 возач.
„122 возачи ја пречекориле брзината во населено место, а 39 надвор од населено место. На сите прекршители изготвени им се соодветни поднесоци“.
Во Штип за време на контролата биле казнети 85 лица.
„Од кои 62 надвор од населено место и 23 во населено место и тоа: 30 на подрачјето на Штип, 18 Свети Николе, 12 Делчево, 11 Берово, 9 Кочани, 3 Пробиштип и 2 Виница. Санкционирани биле и 21 други видови на прекршоци, од кои 8 за управување возило без возачка дозвола, 3 за нерегистрирано возило, 5 за возач почетник, 3 за некористење сигурносен појас, 1 за користење мобилен телефон и 1 за некористење заштитна кацига“, велат од МВР.
Во Тетово за шест часа казнети се 68 возачи.
„Кои ја пречекориле максимално дозволената брзина надвор од населено место (Тетово-39 и Гостивар-29).Четири од нив (Гостивар) се движеле со над 70 километри повеќе од пропишаната брзина, а 26 возила (Тетово-11 и Гостивар-15) со брзина за 50 до 70 километри на час повеќе од дозволената. Покрај ова, биле санкционирани и 39 пречекорувања на брзината во населено место (Тетово-37 и Гостивар-2), како и 6 други видови сообраќајни прекршоци (Тетово-3 и Гостивар-3)“, посочуваат од МВР.
Казните кои се изречени се во износ од 45 до 400 евра. На дел од возачите ќе им бидат одземени и возачките дозволи од три месеци до една година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нова програма за Тетово на Касами: бесплатен јавен превоз, 100 евра за првачиња, нови училишта, жичница

Кандидатот за градоначалник на Општина Тетово, Билал Касами, денес одржа прес-конференција на која ја претстави својата изборна програма за следниот четиригодишен мандат.
Касами истакна дека изминатите четири години биле посветени на итни интервенции и решавање на основните проблеми со инфраструктурата, финансиската стабилизација и редот во општината.
– „Тетово денес е многу подобро отколку што беше пред 4 години. Успеавме да реализираме стотици проекти и да вратиме долг од 9 милиони евра. Сега сме подготвени да преминеме на ново поглавје – развој и модернизација на градот“, истакна Касами.
Во својата програма за 2025–2029 година, тој предвидува целосно решавање на проблемите со водоснабдување и отпадни води, модерна канализациона и улична инфраструктура, електрични автобуси и бесплатен јавен превоз, дигитализирани јавни услуги и стратегија за паркирање.
Посебен фокус е ставен на образованието со целодневна настава, нови лаборатории, подобрени услови во училиштата и субвенции од 100 евра за секое дете запишано во прво одделение.
Програмата предвидува и урбанистичка трансформација на Тетово со нов Генерален урбанистички план, изградба на Плоштад со подземен паркинг, катни гаражи, пешачки подвозници и жичница Тетово–Лисец–Попова Шапка.
„Вториот мандат ќе биде мандат за брз развој, за европски стандарди во секоја сфера, за заживување на културата, спортот и туризмот, но и за грижа за најранливите категории“, нагласи Касами, додавајќи дека сите проекти се базирани на конкретни стратегии и финансиски планови.
Тој порача дека Тетово не смее да се врати назад во „ерата на хаос, анархија и корупција“ и дека новата програма е „договор за работа“ кој ќе се реализира доследно.
Македонија
Светски ден на срцето: Граѓаните со голем интерес за бесплатните превентивни прегледи

По повод одбележување 29 септември–Светски ден на срцето, денес министерот за здравство, Азир Алиу, заедно со директорката на Институт за јавно здравје, Марија Андоновска го посетија превентивниот пункт во ТЦ „Дајмонд мол“.
-Граѓаните покажаа голем интерес за бесплатно мерење крвен притисок, холестерол и ниво на шеќер во крвта на превентивниот пункт. Здравствените услуги на пунктот ги врши тим од Институтот за јавно здравје. Со ваквите акции заеднички ја подигнуваме свесноста за навремено откривање и превенција од кардио-васкуларни заболувања. Дополнително, присутните добија индивидуални совети и препораки за здрава и урамнотежена исхрана, редовна физичка активност, како и поддршка и мотивација за откажување од пушење – три клучни фактори во заштитата на здравјето на срцето, изјави министерот Алиу.
Директорката на Институтот за јавно здравје, д-р Марија Андоновска ја истакна важноста на примарната превенција и активниот пристап кон сопственото здравје.
-Светскиот ден на срцето е можност да се потсетиме дека здравото срце значи и квалитетен живот. Институтот за јавно здравје ќе продолжи со активности насочени кон унапредување на здравјето на населението и поддршка на здрави животни навики” изјави д-р Андоновска.
Македонија
Шукова најави нов систем за собирање отпад и двојно повеќе контејнери во Скопје

Кандидатката за градоначалник на Скопје од СДСМ, Каја Шукова, денеска најави целосна реформа на системот за собирање отпад во главниот град.
„Ќе воведеме паметен систем по теркот на европските градови – со нова механизација и GPS рутирање на возилата, за точно да се знае каде е полно и каде треба да се собира отпадот. Ова ќе биде систем без импровизации и без доцнења“, порача Шукова.
Дополнително, најави двојно зголемување на бројот на контејнери во сите скопски населби, со цел подобра покриеност и хигиена.
Според неа, хаосот во Скопје е резултат на четиригодишната блокада и саботажа од ВМРО-ДПМНЕ, кои го контролирале ЈП Комунална хигиена и го оставиле градот да „скапува во смет и депонии“.