„Откако пред некој ден син на пратеник од ДУИ, сопственик на Пуцко петрол како мерка доби домашен притвор за случај во којшто се сомничи за криминал тежок за 167 милиони евра за набавка на канцероген мазут за ТЕЦ Неготино, јавноста има право да знае дека стекнувањето, поточно зголемувањето на имотот на сопственикот на Пуцко петрол се случува благодарение на СДС и ДУИ“, рече Бојан Стојаноски, пратеник на ВМРО-ДПМНЕ.

„Оваа постапка следеше откако врз основа на информации во јавноста, Антикорупциската комисија отвори постапка, а потоа и покрена иницијатива за кривично гонење.

Според јавно достапни информации компанијата Пуцко петрол со години наназад набавува различни производи како мазут, нафта, за многу градинки, училишта, болници, како и за различни државни институции.

Најголемиот скок на имотот на Пуцко петрол е во период на владеење на Зоран Заев, со влада во која министер за здравство е Венко Филипче.

Или, тоа е влада на ДУИ со малцински партнер СДС.

Токму во тој период, според јавно достапни информации, Пуцко петрол во 2021 година имала вкупни приходи од 48 милиони и 133 илјади евра, што е за 40 проценти повеќе во однос на 2020 година.

Овој процес започнува во 2018 година или по неполна година од заедничкото владеење на СДС и ДУИ.

Па така само за еден месец, поточно декември 2018 година, Пуцко петрол добива тендери во вредност од околу 3,2 милиони евра, од кои 2,8 милиони евра е оној за Македонски железници транспорт, претпријатие коешто важи за најдолжно и кое едвај заживува.

Ако само за еден месец во периодот на владеење на Заев и Филипче, Пуцко петрол добива тендери поголеми од три милиони евра можете да замислите колку добивала за една година. И кога на сето ова ќе го додадете податокот дека вредноста на компанијата се зголемува 40 проценти повеќе во 2021 од 2020 година логичен е заклучокот дека компанијата од Пласница добивала работа од најголем дел државни органи со кои раководеле кадри на ДУИ, а одлично и одела соработката и со институциите кои биле под водство на СДС.

Поради ваквото владеење на Заев заедно со Филипче излегуваат на виделина огромни последици по државниот буџет и парите на граѓаните. Дојде време да се одговара за вакви бизниси на грбот на народот“, изјави Бојан Стојаноски, пратеник на ВМРО-ДПМНЕ.

„Во време кога Македонија се соочува со сериозна демографска криза, Левица предложи нов закон за 18 месеци платено породилно отсуство, кој е директен одговор на потребите на младите родители и семејства. Овој закон не само што ќе ја подобри положбата на мајките и семејството, туку ќе создаде темели за решавање на најголемите демографски проблеми кои го засегаат општеството. Во светот и Европа, долгото платено породилно отсуство е веќе утврдена практика, а Македонија има можност да го следи примерот на успешните земји и да инвестира во иднината на своите најмлади“, велат од партијата Левица.

„Историските податоци за наталитетот во Македонија покажуваат алармантен пад на бројот на новороденчиња во последните три децении. Според податоците од Заводот за статистика на Македонија, бројот на новороденчиња постојано опаѓа, а во 2023 година беше забележан пад на бројот на новороденчиња на 22.759, што е значителен пад во споредба со 35.000 новороденчиња во 1991 година. Овој пад не е само бројка на хартија – тоа е аларм за општеството и за Владата, кој бара сериозни интервенции и стратегии. Овој пад кој изнесува над 30% за нецели 30 години е сериозен показател за демографските промени кои се случуваат во земјата.

Дополнително, ако се погледне индексот на природен прираст, во последните години, Македонија се соочува со негативен природен прираст, што значи дека бројот на смртни случаи ја надминува бројката на новороденчиња. Во 2022 година, бројот на смртни случаи бил 32.700, што доведува до значителен пад на вкупното население. Овој тренд е загрижувачки и ја нагласува потребата од сериозни мерки за поддршка на семејствата и мајките.

Земјите со успешни демографски политики, како што се Шведска и Финска, веќе долго време применуваат долготрајно породилно отсуство, а Македонија има можност да го следи нивниот пример. Примената на 18 месеци платено породилно отсуство во овие земји има позитивни ефекти не само на здравјето на мајките и децата, туку и на економската стабилност на семејствата, што е суштински фактор за раст на наталитетот.

Жените во Македонија сочинуваат 40% од вкупното население, но поради семејните обврски се подложени на дискриминација. Младите жени често се соочуваат со одбивање од страна на работодавачот поради страв од трошоци за породилно отсуство. Мајките, пак, кои не се вработени или работат неформално немаат право на финансиска поддршка и породилно отсуство. Македонија дури и заостанува зад Србија и Бугарија во времетрање на породилното отсуство. Ова е суштинско право кое државата мора да го оствари.

Мајките и децата не се само статистика или бројки во економските извештаи. Левица со овој законски предлог покажува дека разбирањето на потребите на мајките е клучно за една држава. Предлог-законот на Левица за продолжување на породилното отсуство на 18 месеци носи важна социјална реформа, која има за цел да обезбеди поголема поддршка за родителите и да им помогне да се посветат на воспитувањето на своето дете.

Македонија може да стане модел на поддршка на мајките и младите семејства, следејќи го примерот на европските земји кои веќе го применуваат долготрајното породилно и родителско отсуство. Со усвојување на предлог – законот на Левица државата ќе покаже дека вложувањето во демографијата и родителството е клучно за создавање на здраво и перспективно општество. Поддршката за овој предлог од пратениците во Собранието на Република Македонија би била важен чекор кон поголема социјална правичност и еднаквост, како и поддршка за семејствата“, соопшти партијата Левица.

Новото депо на пајак-службата на ЈП „Паркинзи на Општина Центар” – Скопје ќе започне со работа од 17 март на нова локација до улица и мост Беласица, под Железничката станица.

„Со новото депо значително го унапредуваме функционирањето на паркинг услугите и создадовме услови за поголема безбедност и ред во урбаната средина. Ова е уште еден чекор кон подобрување на инфраструктурата и услугите за нашите сограѓани”, изјави градоначалникот Горан Герасимовски.

Депото се простира на 2250 м² и располага со нови куќарки за вработените и опслужување на корисниците. Изведена е водоводна и електрична мрежа, а поставена е и ограда за зголемена безбедност, видео надзор и нови контролни рампи со безжично управување.

Директорот на ЈП „Паркинзи на Општина Центар“ Душко Коцевски, посочи дека од 17 март (понеделник), сите возила подигнати од пајак-службата ќе се преземаат од новата локација.

,,Со ова депо ќе се подобри капацитетот и нашата оперативна ефикасност, што ќе овозможи побрзо реагирање и поголема флексибилност во секојдневното работење, истакна Коцевски.