Македонија
Во „Систина“ успешно направени првите кардиохируршки операции покриени од ФЗОМ кај деца помали од 1 година

Во Клиничката болница „Аџибадем Систина“ се извршени две кардиохируршки интервенции кај деца во Одделот за детска кардиохирургија, предводени од кардиохирургот за деца, Владимир Чадиковски. Двете операции се покриени од државниот Фонд за здравствено осигурување.
Двете деца што се оперирани се бебиња, на девет и 11 месеци. Кај нив биле дијагностицирани сериозни вродени кардиолошки аномалии, односно едното било со дијагноза вентрикуларен септален дефект и изразена пулмонална хипертензија, а другото е со суправалвуларна аортна стеноза. Операциите траеја од 4 до пет часа и десет дена по оперативниот зафат, децата се пуштени на домашно лекување.
Чадиковски вели дека децата се постоперативно добро и им посакува побргу да се вратат во нормална секојдневна динамика на животот. Операциите се изведени под надзор на професор Тајар Сариоглу од „Аџибадем“ од Истанбул, кој се смета за основополжник на детската кардиохирургија во Турција.
„Аџибадем Систина“ со овој тип интервенции кај деца, кои од неодамна се покриени и од државниот Фонд, докажува дека е од рангот на светските клинички болници во кои се изведуваат сериозни кардиохируршки интервенции кај деца.
„Детската кардиохирургијата е од огромно значење не само за ‘Аџибадем Систина’ туку и за државата. Добиваме поддршка од менаџментот на нашата болница и целта ни е заедно да направиме еден референтен центар на детска кардиохирургија“, вели Чадиковски.
Со развивање на детската кардиохирургија „Аџибадем Систина“ го подигнува нивото на третман на пациентите во оваа мултидисциплинарна гранка, која е една од најтешките за работа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Целосно ја расчистивме дивата депонија во Крњево, на ова место следува детско и спортско игралиште

Целосно е исчистена дивата депонија во населбата Крњево. Кандидатот за градоначалник и актуелен градоначалник на Општина Центар, Горан Герасимовски, заедно со идниот тим од советници и хигиеничари, изминатиот викенд, како што објави, ја почнаа акцијата за нејзино целосно расчистување.
Герасимовски потенцира дека чиста и уредна општина е приоритет од кој никогаш не отстапил, и дека грижата за хигиената е континуиран процес кој бара постојано вложување.
„Во сите четири години од мојот мандат посветено се грижевме за хигиената во Центар. Нашите хигиеничари беа секојдневно на терен за да го одржуваат Центар чист. Исчистивме повеќе диви депонии, а кога ЈП „Комунална хигиена“ и Градот Скопје потфрлија, општината самостојно го собираше отпадот. Тоа беше неопходен чекор за граѓаните да добијат услуга каква што заслужуваат. За неколку дена, дивата депонија во Крњево целосно ја исчистивме. Во моментов просторот се дезинифицира, а потоа следува и негово уредување. На ова место поставуваме детско и спортско игралиште, ново зеленило и урбана опрема. Ги подобруваме условите во сите населби, заеднички со жителите го направиме нашиот Центар поубав. За Центар што го сакаме“ изјави Герасимовски.
Герасимовски најави дека во новата програма за работа предвидува зголемување на капацитетите на општината со набавка на две нови цистерни и пет метларки, кои ќе овозможат уште поефикасно и пофреквентно чистење на јавните површини.
„Ќе продолжиме со инвестиции во опрема, инфраструктура и човечки ресурси, затоа што чиста општина значи поголем квалитет на живот за сите нас. Центар останува пример за одговорна и уредна урбана средина“, додаде Герасимовски.
Македонија
Застреланиот лекар Шаини ја брани сопругата: Ги отфрлам тврдењата дека зад ова стои госпоѓата Арјета Ајдини

Застреланиот лекар Зекирија Шаини ги отфрли како неосновани и невистинити тврдењата дека неговата сопруга Арјета Ајдини е вмешана во вооружениот напад врз него. Тој побара од истражните органи итно да ја расчистат ситуацијата и обвини дека целиот случај е обид за негова дискредитација.
„Целосно ги отфрлам како неосновани и невистинити тврдењата дека за ова стои госпоѓата Арјета Ајдини. Овој случај, за жал, се претставува со јасна намера за дискредитација на мене и моето семејство, како и за создавање збунетост и заблуда во јавноста,“ изјави Шаини, додавајќи дека нема никакви сознанија за мотивите на нападот и дека е подготвен за целосна соработка со институциите.
Тој апелираше случајот да не се третира како семеен спор. Кажа дека живее со сопругата и нивните две ќерки во село Слупчане и повика случајот да не се користи за политички поени во предизборниот период.
„Ќе продолжам со главата горе, од никого не се плашам, зашто лошо никому немам сторено,“ рече Шаини.
Иако поминаа само три дена откога беше застрелан на улица во Куманово, лекарот од Клиниката за пулмологија во Скопје Шаини, кој е носител на советничка листа на ДУИ за Липково, рече дека вечерва ќе излезе и на предизборен митинг.
Претходно беше објавено дека полицијата ја привела сопругата на Шаини и дека е била осомничена за вмешаност во обидот за негово убиство.
Македонија
Венецијанската комисија на Советот на Европа даде позитивно мислење за Предлог законот за јавно обвинителство и за Предлог законот за Советот на јавните обвинители

Денес, во Венеција, се одржа 114-та пленарна сесија на Европската комисија за демократија преку право – Венецијанска комисија при Советот на Европа, на која беше усвоено Заедничкото мислење за Предлог законот за јавно обвинителство и за Предлог законот за Советот на јавните обвинители на Република Северна Македонија.
Во усвоеното мислење, Комисијата даде позитивна оцена за процесот и содржината на изработените закони, поздравени се реформските напори на Министерството за правда. Укажано е дека во двата предлог-закона се запазени меѓународните стандарди и имплементирани сите препораки. Дадени се и неколку дополнителни сугестии во насока на подобрување на законските текстови.
Со ова, се потврдува дека законите се целосно усогласени со европските принципи за професионалност и ефикасност на јавното обвинителство, како и со стандардите за транспарентно и одговорно функционирање на Советот на јавните обвинители.
На пленарната сесија, во име на Министерството за правда, свое обраќање имаше Александра Деаноска Трендафилова, како претседател на Работната група која ги подготви двата закона.
Министерството за правда ќе продолжи посветено да работи на спроведување на препораките, на унапредување на правосудните институции и на јакнење на владеењето на правото во Република Северна Македонија, велат од таму.
„Ова позитивно мислење претставува важна потврда на нашата европска определба, на транспарентниот и инклузивен пристап што го применуваме во процесот на реформирање на правосудството и на заложбата за градење правен систем кој ги одразува највисоките стандарди на демократија, правда и интегритет.
Двата закона се дел од Реформската агенда на Европската унија со рок до декември 2025 година“.