Завршија градежните активности во 40 училишта, каде што во текот на летниот период се работеше на подобрување на санитетско-хигиенските услови и на пристапноста за учениците и лицата со попреченост. Во повеќето од објектите што беа опфатени се изградија пристапни рампи и се адаптираа тоалети за ученици со посебни потреби. Некаде, пак, се реконструираа постојните тоалети, подовите и воопшто внатрешноста на објектите, вклучително и училниците, соопшти МОН.

Овие училишта, според најавеното, се дел од поширок план за унапредување на условите за следење на наставата и за подобрување на пристапноста во вкупно 118 училишни објекти за што обезбеден е буџет во рамките на проектот за унапредување на основното образование, кој се финансира со средства од Светската банка.

„Активностите до целосна реализација на инвестицискиот план ќе продолжат и следната календарска година, со рамномерен опфат на училишта од сите општини во државата.

Подобрувањето на инфраструктурните услови, заедно со замената на наставните програми и набавката на нови учебници, како и подигнувањето на мотивацијата на наставниците за работа преку повисоки лични примања и можности за професионален и кариерен развој се дел од поголема стратегија на МОН за унапредување на квалитетот на основното и средното образование, усвоена преку широка јавна дебата и со согласност од сите засегнати фактори“, се истакнува во информацијата од Министерството.