Македонија
Вработените во здравството на протест побараа повисоки плати, решение за оние на договор на дело и за одливот на доктори и медицински сестри

Незадоволни од непотпишувањето на анексот на колективниот договор, вработените во здравството денес излегоа на протест пред Министерството за здравство.
Со анексот платите на вработените треба да се покачат 15 отсто. Љубиша Каранфиловски, претседателот на Самостојниот синдикат за здравство, фармација и социјална заштита, порача до политичките партии што претендираат да ја добијат власта да се заложат ова барање да биде исполнето и да седнат со нив и да се договорат, да кажат какво решение предлагаат.
На протестот потенцирана беше и потребата да се формира комисија, што побргу да се доврши изработката на колективниот договор и да се стави на маса и да се потпише.
Претседателот на Синдикатот на Клиничкиот центар, Предраг Серафимовски, рече и дека има здравствени работници што 20 години работат по договор на дело на клиниките, без здравствено и пензиско осигурување. Состојбата ја опиша како егзодус во здравството, постои, вели, максимален одлив во странство кај сите профили.
Говорејќи на истата тема, Даница Стојкова, која работи како медицинска сестра на Клиниката за гинекологија, рече дека ако некогаш имало 4 сестри со еден доктор, денес има три доктори со кои работи една медицинска сестра. Платите не стигнуваат, здравствените работници иднината ја бараат во странство, а во здравствените установи сè повеќе влегува несоодветен, неспособен медицински кадар, а нивната работа ја извршуваат вработените, кои се доста повозрасни од нив, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Манасиевски: Филипче е послушник на Заев, кој сака да ги применува истите методи и шеми

„Дали методот евро за Вицето, е методот кој народот треба да го учи од Заев, според Филипче?
Дали Венко Филипче е воодушевен од Заев и тврди дека нема друг како него, заради начинот на кој рекетирал во Струмица?
Дали Венко Филипче е воодушевен од Заев, кој цела јавност го слушна како вели дека сите во Струмица на кои им легализирал објекти, плаќале по истата шема – евро за Вицето? Учи ли Филипче од Заев кој ја ограби Македонија, а после си донесе измени на Кривичниот законик со цел да не одговара за ништо?“, прашува Валентин Манасиевски, член на ЦК на ВМРО-ДПМНЕ.
Тој дополнително прашува и дали Венко Филипче се бори во политиката за власт, за да може да работи по методот на неговиот учител Заев – евро за Вицето.
„Добро е што Филипче јасно им даде до знаење на граѓаните, за никој да нема дилема, дека е ученик на Заев, негов послушник кој сака да ги применува истите методи и шеми, со кои ја опустошија Македонија“, додава Манасиевски.
Македонија
Уникатното охридско кајче претставено на Меѓународниот саем за наутика во Белград

Охридски „Зелен Град“ го претстави уникатното Охридско кајче со фотоволтаични панели и електичен мотор на Меѓународниот саем за Наутика во Белград
ЕКО Здружението „Зелен Град” од Охрид имаше забележително учество на Меѓународниот саем за Наутика во Белград, Република Србија.
Се претставија со единствениот и уникатен експонат на саемот, традиционалното Охридско кајче на кое беа поставени фотоволтаични панели и иновативен електичен мотор.
– Бродскиот мотор е создаден со примена на напредната технологија на комбинирани намотки „Славјанка“. Се карактеризира со голема моќност, што му овозможува да го движи кајчето без поголеми проблеми, со користење на енергија од фотоволтаичните панели, информираат од „Зелен Град“.
На саемот за Наутика беа прикажани јахти, глисери, катамарани и мотори од најголемите светски произ
– Меѓу нив нашето кајче беше единствено со поставени фотоволтаични панели, со електро мотор и изработено од еколошки материјал – дрво и метал. Се планира да се направат уште неколку тестови со фотоволтаичните панели на Охридското Езеро и со тоа да се иницира транзиција на водениот транспорт до еколошки извори на енергија, за зачувување на чистотата на водата, флората и фауната на езерото, потенцираат од „Зелен град“.
Македонија
Одбележани 24 години од загинувањето на бранителите кај Вејце

Осуммина припадници на специјалната единица на МВР, од кои четворица битолчани, на денешен ден пред 24 години, загинаа во масакрот кај селото Вејце во конфликтот во 2001 година.
Во нивна чест пред споменикот на загинатите бранители во кругот на СВР Битола, споменикот „Ангел“ кај Саат-кулата и споменикот на Бошко Најдовски во Долно Оризари, свежо цвеќе положија градоначалникот на општина Битола, Тони Коњановски, претседателката на Советот, Габриела Илиевска, со претставници на Советот на Општината, полицијата, семејствата на загинатите, политичките партии и граѓаните.
Градоначалникот на општина Битола, Тони Коњановски, истакна дека Битола секогаш ќе се сеќава на Марјан Божиновски, Илче Стојановски, Кире Костадиновски и Бошко Најдовски, со должна почит за прерано загубените млади животи и болката што остана во нивните семејства.
„Денес, им оддаваме почит на нашите битолчани, четворицата херои што го дадоа животот бранејќи ја татковината во Вејце. Да укажеме уште еднаш дека опомена за нас, за сите генерации, за помладите, е тоа дека она што се случило никогаш повеќе да не се повтори затоа што само единството, разбирањето, меѓусебната почит и разговорот може да нè доведат до просперитет на оваа држава и овој град. Слава на хероите, слава на јунаците, слава на бранителите на нашата таковина!“, рече градоначалникот Тони Коњановски.