Македонија
Вртаноски: Инфраструктурата е застаната и нема шанса да се промени доколку не се промени размислувањето на Владата

Кога зборуваме за железница, треба да се направи разлика помеѓу инфраструктура и железничко средство, значи вагони, локомотиви итн. Ако немате добра инфраструктура, тогаш џабе ви е да имате и формула 1, ама џабе ви е да имате и висока брзина на возот, значи тој нема да има сигурност. Од тој аспект, значи првин треба да се работи на инфраструктурата во Македонија, изјави универзитетскиот професор Глигорче Вртаноски на денешната трибина со наслов „150 години железници во Македонија 1873-2023″ во организација на Републичката комисија за инфраструктура, урбанизам и транспорт на ВМРО-ДПМНЕ.
Според Вртаноски, инфраструктурата е застаната и нема шанса да се промени нешто доколку не се промени начинот на размислување, како што рече тој, на естаблишментот на Владата.
„Инфраструктурата е застаната и нема шанси да се потегне нешто со овој начин на размислување, првин на естаблишментот на Владата или тие што ја генерираат таа стратегија“, вели тој.
Вртаноски вели дека во Македонија има само желба за нешто да се направи за разлика од Гана, на која ѝ била потребна само една и пол година да направи иста делница каква што во Македонија 30 години не може да се изгради.
„Кај нас не можеме 30 години една пруга да изградиме од Куманово до Крива Паланка, која што е 50-ина километри. Гана е многу богата земја. Второ, стратегијата што ја прават е дека сакаат да го направат тоа. Кај нас имаме стратегија, сакаме да направиме, ама нема да го направиме. Сакаме да имаме воз или гарнитура, ама немаме одржување. Вториот дел, кој можеби за мене е побитен, тоа се човечките ресурси. ‘Македонска железница’ е со старосна група, со секоја почит од над 53 години, и во тој момент што би очекувале од луѓе што се повозрасни. Сепак, треба млади луѓе, кои треба да се соодветно обучени, а понатаму нивниот тренинг да се врши во самата организација. И во тој момент ќе имате прогрес“, истакна Вртаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова на средба со независни советници: реафирмирана потребата од постигнување широк консензус за измените на Изборниот законик

Независните советници сметаат дека со актуелните измени на Изборниот законик коишто предвидуваат обврска за собирање повеќе од 1% потписи од електоратот за поднесување независни кандидатски листи во некои општини, се доведуваат во нерамноправна положба во изборниот процес.
За нив, горенаведените измени се противуставни како од процедурален заради скратената постапка, така и од материјален аспект заради дискриминацијата.
Тие очекуваат од пратениците законско решение што ќе води сметка за уставно загарантираната еднаквост на пасивното и активното избирачко право на секој граѓанин, поттикнување на политичкиот плурализам и овозможување фер и демократски избори.
Претседателката ја реафирмираше потребата од инклузивна постапка во функција на постигнување широк консензус за измените на Изборниот законик, почитување на меѓународните изборни принципи, правила и добри практики, како и водење сметка за одлуките на Уставниот суд.
Македонија
Поради пожар, целосно прекинат сообраќајот кон граничниот премин Блаце

Министерството за внатрешни работи известува дека поради ширењето на пожарот во близина на Блаце, целосно е прекинат сообраќајот на патниот правец Стенковец-ГП Блаце, во двата правци, а затворен е и граничниот премин Блаце.
„Министерството за внатрешни работи во координација со другите надлежни институции презема мерки за гасење на пожарот“.
Апелираат до граѓаните да не тргнуваат кон ГП Блаце до гасењето на пожарот и нормализирање на сообраќајот, за што соодветно ќе ја информираат јавноста.
Македонија
Граничниот премин Долно Блаце е целосно затворен за влез и излез

Граничниот премин Долно Блаце е целосно затворен за влез и излез во и од Република Северна Македонија (за сите видови возила и лица) соопшти АМСМ.
Сообраќајот на државните патишта се одвива непречено, по суви коловози.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.