Oпштина Гази Баба во соработка со приватни компании ќе ги подобрува условите во градинката „Калинка“ во населба Железара, која е клон од градинката „Детска радост”, изјави денеска на прес-конференција градоначалникот Борис Георгиевски.

„Со заеднички средства, старите и дотраени врати и прозорци на објектот ‘Калинка’ ќе бидат заменети со нови. Покрај ова, согласно со потребите ќе се обнови и внатрешниот дел на градинката со цел да им се овозможат подобри услови за престој на децата“, рече Георгиевски.

Тој додаде дека следен проект на кој ќе работат е зголемувањето на капацитетот на оваа градинка.

„Просторот кој сега го користат од јавната установа Меѓуопштинскиот центар за социјални работи на град Скопје за лица со попреченост, ќе биде предаден на градинката, со што ќе се зголеми капацитетот за 75 деца. Со овој простор, во градинката ќе обезбедиме и работа во втора смена.
За потребите на децата со попреченост Општина Гази Баба и министерството за труд и социјална политика ќе изградат нов дневен центар за згрижување деца со попреченост, со површина од 170 квадратни метри во Автокоманда“, истакна Георгиевски.

Меѓу другото, како што рече, во завршна фаза е експропријацијата на просторот за изградба на градинка во населеното место Стајковци на улица 18 со површина од 2000 квадратни метри.

„Откако ќе биде завршен овој процес, ќе прејдеме на изградба на градинката, која според планот е предвидена да започне во август“, појасни градоначалникот.