Македонија
Герасимовски: Инспекциската служба на Центар ги лови сите неправилности

Секторот за инспекциски работи при Општина Центар бележи зголемен обем на работа и зголемен број донесени записници, акти и барања за поведување прекршочни постапки во согласност со програмата за работа. Според шестмесечната анализа на Секторот, во периодот од 1.1.2023 до 30.6.2023 година биле донесени 235 записници, во кои спаѓаат редовните, вонредните и контролните надзори од страна на инспекторите наспроти истиот период минатата година кога тој број изнесувал 95 записници, што значи дека за шест месеци Општина Центар има донесено 140 записници повеќе, информираат од Општината.
Градоначалникот на општината, Горан Герасимовски, најави дека ќе продолжи спроведувањето на зачестените инспекциски контроли со цел почитување на законите и решавање на проблемите на граѓаните.
„Ветив чести инспекциски контроли во сите сегменти на локалната самоуправа за што сведочат и овие бројки од шестмесечниот извештај од Секторот за инспекциски работи. Колегите на терен ја евидентираа секоја неправилност, која треба да се исправи од страна на прекршителите и тоа мора да важи за сите. Граѓаните заслужуваат правда и хумано живеење. Прекршувањето на законите важи за сите нас, затоа во Општина Центар ќе настојувам тоа да се применува“, смета Герасимовски.
Според изготвениот извештај од Секторот за инспекциски работи, во работата на комуналните редари изречени се 122 прекршочни платни налози наспроти нула изречени прекршочни платни налози за минатата година. Исто така, од страна на инспекторите поднесени се и 69 барањата за поведување прекршочни постапки наспроти нула поведени прекршочни постапки за истиот период минатата година. Има зголемување и во однос на донесени решенија од страна на инспекторите 81 наспроти 57 минатата година.
Во рамките на Секторот за инспекциски работи ангажирани се 1 комунален инспектор и 3 комунални редари, 1 градежен инспектор, 1 инспектор за домување и 1 инспектор за животна средина. Со овие ресурси и доброто менаџирање Секторот покажува високи резултати при евидентирање на неправилностите и постапување по нив.
Општина Центар известува дека засилените надзори и контроли ќе продолжат и во следниот период со цел граѓаните да внимаваат на пропишаните правила и законски одредби.
„Секој оној што нема да ги почитува и ќе направи какви било отстапки ќе биде санкциониран“, дециден е Герасимовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Можно зголемување на водостојот на реките во западните делови од земјата, најави ЦУК

Водостоите на реките низ земјава се во опаѓање. Водостојот на река Вардар исто така бележи намалување по целото течение на реката и тоа се очекува да продолжи до крајот на денот, соопшти ЦУК.
„Во доцните вечерни часови и за време на претстојната ноќ се очекуваат нови врнежи од дожд претежно во западните делови на земјата каде се прогнозираат количини на врнежи од 15-20 l/m2. Земјата полека се заситува со влага од претходните врнежи изминативе денови така што можна е реакција на реките во западниот дел на земјата и извесно зголемување на нивниот водостојот. Зголемување на водостојот доцна во ноќта и утре изутрина може да има на река Треска, река Црна, на водотеците од горниот дел од сливот на река Вардар, како и на реките кои доаѓаат од планинскиот масив Солунска Глава“.
Според прогнозите можни се и краткотрајни врнежи со умерен интензитет кои што можат да доведат до брзо зголемување на водостојот на помалите реки и суводолици во западниот дел на земјата, односно на малите реки и суводолиците кои доаѓаат од Шар Планина и од планината Јакупица (масивот Солунска Глава).
Пообилни врнежи можни се и во делови од градските средини како Тетово и западниот дел на Скопје каде што предупредуваме на внимание.
Во источниот дел на земјата во текот на денешниот ден не се очекуваат поголеми зголемувања на водостоите.
ЦУК предупредува на внимателно движење покрај реките и суводолиците во текот на вечерните часови и ноќта.
Македонија
Мицкоски и Филипче ги поделија сферите на интерес и се договорија да ја задушат правдата, велат од Алијанса за Албанците

Премиерот Христијан Мицкоски и лидерот на СДСМ, Венко Филипче во изјавите по денешната скандалозна средба ги потврдија сите наши сомнежи и ги открија своите планови, велат од Алијанса за Албанците.
„Тие се согласија да формираат работни групи во три области кои се поврзани, се вкрстуваат или од интерес за двајцата лидери. Ќе ја подготват реформата во здравството, сфера на интерес на Венко Филипче каде што ќе се заобиколи актуелниот министер Арбен Таравари, во енергетиката, сфера на интерес на Христијан Мицкоски, сопственикот на хидроцентралите и на крајот, „правдата“ каде Филипче и Мицкоски имаат заеднички интерес да се спасат меѓусебно од одговорноста за Кочани, Модуларната Болница во Тетово, Беса Транс и Дурмо Турс и другите трагедии и скандали кои се случија во земјава“, истакнуваат од оваа партија.
Овој договор, како што велат е целосно игнорирачки за Албанците, а воопшто не ги третираат ни нивните албански „партнери“ во Владата.
Овој договор, според Алијанса за Албанците е и против граѓаните, по секоја цена да ја сокријат вистината од нив, да го заробат системот, да инсталираат диктатура како што одамна ја заробија и македонската опозиција и да го уништат секое досегашно достигнување.
По оваа средба, што ќе биде со повторното судење за трагедијата со Модуларната болница во Тетово, кога најодговорниот човек за таа болница ќе го води реформскиот процес во име на „правдата“, прашуваат од оваа партија.
Македонија
Струјата во модуларната болница ја спровеле две неквалификувани лица од тетовската болница, според Шаќири

Денеска во Основниот суд Тетово траеше главната расправа во судскиот процес за обвинетите Флорин Бесими и Артан Етеми како и правното лице ЈЗУ Клиничка болница за кривично дело „тешки дела против општата сигурност“, за пожарот во модуларната болница во која животите ги загубија 14 лица.
Сослушани беа вешти лица кои во текот на истрагата изработиле вештачења.
Според првоовластениот судски вештак по електротехника Ирфан Шаќири кој пред судот образложи дека по наредба на Јавно Обвинителство извршил вешт наод за можните индиции за појава на пожарот во објектот, целокупната постапка за доведување на електрична енергија од трафостаница до модифицираниот објект наречен модуларна болница бил направен од две неквалификувани лица, вработени во Клиничка болница.
„Високата температура довела до согорување на изолацијата од кабелот и создавање на пламен, посочи Рубин Бошковски од Министерството за внатрешени работи кој извршил форензичко испитување.
Според него при вештиот наод утврдиле настанување на механичко оштетување на продолжителниот кабел поради нагмечувања или превиткување, на кој бил приклучен дефибрилатор.
Кажа и дека не биле евидентирани противпожарни апарати во самата болница.
Сведочеа и професори од Технолошко-металуршкиот факултет кои ги испитувале материјалите од кои е составена модуларната болница.
„Материјалите за изработка на префабрикуваниот контејнер ги задоволуваат барањата според спецификацијата на Министерството за здравство и истите се анализирани според процедури за соодветни својства за што гарантирам, кажа професорката Анита Грозданова.
Одбраната по сослушувањето на вештите лица побара да се сослушаат и вештите лица од Германија кои имаат изработен извештај. Судијата Реџеп Муса оцени дека според насоките на повисокиот Апелациски суд предлогот на одбраната се одбива.
„Постојат доволно докази за околности на настанот, посочи судијата.
Поради истекување на работното време, тој ја прекина главната расправа и истата ја закажа за 8 април кога се предвидува да се читаат писмените докази од одбраната.