Нова градинка на површина од 312 м2 на 2 нивоа ќе добие Крњево 2 според новиот ДУП, кој го донесе општинскиот Совет на последната 26. седница. Градинката ќе биде со развиена површина од 623 м2 на градежна парцела од 728 м2. Според важечкиот ДУП од 2012 година, на оваа локација не е предвиден објект за здравствено-социјална заштита – детска градинка иако бројот на жители е околу 7.764 во двата дела на Крњево. Оваа градинка воедно би била и прва градинка во населбата земајќи го делот од Крњево 2, источно од Универзитетот, а западно од предвидената траса на булеварот Крушевска Република, известува Општина Центар.

„Измените што се направени во однос на важечкиот план имаат значително подобрување во новиот ДУП. Една од нив е новата градинка, која ја планираме во Крњево 2, со која ќе го решиме горчливиот проблем на граѓаните. Со години жителите од овој реон децата ги носат на згрижување во градинки во соседните населби за што по 12 години, конечно, го донесовме новиот ДУП, со кој ги скратуваме маките на родителите. Воедно, новата градинка значително ќе ги намали и листите на чекање за упис во претшколските детски установи, а со градинката што ја планираме и во Маџир Маало ќе обезбедиме место за згрижување на сите дечиња во Центар“, вели градоначалникот на општина Центар, Горан Герасимовски.

Како што соопшти Општината, во новиот ДУП Градска четврт ЦС 07 – Крњево 2 предвидено е намалување и на станбената развиена површина во споредба со стариот план.

„Според актуелниот ДУП од 2012 година се предвидува домување за 4.460 жители, а во новиот е намалена на површина соодветна за 2.881, со што на државното неизградено земјиште се добива простор за повеќе јавни намени за граѓаните. Во однос на зеленилото, наместо 1 мал локален парк од 483 м2, во новиот ДУП се вцртани 4 мали локални паркови, на вкупна површина од 1.624 м2“, се додава во соопштението на Општина Центар.