Годинава на полигонот Криволак предвидено е да се одржат седум меѓународни вежби, со учество на 5.200 припадници на сојузничките армии како и на Армијата на Северна Македонија.

Од Министерството за одбрана информираат дека најголема меѓу нив е вежбата SWIFT RESPONSE – 22, на која е најавено учество на речиси 4.000 учесници од армиите на САД, ОК, Италија, Франција, Црна Гора, Албанија и од Северна Македонија.

Реконструкцијата на АП „Криволак“ почна во 2020. Се работи на зачувување на постојната и воспоставување нова патна инфраструктура, а во овој период се градат, реконструираат и се санираат објекти, санитарни јазли и пречистителни станици.

Во периодот што следува е предвидена набавка на нови 32 контејнера за сместување, со што ќе се зголеми сместувачкиот капацитет на полигонот.

„Припадниците на Инженерискиот баталјон во изминатиот период самостојно работеа на пробивање нови патишта за изградба на обиколницата на полигонот Криволак, но и на реконструкција на постојната инфраструктура и внатрешно поврзување со цел да се обезбеди комплетно патно поврзување на полигонот во вкупна должина од 75 километри. Со поддршка на 15. Инженериски баталјон на Армијата на САД, Инженерискиот баталјон на Армијата минатата година работеше на изградба на нови содржини, полигони со подвижни и неподвижни цели за оклопни возила, полетно-слетна патека за беспилотни летала, магацин за складирање цели, сѐ со цел овој наш ресурс да стане еден препознатлив НАТО-ресурс за обука и тренинг“, велат од Министерството.

Министерката Радмила Шекеринска денеска заедно со претставници од Генералштабот и Армијата и претставници од Амбасадата на САД ќе бидат во посета на армискиот полигон и ќе направат увид во реконструктивните активности.