Македонија
Многу од змиите на Водно или покрај реките не се отровни и не се опасни за луѓето, укажуваат еколозите
Повеќето од змиите што граѓаните ги среќаваат на Водно или покрај реките и водата не се отровни и не се опасни за здравјето на луѓето, велат од Македонското еколошко друштво (МЕД) по објавата за поголемо присуство на змии во околината на Скопје.
Друштвото потсетува за корисната улога на овие животни во природното контролирање на глодачите, кои се дел од нивната главна исхрана.
Во Македонија постојат 16 видови змии, од кои само 3 се отровни. Единствено, поскокот може да се сретне во урбани средини, а шарката и степската лутица (види фото) се присутни само на надморска височина поголема од 1.500 м, и тоа само на некои планини во земјата.
Многу смокови се шарени, па често погрешно се нарекувани шарки. Единствената отровница која е широко распространета кај нас е поскокот, кој лесно се препознава по рогот на врвот од главата, шарите во форма на баклави на грбот (обоени во разна варијација на црно, сиво, црвено, кафеаво, портокалово, жолто – видете го краткото видео тука) и големината – поскоците ретко достигнуваат должина поголема од 70 см, но најчесто се среќаваат единки од приближно 50 см. Доколку змијата е подолга од 1 м, таа е безопасен смок. Во Македонија има дури 11 видови смок, една боа (малечка несмасна змија, која главно живее под земјата и може да се сретне само во крајните југоисточни делови од државата) и една црвовидна змија, која е целосно безопасна и секој лаик на прв поглед би помислил дека е црв.
Според Драган Арсовски, биолог од МЕД, доколку се постапи на правилен начин, дури и при каснување од змија отровница луѓето би поминале без компликации:
„Доколку се случи каснување од поскок, ако човекот нема други здравствени проблеми и се јави за медицинска помош истиот ден, тој би поминал без никакви компликации за здравјето.“, изјави Арсовски.
Фотографии, точно распространување низ Македонија, како и повеќе за биологијата, екологијата и за степенот на засегнатост на змиите во нашата држава може да најдете на првата национална црвена листа на Македонија на следната веб-страница: http://redlist.moepp.gov.mk/pregled-na-vidovi/ (влечугите се наоѓаат на дното од листата)
Инаку, напролет ладнокрвните влечуги излегуваат од долгиот зимски сон (хибернација) и се најактивни бидејќи тогаш е нивниот период на размножување, односно тие се во потрага по партнер. Затоа, овој период се и најчести средбите со овие животни. Еден од најраширените митови за змиите е дека се најактивни кога е најтопло. Змиите, како и најголемиот број влечуги, не може да ја контролираат сопствената температура, па тоа го прават преку сончање или барање засолниште. Кога е многу ладно, тие може да замрзнат, па затоа се засолнуваат и хибернираат, а кога е претопло, тие се во опасност од прегревање и смрт поради што исто така бараат засолниште и во екстремно топли периоди може целосно да ја намалат својата активност и да влезат во т.н. летна хибернација, односно естивација.
Налето змиите најчесто може да ги видиме само непосредно по изгрејсонце (помеѓу 5 и 7 часот), а некои безопасни видови се исто така активни на зајдисонце или дури и навечер. Змиите најчесто веднаш бегаат при средба со човек. Тие немаат изострено сетило за вид, па понекогаш може да се случи да бегаат во правецот на самиот човек и ова може да биде збунето со напад. Отровниците, како што е поскокот, најчесто се вкочануваат при средба со човек. Во овој случај слободно земете долг стап и отстранете ги од просторот. Во Европа не постојат змии што активно напаѓаат за одбрана на својата територија или гнездо – каснувања се случуваат исклучиво кога ненамерно ќе се приближиме (на пр,. при згазнување со боса нога или при земјоделски активности во близина на земјата или на ниски гранки, каде знаат да се камуфлираат добро).
Како и поголемиот дел од биодиверзитетот, така и змиите не се снаоѓаат добро во урбани средини и лесно завршуваат под тркалата на колите. Така, средбите со змии се среќаваат во делови од градот кои се блиску до природа (на пр., подножјето на Водно или приградски места), каде што нема голем метеж, но човечката активност може да привлече поголем број глодачи, кои се нивен оброк.
„Всушност, може да се каже дека не се змиите оние што доаѓаат во нашите градови, туку со градежната експанзија ние навлегуваме во нивните природни живеалишта, како што е Водно. Во централните делови од градовите понекогаш може да се сретнат водни змии, особено покрај реки и бари. Другите змии, доколку залутаат во овие делови од градот, ретко преживуваат доволно долго. Водните змии се всушност смокови, кои се исхрануваат со риби и водоземци и затоа не е неочекувано да се сретнат на кејот во Скопје, особено покрај градскиот парк, и тие се целосно безопасни“, додава Арсовски.
Змиите играат клучна улога во нашите екосистеми, првенствено како контрола на популациите на глодачите (како што се глувците) и се екстремно корисни. Голем број змии се хранат со други змии, односно ги контролираат нивните популации. Ова е точно и за поскокот, кој често се исхранува со младите од други змии. Така, убивањето на змиите, всушност, често би значело и зголемување на популацијата на друг вид змија.
Нема никаков научно докажан ефект од продуктите што се рекламираат и продаваат како средства против змии и тие може само да предизвикаат загадување на околината, така што не ги препорачуваме. Во Македонија не постои сервис за отстранување змии, главно бидејќи, едноставно, не постојат видови што се многу опасни.
Инаку, МЕД ги проучува природните популации од овие животни. Препорачуваат да го чувате вашиот двор уреден како не би создале места, кои змиите би ги користеле како засолниште, а кога се движите во природа, да имате стапче и соодветни планинарски обувки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Вреди“: Ноќ што испиша историја, Филхармонијата го воздигнува името на земјата во Виена
Вчера бевме сведоци на голем културен успех на нашата земја, историскиот концерт на Филхармонија на Македонија во Златната сала на Музикферајн во Виена, една од најпрестижните сцени за класична музика во светот.
Овој концерт, кој се одржа во величествена и емотивна атмосфера, го демонстрираше високото уметничко ниво и професионализам на нашата филхармонија, која со своите брилијантни интерпретации на делата на композиторите Бете Илин, Сони Петровски, Смокварски и Дворжак, го воздигна името на нашата држава и нашата култура во срцето на Европа, велат од „Вреди“.
„Вреди“ изразува посебна благодарност до директорот на Филхармонијата, Мустафа Имери, за визионерското управување, посветеноста и напорната работа што ја претворија Филхармонијата во примерна институција за успех и меѓународна културна соработка.
Посебна благодарност им упатуваме на Министерството за култура и туризам, предводено од министерот Зоран Љутков, државниот секретар Марија Ѓоргова, амбасадорот на Република Северна Македонија во Виена, Освит Росоклија и националниот координатор за интеркултурализам, Абаз Селмани, за нивната поддршка во реализацијата на овој важен национален проект.
Ова е пример за тоа како преку институционална соработка, професионализам и почитување на уметноста, нашата земја може достојно да се претстави пред светот“.
Културата, како што додаваат, е мостот што нè обединува и го зајакнува нашиот идентитет, а овој концерт во Виена беше јасен доказ дека Северна Македонија знае да го зборува јазикот на уметноста достоинствено и со светска класа.
„Вреди“ изразува благодарност до сите уметници, членови на оркестарот, диригентот Јерухам Шаровски, солистите Ана и Игор Дурловски и сите оние што придонесоа за оваа незаборавна вечер што ќе остане како златна страница во историјата на нашата култура.
Македонија
Димитриевски најави нови паркинзи, зелени површини и детски катчиња на повеќе локации во Куманово
Комплексот згради и просторот околу него на булеварот „Октомвриска револуција“ ќе добие сосема нов изглед многу скоро во наредниот период. Ова го вети кандидатот за градоначалник на Куманово и лидер на Движењето ЗНАМ – За наша Македонија, Максим Димитриевски. Тој најави низа проекти насочени кон уредувањето на јавниот простор, подобрување на инфраструктурата и зачувување на зеленилото во тој дел од градот.
„Во следниот период сите партерни содржини околу вашите згради ќе бидат уредени, воедно ќе бидат и проширени сите постоечки паркинг простори, уредно обележани, како составен дел од втората зона за паркирање, а која ќе ги опфати и месните заедници „Панче Пешев“ и „БС Гојчо“ што ќе биде целосно бесплатна за сите што се со место на живеење на оваа адреса“, нагласи Димитриевски.
Посебен акцент во своето обраќање, Димитриевски стави на зачувувањето на зелените површини и спречувањето на прекумерната урбанизација. „Сите зелени површини вклучувајќи го и „Ореов лад“, ќе бидат задржани со акцент дека нема да се дозволи урбанизација на тој потег. На таа локација ќе се изгради нова детска градинка и дополнително нови зелени површини, рече Димитриевски.
Истовремено, најави дека кај локалитетот Табакана ќе се отстранат времените градби и ќе се направи нов паркинг простор, детско катче и повеќе зелени површини. Ист ќе биде пристапот и за просторот кај „Скара кај Жмара“, каде ќе се изгради и спортско-рекреативен комплекс и ново место за игра на најмладите, како и за комплексот К4 каде ќе никнат ново катче за најмалите, нови зелени површини и проширен паркинг простор.
Затоа, потенцираше тој, ќе се отворат нови градежни зони каде инвеститорите ќе може да градат, а градот да се шири надвор, бидејќи урбаниот развој на Куманово мора да биде балансиран меѓу изградбата и зачувувањето на просторот за живот.
Упати и повик до граѓаните за масовен одѕив на 2 ноември на вториот круг од изборите. „Ве повикувам масовно да излезете в недела и да ја дадете вашата поддршка за мене – вашиот кандидат Максим Димитриевски, затоа што Куманово заслужува континуитет и да продолжи да расте и да се развива“, порача Димитриевски.
Македонија
(Видео) Трајановски: Поддршка за млади претприемачи
Младите ќе бидат во фокусот на мојата работа како градоначалник на општина Аеродром, истакна Александар Трајановски, кандидат за градоначалник на општина Аеродром.
„Затоа предвидуваме формирање посебна програма што ќе нуди финансиска поддршка на млади лица до 29 години што сакаат да започнат сопствен бизнис. Грантови за стартапи до 4 000 евра по апликација. Обуки за претприемаштво, дигитален маркетинг и бизнис-планирање. Консултантски услуги за пристап до национални или европски фондови. Целта на оваа мерка е да се намали невработеноста кај младите и да се зголеми бројот на активни млади претприемачи.
Вие сте клучот на промените, затоа на 2 ноември да се избориме за подобра иднина, и за општина која ќе биде Ваш партнер“, порача тој.

