Македонија
Градоначалникот на Гостивар бара пократок полициски час и отворање на кафеаните

Градоначалникот на Гостивар, Арбен Таравари, ќе му предложи на Централниот штаб, полицискиот час во работни денови да почнува во 21 часот, а за викенди и државни празници од 15 часот. Исто така, градоначалникот предлага кафеаните да работат според моделот „земи и оди“ (шалтерска форма), исто како локалите што продаваат храна.
Во Гостиварскиот Регион регистрирани се три нови случаи на коронавирус во последните два дена, со што вкупниот број е 17.
„За жал, имаме еден починат, излекувани се 6 и имаме 10 активни случаи, од кои 6 во општина Гостивар и 4 во општина Врапчиште, а вкупно се тестирани 202 лица“, информира Таравари во својство на претседател на Меѓуопштинскиот кризен штаб.
Тој истакна дека ситуацијата е релативно стабилна, но дека претпазливоста на граѓаните и почитувањето на препораките од Владата треба уште повеќе да се зголемат, особено по олеснувањето на мерките за изолација.
Од Општината соопштија дека една од препораките што произлегле од денешниот состанок била да му се предложи на Централниот штаб полицискиот час во работни денови да почнува во 21 часот, а за викенди и државни празници од 15 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.