Македонија
Градоначалникот Ѓорѓиевски почна со проектот за реконструкција на улици во Пинтија заборавени повеќе од три децении
Во рамки на роденденската седмица што се одвива во Општина Кисела Вода и во која синоќа беше затворено четиридневното Културно лето, секојдневно се реализираат и поголеми инфраструктурни проекти.
Градоначалникот Орце Ѓорѓиевски денеска ја посети населбата Пинтија каде започнува реконструкција на патна инфраструктура на површина од преку 5.000 квадратни метри.
Како што соопштија од Општината, станува збор за улиците „Саса 12“ и „Јабланица“ со сите нивни краци, улици кои што не биле обновени триесет години.
„Започнуваме со еден поголем проект за реконструкција на улици во Пинтија кои биле заборавени повеќе од три децении. Во периодот што е пред нас ќе работиме на улиците “Саса 12” со сите нејзини краци и на сите краци на улицата ‘Јабланица’. Ќе се врши асфалтирање и поплочување со павер елементи на површина од над 5.000 квадратни метри. Како што ветив, патната инфраструктура низ целата општина, до крајот на мојот мандат, а и порано од тоа, ќе биде обновена со што ќе овозможиме одлични услови за одвивање на сообраќајот и ќе го унапредиме квалитетот на живот во сите населби и населени места низ општина Кисела Вода“, изјави градоначалникот Орце Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пред најавеното невреме Кисела Вода ги чисти атмосферските шахти
Со цел да се превенираат можни штети од најавеното големо невреме за денес, Општина Кисела Вода презема активни мерки за чистење на атмосферските шахти.
Тимовите на општината се на терен и интензивно работат на чистење на сите шахти, со цел да се обезбеди нормален проток на вода и да се спречат евентуални поплави. Како локална самоуправа редовно спроведуваме активности за одржување и чистење на јавните површини, но се делува и вонредно, во услови кога имаме најава за можно невреме , како што е случајот денес.
– Како градоначалник на општина Кисела Вода, сакам да ги уверам нашите граѓани дека правиме сѐ што е во наша можност за да ги заштитиме од евентуалните последици на најавеното невреме. Превенцијата е клучна и затоа денес ги чистиме сите атмосферски шахти за да спречиме поплави и други евентуални штети. Сите тимови на општината се мобилизирани и подготвени да реагираат на предизвиците кои би можеле да се појават за време на најавеното невреме. Наша прва и најважна обврска е да ги заштитиме нашите граѓани и нивните имоти. Ве уверувам дека ќе направиме сѐ што е во наша можност да го минимизираме ризикот од поплави и други штети-изјави градоначалникот Ѓорѓиевски.
Македонија
Средба Тошковски – Вал: Сериозна посветеност на модернизација и професионализација на полициската служба
Денеска министерот за внатрешни работи Панче Тошковски во Министерството за внатрешни работи оствари работна средба со амбасадорот на Мисијата на ОБСЕ во Скопје, Килијан Вал.
Тошковски се заблагодари за постојаната поддршка и посветеност на Мисијата на ОБСЕ во напорите за модернизација на полициската служба, особено во делот на професионалното полициско работење, проекти за обука на полициските службеници и модернизирање на опремата. Тошковски ја потенцира решителноста за ефикасна борба против организираниот криминал и високата корупција, како еден од основните столбови на новата Влада, како и потребата од градење модерна полициска служба која доследно ќе ги следи начелата на демократско полициско работење, но и служба која ќе се базира на начелото на заслуги и интегритет.
Осврнувајќи се на неколку поенти како главен фокус на активностите на Мисијата на ОБСЕ, амбасадорот Вал ја потенцира посветеноста и заложбата на мисијата на оваа меѓународна организација за унапредување на работните процеси во министерството, во содејство помеѓу МВР и Мисијата на ОБСЕ. Тошковски и амбасадорот Вал потенцираа дека и во иднина соработката и комуникацијата ќе биде на високо ниво.
Македонија
По најавите за невреме: зголемена внимателност и можност од локални проблеми со хидролошката состојба во одделни региони, препорачуваат надлежните
Соодветно најавата на синоптичарите дека во текот на ноќта на повеќе места ќе биде нестабилно со пороен дожд и грмежи и дека локално ќе има невреме со интензивен пороен дожд, силен ветер и град, во секторот хидрологија е направена анализа на резултатите од достапните модели и е дојдено до заклучок дека доколку процесите бидат интензивни и доколку на одредени места локално за кратко време навранат поголеми количини дожд, можно е да дојде до забрзано истекување на вода по падините, малите реки и суводолиците, а на одредени локации можно е да се јават локални проблеми, предупредуваат од секторот за хидрологија при Министерството за земјоделство.
„Достапните модели најавуваат појава на врнежи на целата територија од државата, почвите и теренот е релативно влажен, а во текот на вечерните и ноќните часови ќе има потреба од внимателност кај следните поголеми и помали региони:
– Скопски, Кумановски, Паланечки, Кратовски, Пробиштипски, Каменички, Кочански, Светиниколски, Штипски, Струмички, Велешки, во реоните на Групчин, Соње, Сопиште, но секако можни се и отстапувања од најавените региони и реони“, се истакнува во соопштението.
Препорачуваат внимателно движење покрај помалите реки и суводолиците и места на кои има опасност од одрони и свлечишта.