Македонија
Градот Скопје ги додели признанијата за најуспешните спортисти, тренер и екипа
Градот Скопје ги додели признанијата на најуспешните спортистки, спортисти, тренер и спортска екипа на Град Скопје за 2019 година. На доделувањето на овие престижни награди присуствуваше заменик – градоначалникот на Град Скопје, Енвер Малиќи.
„Денеска ја продолжуваме традицијата на Град Скопје – доделувањето на годишните награди за најуспешните во областа на спортот, коишто со своите постигнувања ја одбележуваат годината што изминува. Од срце ви честитам за постигнатите резултати за почит, резултати за голема афирмација на главниот град и на Република Северна Македонија. Како што доликува, вие и понатаму ќе ја имате нашата поддршка – финансиска, логистичка и морална, за да се радуваме и да ги славиме спортските успеси“, рече Малиќи.
Тој додаде дека покрај вложувањата во врвниот, рекреативниот, масовниот и во спортот за лица со посебни потреби, Град Скопје најмногу ќе вложува во средноучилишниот спорт.
На денешната свеченост што се одржа во просториите на Град Скопје беа доделени следните признанија:
За најуспешен спортист во категоријата на лица со посебни потреби признанија добија:
Марио Мицковски – Специјална олимпијада
1.место во пливање – 50 м. слободен стил и 1.место во пливање – 25 м. грбно на Летни олимписки игри на Специјална олимпијада, и
Стефан Прентовски – Специјална олимпијада
1.место во пливање – 50 м. слободен стил на Летни олимписки игри на Специјална олимпијада.
Во категоријата најталентиран млад спортист – кадет за 2019 година наградата отиде во рацете на Александра Симева – Тениски клуб „Тенис парк“, победник на два големи меѓународни турнири.
За Најуспешни 5 спортисти во младинска категорија (мажи и жени) прогласени се:
5. Миа Тодорова – Кикбокс клуб „Шампион“, 3.место на Светско првенство;
4. Ангела Мојсовска – Карате клуб „Макпетрол“, 5.место на Светско првенство – У 21 и 3.место на Европски универзитетски игри;
3. Филип Додевски – Таеквондо клуб „Бутел“, 1.место на Светско клупско првенство и 3.место на Европско првенство – У 21;
2. Петар Спасеновски – Карате клуб „Макпетрол“, 1.место на Европско првенство; и
Бесир Алили – Боречки клуб „Лирија“, 1.место на Европско првенство за кадети.
За категоријата најуспешен спортист – странец кој настапува во екипа од Скопје признанието отиде во рацете на Даинис Криштопанс – АД Ракометен клуб „Вардар“, 1.место Лига на шампиони на Европа.
За Најуспешна спортска екипа од Скопје е прогласена АД Ракометен клуб „Вардар“, 1.место во Лига на шампиони на Европа сезона 2018/2019; 1.место во СЕХА Лига, 1.место во Женска регионална СЕХА Лига, 2.место во ЕХФ Лигата на Шампионите.
Во категоријата Најуспешен тренер признанието отиде во рацете на Суфијан Исмаили – Боречки клуб „Лирија“, 1.место на Европско првенство за кадети и 5.место на Европско првенство за сениори.
Во категоријата Најуспешни 10 спортисти во сениорска категорија (жени и мажи) признанија добија:
5. Сајра Морина – Карате клуб „Кеикс“
Три први места на WKF меѓународни турнири;
1.место на балканскиот турнир Шампионат
4. Дрита Ислами – Атлетски клуб „Работнички“
1.место на 400 м. на Европско првенство – 3 лига
3.Адријана Поп Арсова – Маратон Клуб Делта
3.место на Балканијада во маратонско трчање
2. Анамарија Георгиевска – Таеквондо клуб „Бутел“
1.место на Балканијада
1. Сара Радичевска – Карате клуб „Макпетрол“
2.место на Европски универзитетски игри
5.Петар Заборски – Карате клуб „Макпетрол“
2.место на Европски универзитетски игри
4.Евгениј Поп Ацев – Пливачки клуб „Вардар“
1.место на светска ранг листа во маратонско пливање;
6.место на светска ранг листа на 10 км – олимписка дисциплина
3.Елмедин Сејфулахи – Боречки клуб „Лирија“
4.место на европско сениорско првенство
2.Могамедгаџи Нуров – Боречки клуб „Вардар“
место на светско првенство и освоена олимписка норма за „Токио 2020“
1. Стојанче Стоилов – АД Ракометен клуб „Вардар“
1.место во Лига на шампиони на Европа и 1 место во СЕХА лига.
Признанијата за најуспешните спортистки, спортисти, тренер и спортска екипa за 2019 година ги доделува Градот Скопје, а технички организатор на манифестацијата е Сојузот на спортови на Скопје
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поради јазични бариери одложено продолжението на конститутивната седница на работната група за реформи во изборното законодавство, кажа Филков
Поради технички причини денешната конститутивна седница на работната група за реформи во изборното законодавство беше одложена за следната недела. Министерот за правда Игор Филков изјави дека членовите на работната група не се впуштиле во материјална расправа затоа што прво треба да се утврди дневниот ред.
,,Иако денес требаше да биде одржана првата конститутивна седница на работната група за реформи во изборно законодавство на која требаше да се избере претседател, како и да се донесе предлог-деловник за утврдување на методологијата и динамиката на работење, сепак тоа не се случи поради одредени јазични бариери. Од дел од присутните претставници на политичките партии беше побарано материјалите да бидат преведени за полесно да можат да се разберат’’, рече Филков.
Филков се надева дека следната недела членовите ќе се усогласат за термин , ќе се избере претседател на работната група и ќе се отпочне со работа каде што сите ќе имаат можност да ги дадат своите предлози и сугестии за реформите во изборното законодавство.
Македонија
Сиљановска-Давкова-Грлиќ Радман: потврдена подготвеноста на Хрватска да придонесе кон забрзување на македонскиот евроинтеграциски процес
Претседателката Гордана Сиљановска-Давкова денеска го прими Гордан Грлиќ Радман, министер за надворешни и европски работи на Република Хрватска, кој престојува во официјална посета на земјава.
Обајцата го потврдија цврстото македонско-хрватско пријателство коешто двете земји го негуваат повеќе од 3 децении, втемелено на взаемна почит и разбирање и реализирано низ политички дијалог и конструктивна соработка.
Претседателката искажа искрена благодарност за хрватското отворено и континуирано разбирање и поддршка на македонската интеграција, како и на принципиелниот став на Хрватска дека проширувањето на Унијата со Западен Балкан треба да се темели на реални заслуги, без билатерализација и вето.
Министерот Радман ја потврди подготвеноста на неговата држава да придонесе кон забрзување на македонскиот евроинтеграциски процес во рамките на Копенхашките критериуми, потенцирајќи дека македонската држава доби статус на кандидат за членство во ЕУ во март 2005 година, односно неколку месеци пред Хрватска.
Соговорниците очекуваат дека партнерството дополнително ќе се зајакне со Договорот за стратешка соработка со Владата на Република Хрватска, како и со претстојната официјална посета на Претседателката Сиљановска-Давкова на пријателска Хрватска, кон крајот на март.
Македонија
Уапсен тетовец: осомничен за лажни дојави за поставени бомби во образовни институции
Утрово во 09:10 часот во с.Палатица, тетовско, полициски службеници од одделот за сузбивање на организиран и сериозен криминал при Министерството за внатрешни работи во координација со полициски службеници од СВР Тетово го лишиле од слобода М.Р.(18) од село Палатица.
Тој се сомничи дека во повеќе наврати испраќал електронски пораки на повеќе образовни институции во Тетово дека во институциите има поставено експлозивни направи.
Полицијата соопшти дека по преземени мерки и извршени проверки е констатирано дека сите дојави за поставени бомби биле лажни.
Денеска, со сдуска наредба, бил извршен и претрес во неговиот дом во селото, при што биле одземени повеќе електронски уреди.
Лицето било приведено во полициска станица и по целосно расчистување и документирање на случаите, во координација со јавен обвинител против него ќе биде поднесена соодветна пријава.

