Град Скопје во соработка со МКЦ и со Македонската филхармонија продолжува да работи на обезбедување атрактивни содржини кои ќе ја збогатат летната културна понуда во градот. Програмата за вечерва и за утревечер на прес-конференција ја претставија градоначалникот Шилегов, директорот на МКЦ, Русе Арсов, и директорот на Македонската филхармонија, Виктор Илиески.

„По емитувањето на филмот „Исцелител“ на отворена сцена и настапот на реномираниот џез-музичар Феми Кути заедно со Македонската филхармонија, вечерва во Градскиот парк на отворено ќе се емитува документарниот филм Avec l’amour, прекрасно филмско остварување и вистински предизвик граѓаните да дојдат во Паркот. Утревечер, пак, QUEEN REAL TRIBUTE, еден од најдобрите светски „Квин“ трибјут-бендови, заедно со оркестарот на Македонската филхармонија и хорот на Македонската опера и балет, кај „Школка“ ќе ги изведе најголемите хитови на една од највлијателните рок-групи на сите времиња „Квин“. Ги поканувам моите сограѓани да дојдат и да уживаат во овој единствен од ваков тип настан во нашиот град“,  рече градоначалникот Шилегов.

Вечерва проекцијата на филмот Avec l’amour започнува во 22 часот во Градскиот парк, на потегот зад споменикот на Гоце Делчев. Утревечер почетокот на концертот е закажан за 21 часот на бината пред „Школка“.

„Како и секогаш, по вакви настани, отпадот го чистиме сами, секако со помош од Град Скопје, Македонската филхармонија и од „Пакомак“. Градот Скопје работи на враќање на загубениот сјај и приматот на институциите на културата и културните манифестации. Граѓаните заслужуваат Скопје да се најде на светските мапи на врвни културни настани и случувања“, нагласи Шилегов.