Македонија
Град Скопје: Акцијата за сечење суви дрвја во Карпош следеше по барање на жителите

Град Скопје испрати соопштение преку кое ја информира јавноста дека сечата на дрвјата во Карош 4 била спроведена по барање на жителите и согласно со сите законски постапки.
„Денеска екипите на јавното претпријатие ‘Паркови и зеленило’ извршија акција во населбата Карпош 4, каде што на терен исекоа и извршија кастрење на повеќе дрвја. Истите се отстранети на барање на жителите на околните згради, кои до Секторот за комунални работи на Град Скопје на ден 26.4.2018 година доставија барање за сечење на сувите стебла околу зградата на улица Волгоградска број 1, како и за обновување на зеленилото околу овој објект. Стручните служби на Град Скопје излегоа на терен и извршија увид, каде што констатираа дека станува збор за поголем број дрвја од различни видови, кои се со надмината физиолошка зрелост, со суви и кршливи гранки. Овие дрвја претставуваат опасност за минувачите, паркираните возила и самиот објект и за истите Градот Скопје издаде решение за нивно сечење“, соопшти Град Скопје.
Оттаму велат дека за преостанатите дрвја, кои се со широкоразградени крошни, со своите гранки ја удираат зградата и паркираните возила, причинуваат материјална штета и потенцијална опасност за минувачите, Градот Скопје издаде решение за нивно кастрење.
„Дополнително, сакаме да ја информираме јавноста дека овие дрвја и во минатото предизвикуваа опасност и штета, а пред неколку години поголеми гранки кршејќи се предизвикаа поголема материјална штета на паркираните возила. За овој и сите слични случаи беше поведена судска постапка, и притоа јавното претпријатие ‘Паркови и зеленило’ мораше да исплати средства и да ја надомести нанесената штета“, велат од Град Скопје и додаваат дека како и досега, за секое исечено дрво, на истата локација или во непосредна близина ќе биде засадено ново дрво.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се навршуваат 24 години од загинувањето на бранителите кои нагазнаа на мина кај Љуботенски бачила

На повеќе локации во Скопје денеска ќе бидат одбележани 24 години од загинувањето на осуммината бранители, припадници на резервниот состав на Армијата кои загинаа во 2001 година кај месноста Љуботенски бачила.
Делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев ќе положи венци со свежо цвеќе пред спомен обележјето на паднатиот бранител Томислав Настевски во Општина Ѓорче Петров, споменикот на паднатите бранители во село Волково, споменик на загинати бранители во село Љубанци и спомен-плоча во касарната „Илинден“.
Делегација на Собранието во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето поставено во чест на загинатите бранители во село Љубанци.
Општина Ѓорче Петров организира оддавање почит пред спомен-чешмата на Томислав Настески – Бумбар, во урбана заедница Мирче Ацев (ул. „Ѓорче Петров“) додека централна комеморативна манифестација ќе биде пред споменикот на загинатите бранители во Волково.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.
Македонија
Летните одмори направија редици на Табановце

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез во државата е околу еден час, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Внимавајте на сонце, денес многу топло со температури до 39 степени

Времето денеска ќе биде сончево и многу топло. Ќе дува слаб до умерен ветер од источен и североисточен правец.
Минималната температура ќе биде во интервал од 12 до 21, а максималната ќе достигне од 32 до 39 степени.
Во Скопје, сончево и многу топло со слаб до умерен променлив ветер.
Минималната температура ќе се спушти до 19, а максималната ќе достигне до 39 степени.
Под влијание на многу топла воздушна маса од југ во текот на наредната седмица времето ќе биде претежно сончево и многу топло.
Дневната температура насекаде ќе биде над 30 степени, а наместа ќе достигне и 40 степени.