Министерот за култура и туризам, Зоран Љутков, денеска, во Порта „Македонија“ се обрати на состанокот на генералната асамблеја на Европската рута на светите Кирил и Методиј.

Во своето обраќање министерот истакна дека Македонија не само географски туку и духовно и културолошки е длабоко вградена во мисијата на светите браќа и нивните ученици.

„Реализацијата на генералната асамблеја токму овде е симболично и значајно бидејќи Македонија не само географски туку и духовно и културолошки е вградена во мисијата на светите браќа Кирил и Методиј, како и на нивните ученици. Делото на солунските браќа, што го постави темелот на словенската писменост и духовност, длабоко е врежано во нашето културно наследство и во колективната меморија на македонскиот народ. Овде, на овие простори, нивната мисија не само што беше прифатена – таа продолжи да живее, да се шири, да се пренесува со љубов од генерација на генерација. И, денес, како дел од оваа културна рута, ние не го чуваме само нивното наследство, туку и го живееме“, рече Љутков.

Тој посочи дека Министерство за култура и туризам со голема почит и ентузијазам ќе продолжи да партиципира и да ги поддржува рутите на Советот на Европа.

„Нашата земја е посветена на зачувувањето и на афирмирањето на ова културно богатство и од тие причини Министерството за култура и туризам ја поддржува и партиципацијата на Македонија во: Винската културна рута, Рутата на римските императори и Дунавската римска рута. За афирмација на рутите кај пошироката културна јавност, минатиот месец го реализиравме и форумот ‘Културните рути на Советот на Европа во функција на културниот туризам’, на кој учествуваа гости од земјата и од странство, од академскиот, туристичкиот, економскиот и од поширокиот културен сектор“, рече министерот.

Љутков истакна дека особено е значајно учеството на Институтот за македонска литература при УКИМ и на Институтот за старословенска култура од Прилеп во рамките на Европската културна рута на светите Кирил и Методиј, што ќе придонесе за значајна културна, научна и туристичка промоција на кирилометодиевското наследство нераскинливо поврзано со духовната почва на Македонија.

Со новиот закон за привремено и сезонско ангажирање лица, кој вчера беше изгласан во Собранието, работодавците ќе може да ги пријават своите сезонски или работници ангажирани на одреден период.

Како што појасни Бојан Стојаноски, пратеник од пратеничката група на ВМРО-ДПМНЕ и коалицијата „Твоја Македонија“, со ова се создаваат и услови работниците да добијат пензиски и здравствени придонеси за својот труд, а државата да ги наплати давачките што сега се во сивата економија.

„Она што особено радува е што лицата ангажирани во согласност со овој закон нема да изгубат веќе стекнати права, како социјална помош, надомест поради невработеност, семејна или старосна пензија, како и стипендија или правото на редовни студии. Во оваа законска категорија граѓани спаѓаат пензионерите, студентите, сезонските работници, а особено оние ангажирани во земјоделството, овоштарството, угостителството и во сервисните дејности, невработените, но и вработените, лица помлади од 18 години, кои ги исполнуваат условите за работа, како и странците со регулиран престој“, рече Стојановски.

Според него, ова иновативно законско решение предвидуваа софтверска платформа. Дигитален регистар, кој ќе ги спојува работодавецот, работникот и институциите, а притоа создава услови за ефикасно спроведување на законот.

Стојаноски додаде дека оваа платформа ќе биде финансирана со грант од Германија.

1.500 прехранбени производи поскапеа поради зголемувањето на ДДВ во време на владеењето на СДС, реагираат од ВМРО-ДПМНЕ на обвинувањата на СДСМ дека синдикалната кошничка поскапува, народот осиромашува, а власта не презема ништо.

„СДС останува на страната на криминалот и корупцијата. СДС единствено на чија страна останува е таа на инкриминираната нивна партиска елита. СДС не го интересира како живее народот, СДС го интересира каде Филипче и Заев ќе ги инвестира украдените пари. Седум години СДС ја пљачкаше државата и го осиромашуваше народот, ги деградираше институции и ја уништуваше економијата, додека неговата партиска елита се богатеше на грбот на граѓаните“, пишува во реакцијата.

Со украдените пари од државата и народот, велат од ВМРО-ДПМНЕ, сега градат облакодери од 50 ката по Дубаи, добиваат златни визи од таму и уживаат по нивните златни песоци и под палмите на топлите плажи.

„Додека елитата на СДС се богатеше, економијата се уништуваше, народот осиромашуваше така што околу 600 илјади граѓани оставија на работ на сиромаштија. СДС е партија во чие време на владеење до зголемија ДДВ на прехранбените производи од 5 на 10%, и со тоа директно влијаеја на поскапувањето на околу 1500. За разлика од минатото, сега граѓаните и бизнис секторот имаат партнер во владата предводена од ВМРО-ДПМНЕ. Заеднички се носат одлуки и мерки во интерес на сите засегнати страни.Платите и пензиите растат, се преземаат мерки за намалување на цените на производите, се инвестира во заживување на економијата“, пишува во реакцијата.

Од ВМРО-ДПМНЕ велат дека следи инвестициски циклус од околу шест милијарди евра во изградба на големи капитални инфраструктурни проекти, како што е изградба на брзата железница од Коридорот 10, кој директно ќе влијае на раст и развој на економијата кој ќе донесе раст на БДП и со тоа и подобар животен стандард.