Град Скопје со цел да ги стимулира жителите на Скопје да користат велосипеди распиша јавен повик за надоместување дел од трошоците на граѓаните на подрачјето на градот Скопје за купување велосипед. Со овој јавен повик Град Скопје на граѓаните што ќе купат велосипед од денот на објавувањето заклучно со 30.6.2019 година, ќе им надомести дел од трошоците направени при купување велосипед.

Средствата што Град Скопје ќе ги субвенционира се во износ од 50 отсто од вредноста на велосипедот, но не повеќе од 3.000 денари за лице, со вклучен персонален данок на доход.

Јавниот повик ќе биде реализиран по принципот прв дојден, прв услужен. Едно лице може да поднесе само едно барање за добивање субвенција за купување еден велосипед.

Барателот треба да ги исполни следниве услови:

– да е жител на Град Скопје (во општините: Аеродром, Бутел, Гази Баба, Ѓорче Петров, Карпош, Кисела Вода, Сарај, Центар, Чаир и Шуто Оризари);

– подносителот на барањето досега да нема добиено финансиски средства за набавка на велосипед од Град Скопје;

– велосипедот да го купи од денот на објавување до денот на завршување на jавниот повик (до 30.6.2019);

За надоместување дел од трошоците и докажување дека условите за учество на јавниот повик се исполнети, барателот до Град Скопје треба да достави:

– барање за субвенција за купување еден велосипед (барањето може да се подигне во архивата на Град Скопје или да се обезбеди од интернет-страницата на Градот: www.skopje.gov.mk);

– доказ за жителство во Град Скопје, со доставување копија на важечка лична карта на барателот;

– фотокопија од трансакциска сметка на барателот;

– изјава дека барателот досега нема искористено субвенција за купување велосипед од Град Скопје;

– доказ дека е извршено купување велосипед, и тоа оригинал фискална сметка или фактура со извод од деловна банка, со датум од денот на објавувањето до денот на завршувањето на јавниот повик;

Барањето за надоместок на дел од трошоците за купување велосипед, заедно со потребната документација, граѓаните во затворен плик ги доставуваат до соодветната комисија, преку архивата на Град Скопје, бул. Илинден бр. 82, секој работен ден од 9 до 15 часот.

Целиот јавен повик граѓаните може да ги видат на следната интернет-врска: www.skopje.gov.mk/Uploads/JavenPovik/Јавен%20повик%20Велосипеди%202019.pdf

Субвенционирањето на граѓаните за набавка на велосипеди е една од мерките на Град Скопје за промоција на велосипедот како рекреативно и превозно средство, чие користење има многу придобивки: финансиски е достапно, економски исплатливо и еколошко превозно средство, придонесува за намалување на сообраќајниот метеж, како и за намалување на загаденоста на амбиенталниот воздух.