Македонија
Град Скопје објави повик за финансирање проекти од областа на културата
Град Скопје објави јавен повик за сите заинтересирани правни субјекти, и тоа: установи од областа на културата, здруженија на граѓани и фондации, како и други правни лица што вршат дејности од оваа област за финансирање проекти и активности од областа на културата од интерес на градот Скопје. Овој повик е во рамки на проектот „Од Центарот кон периферијата: културата како алатка за социјален развој“.
Со цел да се обезбеди деконцентрација на културата и истата да се дисперзира на територија на Град Скопје, а притоа да се лоцираат неискористени јавни простори и јавна инфраструктура, чијашто реупотреба може позитивно да влијае и да го подобри социјалниот и културниот живот на жителите на градот Скопје, Град Скопје распиша јавен повик на кој ќе бидат доделени средства за реализација на проекти што ги остваруваат целите на јавниот повик.
Проектот ќе се реализира во текот на 2019 година, но не подоцна од 1 декември на отворени јавни простори и површини, како и во админстративни објекти што се во јавна надлежност: месни заедници, домови на културата и слично. Средствата за оваа намена се предвидени во буџетот на Град Скопје за 2019 година.
„Една од целите и приоритетите на проектот е предложените проектни активности да вклучуваат интерактивност со локалното население со кое ќе се дефинираат културните потреби и активности, а се препорачува и вклучување на припадниците на социјалните ранливи групи и малцинства, припадници на етничките заедници, деца и ученици коишто живеат во околината, со вклучување на родова компонента и родово избалансирани активности“, велат од Град Скопје.
Јавниот повик е објавен денеска, 5 февруари, и ќе трае до 5 март. Повикот со апликациониот формулар е објавен и на официјалниот портал на Град Скопје на следниот линк: www.skopje.gov.mk/ShowAnnouncements.aspx?ItemID=9978&mid=482&tabId=
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поднесено обвинение за дивоградба во Охрид
По спроведена истражна постапка, Основното јавно обвинителство Охрид поднесе Обвинителен акт против две лица за кривично дело – Бесправно градење согласно член 244-а став 1 од Кривичниот законик.
Осомничените на возраст од 49 и 48 години, како соизвршители, на 27.07.2023 година започнале да градат објект на нивно земјиште, без одобрение за градба издадено од надлежен орган. На постоечкиот објект во центарот на Охрид изградиле доградби од северната страна, во сутеренот, приземјето и на катот, проширувајќи ги со армирани бетонски плочи и столбови, по што продолжиле да го надградуваат објектот со две армирано бетонски плочи со кои ја зголемиле неговата катност, извести Обвинителството.
Против првиот обвинет во овој предмет се води судска постапка за уште едно бесправно градење во центарот на Охрид.
Македонија
Во јавните набавки има корупција, која е последица на политичките интереси, во цените има големи разлики, покажува извештајот на Центарот за граѓански комуникации
Центарот за граѓански комуникации денеска ги објави извештајот од редовниот мониторинг на јавните набавки, кој вклучува и анкети со фирмите и со претставниците на државните институции; Индексот на рационалност, каде што се споредени цените по кои разни институции набавувале сосема исти производи или услуги и анализа, и базата на податоци за јавните набавки на општините за 2023 година.
Клучните наоди од овие истражувања, како што информираат од Центарот, покажуваат дека јавните набавки во 2023 година достигнаа рекордно висока вредност и рекордно ниска конкуренција во последните 10 години. Склучени се договори за јавни набавки во вкупна вредност од 1,5 милијарда евра, што е 35 % повеќе од претходната година.
Според мониторингот на јавни набавки, просечниот број понуди од тендер изнесувал 2,7. Во една третина од тендерите е добиена само по една понуда. Отсуството на конкуренција е последица на фаворизирачки тендерски документации и загубена доверба на бизнис-секторот во фер натпревар на набавките.
„41 % од лицата за јавни набавки по државните институции сметаат дека во набавките често има корупција. Повеќето од нив велат дека најприсутна е корупцијата како последица на политичките интереси и дека поголем генератор на корупција се фирмите отколку луѓето во институциите. И 51 % од фирмите што учествуваат во јавните набавки сметаат во набавките има корупција, а со неа лично се соочиле 23 % од компаниите вклучени во истражувањето. Индексот на рационалност открива големи разлики во цените по кои институциите купуваат исти производи и услуги. Така, на пример, исти лиценци за компјутерски софтвер се купувани по цени од 6.185 до 23.100 денари. Базата на податоци за јавните набавки на општините, пак, открива дека во 2023 година општините за набавки потрошиле 40 % повеќе пари од претходната година и дека само десет фирми добиле 25 % од вредноста на сите тендери.
Скопје
Чистење на каналската мрежа во општина Илинден
Со цел да се продолжи со редовно чистење и одржување на каналската мрежа на територијата на Општина Илинден и во 2024 година, од страна на Општина Илинден е донесен Акционен план за чистење и одржување на каналската мрежа на територијата на општина Илинден за 2024 година со дефинирани вкупно 22 900 метри (главна, секундарна и терцијална каналска мрежа) во согласност Годишната програма за чистење на каналска мрежа на АД Водостопанство „Скопско Поле“ – Скопје и во согласност со потребите на граѓаните и правните субјетки на Општина Илинден.
Од страна на АД Водостопанство на РМ Поддружница „Скопско Поле“ – Скопје во текот на изминатиов период е извршено чистење на сисавец на секундарен канал Топлик во Илинден во должина од 1000 метри, канал Млака на потегот од од пречистителната станица Илинден, кон Главен канал во должина од 800метри, потоа каналот позади Дом на култура кон Главен канал во Мралино во должина од 1500 метри. Исто така исчистен е канал покрај ул.4 кон Главен канал во должина од 600 метри и терцијални канали покрај ул.1 и ул.2 во должина од 400 метри во населено место Мралино.
Согласно годишна програма и акционен план за чистење на каналската мрежа, во нареден период ќе се продолжи со чистење на Ободен канал на потегот од Кадино-Марино кон локална зона стопански комплекс Илинден во должина од 4000 метри и секундарен А – канал во Илинден во должина од 3000 метри.