Македонија
ЈП „Паркови и зеленило“: Пролетната акција за средување и чистење на скопските општини се одвива според планиранoто

Големата пролетна акција за средување и чистење на скопските општини која започна на 21.3.2022г. во организација на Град Скопје, а во координација со градските јавните претпријатија, се одвива согласно предвидените планирани активности, велат од ЈП „Паркови и зеленило“. Иницијативата за оваа акција, како што истакнуваат е само дел од целите кои се приоритет на Градот Скопје, во соработка со јавните претпријатија за чисти и уредени градски средини, а со тоа овозможувајќи реализирање и на голем број барања од страна на граѓаните.
„Започнувајќи од општина Кисела Вода изминативе три дена, акцијата се одвива тековно, каде екипи од нашето претпријатие работат на собирање лисја, косење на тревниците, собирање на искосот, кроење на грмушки, чистење на зелените површини од отпадоци и смет, а се изврши и кастрење и сечење на дрвја по издадени решенија од страна на Град Скопје. Активностите се одвиваат редоследно, согласно утврдената програма за работа и досега се интервенираше на: Бул. Борис Трајковски – потег од рампа до раскрсница со бул. Србија каде се изврши кастрење на 33 дрвја и сечење на 7 дрвја по решение, косење на зеленилото по должина на булеварот, собирање на лист, правење на рабници, кроење на грмушки и рози ирасчистување на теренот“, додаваат од таму.
Објаснуваат дека за таа цел биле ангажирани 30 работници, 3 камиони и 2 дигалки.
„На ул. Јустинијан Први – се завршија две решенија, исечени се 20 тополи како и едно решение во ООУ Св. Климент Охридски каде се исечени 5 дрвја и се изврши кастрење на 10 дрвја во зеленилото кое го одржува претпријатието. Исто така, на оваа улица екипите извршија косење на зеленилото по должина на улицата, собирање на лист, правење рабници, кроење на грмушки и рози, како и расчистување на теренот. Активностите се реализираа со 30 работници, 3 камиони и 1 дигалка. На ул. Михаил Чаков – завршени се три решенија исечени се 3 дрвја и 22 се искастрени, а се работеше и на косење на зеленилото по должина на улицата и околу зградите, собирање на лист, правење на рабници, кроење на грмушки и рози, расчистување на теренот, со ангажирање на вкупно 30 работници, 3 камиони (еден камион од ЈП Комунална хигиена) и 1 дигалка“, се истакнува во писменото соопштение.
Најавуваат дека во склоп на акцијата до крајот на неделата ќе се изврши средување на јавните зелени површини на ул. Христо Татарчев и на ул. Павел Шатев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски – Бардуани: Остануваме посветени на регионалната безбедност и стабилност

Денеска во Министерството за одбрана, министерот Владо Мисајловски се сретна со командантот на НАТО мисијата на Косово, КФОР, генерал-мајор Енрико Бардуани со кого разговараше за значајната улога на оваа мисија во зацврстувањето на безбедноста и стабилноста на Косово, а со тоа и на целиот регион.
„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка која ја даваме на оваа мисија и во иднина“, рече министерот на средбата.
Мисајловски порача дека во време на сериозни геополитички промени и нестабилност, сигурен и безбеден регион е од приоритетно значење за нас, додавајќи дека земјата ќе продолжи да биде столб на безбедноста на Балканот.
Имајќи предвид дека мандатот на генералот Бардуани како командант на КФОР завршува наскоро, министерот Мисајловски му се заблагодари за одличната соработка и координација поврзана со македонскиот контингент во оваа мисија.
Генералот Бардуани, пак, посочи дека македонските војници секојдневно покажуваат врвен професионализам и целосна посветеност на своите задачи и обврски. Тој изрази благодарност за континуираниот придонес на нашата држава во мисијата КФОР, нагласувајќи ја важноста на соработката во одржувањето на мирот и безбедноста во регионот.
Во рамки на посетата, генералот Бардуани се сретна и со началникот на Генералштабот на Армијата, генерал-мајор Сашко Лафчиски.
Македонската Армија во оваа мисија придонесува од 2020 година.
Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.
Македонија
ДУИ нуди ветинг со меѓународен мониторинг: Нека се истражи имотот на секој политичар и на секоја политичка партија

ВМРО-ДПМНЕ е последната партија која има право да држи лекции за борбата против корупцијата, криминалот и политичките влијанија, затоа што денес, од позиција на власт, јасно демонстрира дека има само една цел: целосно да ја зароби државата, особено правосудството, велат од ДУИ.
Според нив, под водство на оваа влада, политиката отворено се меша во Обвинителството, Републичкиот судски совет и Советот на јавни обвинители, со класични политички сценарија за ставање на правдата под контрола.
ДУИ, додаваат од таму, не се плаши од независно правосудство ниту од транспарентност.
„Напротив, ние нудиме конкретно решение: ветинг со меѓународен мониторинг, за целосно чистење на политичката и јавната сцена од секое коруптивно влијание. Нека се истражи имотот на секој политичар и на секоја политичка партија. Нека се истражи најголемиот корупциски процес во државата – приватизацијата, која создаде недопирливи олигарси со монополи во клучни економски сектори, кои денес прават сè за да го блокираат европското интегрирање, од страв од фер конкуренција“.
ДУИ бара истрагата да се прошири и на институциите на државната безбедност и нивните вработени од 1945 година до денес, затоа што, како што велат, само така може да се затвори едно темно поглавје од минатото и да се изгради држава каде никој не е над законот.
„Тие што немаат што да кријат – го прифаќаат ветингот.
Времето на моноетнички проекти и етничка супериорност е завршено. Северна Македонија може да се гради само заедно, во духот на мултиетничноста и еднаквоста, а не под плаштот на „борба против корупцијата“ да се реализираат агенди кои ја поткопуваат државата и ја заробуваат за да спроведат моноетнички цели.
ДУИ останува цврсто определена да ја води државата напред кон европската интеграција, со чисти институции, со независно правосудство и со општество кое става крај на бескрајниот транзициски период“, истакнуваат од партијата на Ахмети.