Македонија
ГРЕКО задоволна од исполнетоста на препораките што се однесуваат на Јавното обвинителство

Министерството за правда денеска го објави вториот аденум на вториот извештај за усогласеност на Република Северна Македонија од четвртиот круг на евалуација на тема „Спречување на корупција кај пратениците, судиите и обвинителите“ усвоен од Групата на држави против корупцијата (ГРЕКО).
Во најновиот извештај на ГРЕКО за нашата земја се констатира дека земјата задоволително ги исполнила повеќето од препораките кои се однесуваат на спречување корупција кај јавните обвинители. Така, ГРЕКО го поздравува усвојувањето на измените во Етичкиот кодекс на јавните обвинители, со кои експлицитно беше наведен концептот „гостопримство“ како вид нематеријална корист, која им е забранета на јавните обвинители. Измените во оваа насока, по предлог на Здружението на јавните обвинители, беа усвоени од Советот на јавните обвинители во ноември 2023 година, со што оваа препорака е имплементирана во задоволителна мера.
Освен ова, во септември 2023 година, во согласност со препораките на ГРЕКО, јавниот обвинител на Република Северна Македонија донесе нов правилник за примање, располагање и евиденција за примени подароци на јавните обвинители при протоколарни настани, кој е целосно усогласен со сличните подзаконски акти во европските институции. И за оваа препорака ГРЕКО констатира дека е имплементирана задоволително.
Во однос на работата на Јавното обвинителство, како делумно имплементирана останува само препораката која се однесува на ревизија на дисциплинскиот режим што се применува за обвинителите и тоа во насока јасно да се дефинираат повредите и да се прошири опсегот на дисциплински санкции. Оваа препорака опфаќа законски измени, чие предлагање е во надлежност на Министерството за правда, особено во делот на Законот за Јавното обвинителство, а во таа насока Обвинителството веќе доставува свои конкретни предлози.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Хаос на улиците и нарушена безбедност, уште колку луѓе треба да загинат за Тошковски да понесе одговорност“, прашува СДСМ

„Последната криминална престрелка на Бит Пазар со смртни последици е уште еден доказ за сериозното нарушување на јавната безбедност и нефункционирањето на институциите под раководство на министерот за внатрешни работи, Панче Тошковски“, велат од СДСМ.
„Граѓаните на Скопје и цела Македонија се чувствуваат небезбедно на улиците, додека криминалот и насилството се шират на секој чекор.
Наместо ефикасна превенција и реакција, сведоци сме на институционален хаос и нефункционалност на Министерството за внатрешни работи.
Оваа неспособност загрозува човечки животи.
Уште колку луѓе треба да загинат по улиците за Тошковски да понесе одговорност?
Министерот Тошковски мора веднаш да преземе одговорност за загрозената безбедност.
СДСМ бара итна и транспарентна истрага за престрелката, целосно расветлување на настанот и изведување на виновниците пред лицето на правдата.
Дополнително, потребна е промена на безбедносниот систем и засилени мерки за зајакнување на јавната безбедност, особено во чувствителни области.
Граѓаните не заслужуваат да живеат во страв, граѓаните заслужуваат мирен и безбеден живот, а институциите мора да обезбедат сигурност“, соопшти СДСМ.
Македонија
Единствената работа што беше организирана во владеењето на СДС и ДУИ беше криминалот, реагира ВМРО-ДПМНЕ

„А ако станува збор за организираност и наведувањата дека оваа Влада е неорганизирана, би констатирале само дека единствената работа во која што владата на СДС и ДУИ беше организирана беше криминалот, организираниот криминал, затоа и впрочем нема да се чепне или да се направи ревизија на работењето, а да не излезе од тоа некаква форма на организиран криминал правен од претходната влада во таа институција“, реагира ВМРО-ДПМНЕ на изјавата на Венко Филипче.
„Оттука, и логично е што на СДС ние им делуваме неорганизирано затоа што нивниот впечаток и критериум за организираност е исклучиво за организираност во некој криминал, тие не се навикнати на организирана работа на проекти, затворање дупки и реформи, затоа и ваква забуна се создава кај нив.
За нив најорганизиран и за пример е веројатно нивниот партнер ДУИ со кои градат специфичен однос на ниво на политички и коруптивен садомазохизам, што може да е нов правец во политичката култура во државата“, се додава во реакцијата на ВМРО-ДПМНЕ.
Македонија
Градоначалникот Ѓорѓиевски со жителите на Црниче го одбележа празникот Балаклија

Градоначалникот Орце Ѓорѓиевски денес беше присутен на местото Балаклија во Црниче, каде заедно со жителите го прослави Источен Петок, значаен православен празник кој секоја година се одбележува на првата недела по Велигден. Тој истакна дека посебно му е драго што ова свето место, на кое се наоѓа изворот, беше ослободено од узурпација, вратено на жителите оплеменето со нови содржини кои овозможуваат вистинско уживање на сите кои го посетуваат, информира општина Кисела Вода.
Го истакна своето задоволство што следната година ќе ја има честа токму тој да биде кум на овој значаен настан.
– Нека е за многу години Источен Петок – Балаклија! Другата година кумството е мое, дар од Бога за што ми е огромна чест! Денес, заедно со мојот народ од Црниче го славиме овој голем празник кој спаѓа во Светлата Недела. Празник посветен на Пресвета Богородица на кој ѝ се оддава признание и се верува дека на овој ден му ги миела раните на Исус Христос, па затоа водите од изворите денеска се лековити и верниците масовно ги посетуваат за да ги измијат очите и лицето. Ова култно место во Црниче на кое има извор и кое до лани беше узурпирано, го ослободивме и го вративме на жителите, оплеменето со содржини за вистинско уживање и рекреација на сите кои го посетуваат. Горд сум на сплотеноста на мојот народ на ваквите денови, затоа Македонија е богата земја која меѓусебната љубов и почит ја одржувала низ вековите.
За многу години да ни е, здравје и бериќет кај сите-изјави градоначалникот на Кисела Вода, Орце Ѓорѓиевски.