Македонија
Грковска: Во процесот на дигитална трансформација на општеството од клучна важност е засилувањето на сајбер-безбедноста во нашата држава
Заменичката на претседателот на Владата задолжена за политики за добро владеење, Славица Грковска, денеска имаше работен состанок со експертите и тимот на проектот на USAID-CIDR, кои работат со CICWG – работната група за сајбер-безбедност на критичната информациска инфраструктура на Република Северна Македонија.
На состанокот вицепремиерката Грковска се заблагодари на тимот на проектот на USAID-CIDR за дадената експертиза и постојната поддршка во оваа област и изрази подготвеност да ја поддржи координацијата на активностите меѓу секторите што работат на зајакнување на капацитетот на критичната инфраструктура во земјата. Истовремено, иницира и координација со естонските експерти, кои веќе имаат изготвенo извештај за земјите од Западен Балкан во делот на сајбер-безбедноста.
Вицепремиерката Грковска оцени дека во процесот на дигитална трансформација на општеството за Република Северна Македонија од клучна важност е засилувањето на сајбер-капацитетот во нашата држава. Важно е сајбер-безбедноста да не се третира како трошок во една држава, туку како инвестиција. Но, истовремено, потенцира Грковска, треба да се обрнува внимание и да се зголеми свесноста за сајбер-безбедноста и кај граѓаните и кај бизнис-секторот, особено во делот на пријавување сајбер-напади.
Од страна на експертите и тимот на USAID-CIDR беа презентирани досегашните активности, но и предлозите за следните активности и моделот на 8+1 сектори на критична информациска инфраструктура, кој треба дополнително да се договори со носителите на секторите и регулаторите.
Со подршка на УСАИД оформена е работна група за сајбер-безбедност на критичната информациска инфраструктура, каде што учествуваат претставници од повеќето релевантни институции, како и од приватниот сектор, кои се од клучна важност за нашата држава.
CICWG е форум креиран да ги олесни активностите што се однесуваат на отпорноста на критичната национална инфраструктура за сајбер-безбедноста во Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.