Македонија
Грковска: Да се справиме со провлекувањето на најштетните поединци кои низ дупките во системот „подмачкуваат“ со моќ и влијание
Заменичката на претседателот на Владата задолжена за политики за добро владеење, Славица Грковска, учествуваше на панел дискусија во рамки на Отворениот форум за антикорупција, кој денеска и утре се одржува во Скопје, во организација на Македонскиот центар за меѓународна соработка.
Осврнувајќи се на темата на панелот со наслов „Дали ги исполнивме ветувањата за борба против корупцијата“, Грковска истакна дека е потребно одговорноста да се индивидуализира, а не да се генерализира и сите да се ставаат во еден кош, затоа што има професионалци коишто добро си ја работат својата работа. „Прашањето е како системот да не се солидаризира, туку да ги исфрли оние кои што ставаат дамка на професијата, на одредени институции и организации“, истакна Грковска.
Го посочи како позитивен фактот што граѓаните се чувствуваат слободни отворено да зборуваат и да реагираат на негативните појави и благодарение на тоа се зголемува притисокот врз институциите за преземање на итни мерки за санкционирање на корупцијата. Според неа, зголемувањето на транспарентноста и притисокот на јавноста се најдобрите начини за вршење контрола врз начинот на работа и ефикасноста на институциите.
За да се постигнат посакуваните резултати во борбата со корупцијата, потребни се вредносни поместувања во целото општество и консензус меѓу сите политички чинители, истакна Грковска, и додаде дека политичарите треба да бидат пример за однесување со интегритет и професионалност, а потоа таков систем на одговорност да се пренесе во сите сфери на општеството.
„Потребни ни се силни и отчетни институции, кои на транспарентен начин ја вршат својата функција. Но, потребно ни е да се справиме со неказнивоста и со провлекувањето на најштетните поединци во општеството низ дупките во системот кои се „подмачкуваат“ со моќ и влијание“, изјави Грковска, додавајќи дека сите мерки кои се преземаат, мора да водат кон промена на менталитетот.
Во таа насока, вицепремиерката Грковска го заокружи своето излагање истакнувајќи ја потребата да се стави фокус и да се даде поддршка на позитивните примери и рол модели во општеството и континуирано да се работи со младите на вградување вистински вредносен систем.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Притвор од 48 часа за сопругот по смртта на неговите жена и ќерка во Карпош
Судот му определи 48 часовен притвор на сопругот од Карпош чија жена и ќерка починаа по пад од зграда.
„Основното јавно обвинителство Скопје до судијата на претходна постапка од Основниот кривичен суд Скопје поднесе предлог за определување мерка краткотраен притвор од 48 часа против едно лице за кое постојат сомненија за сторени кривични дела – Телесна повреда од член 130 став 2 во врска со став 1, Загрозување на сигурноста од член 144 став 3 во врска со став 2 и став 1 и Наведување на самоубиство и помагање во самоубиство од член 128 став 4 од Кривичниот законик“, соопштија од Обвинителството.
Од таму појаснуваат дека притворската мерка е неопходна со цел преземање на сите истражни дејствија со цел обезбедување докази во однос на сомненијата и додаваат дека по предлог на јавниот обвинител, судот определи притвор.
Македонија
МНР ги повика македонските државјани заглавени во ОАЕ да се јават во амбасадата во Абу Даби
Министерството за надворешни работи и надворешна трговија информира дека, имајќи ја предвид актуелната безбедносна состојба, Амбасадата на Република Северна Македонија во Абу Даби, во координација со локалните власти во Обединетите Арапски Емирати, активно работи на финализирање на деталите околу организацијата на комерцијален лет за евакуација на македонските државјани.
Се повикуваат сите граѓани кои се заинтересирани за евакуација, а сè уште не се пријавиле, во најкраток рок да стапат во контакт со Амбасадата во Абу Даби преку следните контакти:
Телефон: +971 56 441 7532
Е-маил: [email protected]
„Безбедноста на македонските државјани останува највисок приоритет. Пријавените лица навремено ќе бидат информирани за понатамошните чекори и условите за безбедна реализација на евакуацијата“, велат од Министерството.
фото/Depositphotos
Македонија
(Фото) Руте во посета на Армијата: Дејствувате над вашите капацитети кога станува збор за истурените копнени сили
Генералниот секретар на НАТО, Марк Руте, денес во касарната „Илинден“, Скопје, оствари посета на Армијата, која се реализира во рамки на неговата официјална покана на Македонија.
Генералниот секретар беше пречекан од началникот на Генералштабот на Армијата, генерал-мајор Сашко Лафчиски и министерот за одбрана Владо Мисајловски.

Во рамките на посетата, генералниот секретар се обрати пред припадниците на Армијата истакнувајќи го придонесот што нашата држава го прави во рамки на Алијансата.
„Вие навистина дејствувате над вашите капацитети кога станува збор за истурените копнени сили (Forward Lend Forces)“, истакна Руте, потенцирајќи „со тоа се грижите навистина да ја одбраниме секоја педа од територијата на Алијансата“.

За време на посетата беше извршена смотра на построените единици, како и на опремата и средствата со кои располагаат Лесната пешадиска баталјонска група и декларираните единици од составот на Баталјонот на специјални сили.
Во знак на признание за придонесот во зајакнувањето на соработката и поддршката на Армијата на Република Северна Македонија во рамки на Алијансата, началникот на Генералштабот на Армијата, генерал-мајор Сашко Лафчиски му додели Голема плакета на Армијата на генералниот секретар на НАТО.

На настанот присуствуваа генерали на Армијата и претставници од Армијата и Министерството за одбрана.

