Македонија
Грковска не ја негира ниската доверба во институциите: Во мала земја како нашата тешко е да се исфрлат од употреба „тефтерчињата“

„Напредокот кон ЕУ несомнено значи подобри услови за живеење и повеќе можности за развој за сите наши граѓани. Носи нови и посветли перспективи за народите, кои изминативе децении преживеаја многу турбулентни времиња и кризи. За жал, обременетоста со историјата на конфликти и сите надворешни и внатрешни фактори што профитираат од тој наратив и ден-денес се сопирачка што ги отежнува позитивните процеси на кои сме посветени. Директно, тоа влијае на динамиката на нашето пристапување во ЕУ, иако самата Унија е основана за да се стави крај на историските раздори на европска почва во име на иднината“, изјави заменичката на претседателот на Владата, задолжена за политики за добро владеење, Славица Грковска, на регионалниот експертски состанок за Кластерот 1 („Основни вредности“), во организација на Европското движење на Северна Македонија – Национална конвенција за ЕУ.
Грковска истакна дека големото одолжување на европскиот пат, многуте објективни, но и тенденциозно креирани кризи, ја оневозможуваат и неопходната културолошка промена кон која тежнеат сите што се посветени на борбата со корупцијата, особено во поглед на толеранцијата во општеството кон овој феномен.
„Децениското вкоренување коруптивни практики не може да се излечи и надмине толку бргу колку што би сакале. Ниту, пак, лесно може да изградите капацитети ако на вашите напори им претходело владеење, кое целосно ги заробувало и разградувало институциите. Денеска, истите тие цинично го припишуваат на денешната Влада сето она што тие свесно и плански го уништија и сметаат дека актуелните кризи и пречки ќе го избришат злоделото што ја изолира и свесно ја уназади државата“, истакна Грковска додавајќи дека не може да се негира ниската доверба во институциите, особено во правосудството и дека во мала земја како нашата, тешко е да се исфрлат од употреба „тефтерчињата“.
„Во ризичните времиња во кои живееме не смееме да дозволиме европската ориентација на нашето општество, која беше речиси акламативна, да се претвори во дезориентација со ризични импликации“, изјави Грковска и порача дека заедно со нашите европски пријатели мора да го сопреме порастот на недемократски и авторитарни влијанија, кои ја намалуваат поддршката за членство во ЕУ.
Денешниот регионален состанок е во рамките на проектот „Правдата нека владее со регионот“, спроведуван од постојните структури на Националната конвенција за Европската Унија, партиципативен модел на дијалог, кој функционира во Србија, Албанија и Северна Македонија и е насочен кон демократизација на процесот на интеграција во ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.