Македонија
Грковска: Справувањето со корупцијата не е само добро владеење, тоа е израз на патриотизам кон државата
![](https://makfax.com.mk/wp-content/uploads/2023/04/19042023_ZPVRSM_Grkovska-2.jpg)
Заменичката на претседателот на Владата задолжена за политики за добро владеење, Славица Грковска, денеска го одржа вториот координативен состанок со институциите надлежни за справување со корупцијата, на кој беше разгледуван прогресот во спроведувањето на препораките од Извештајот на Европската комисија за напредокот на Северна Македонија за 2022 година.
Оваа активност, вицепремиерката Грковска ја реализира заедно со евроамбасадорот во земјава Дејвид Гир и секретаријатот за европски прашања, а целта е следниот извештај од ЕК да покаже значаен напредок во спроведувањето на реформите, но и да се подобри динамиката на имплементацијата на Националната стратегија за спречување на корупцијата и судирот на интереси за 2021-2025.
„Борбата против корупцијата не е само добро владеење или одбрана на системот, туку тоа е и патриотизам кон државата. Сега е моментот сите ние, сите носители на функции да покажеме со дела дека си ја сакаме татковината. Целта на оваа координативна активност е да ги надминеме слабостите и да постигнеме напредок, кој се очекува од нас, не заради Европската Унија, туку заради нашите граѓани и нашата држава“, нагласи вицепремиерката Грковска.
Таа потсети дека по состанокот во декември минатата година, институциите имаа обврска до Кабинетот да достават планови со конкретни мерки, кои произлегуваат од Извештајот од Европската комисија за 2022 година и Националната стратегија за спречување на корупцијата и судирот на интереси за 2021-2025, по што ќе се следи динамиката на нивната реализација.
„Време за чекање и време за губење нема. Не само во поглед на следните европски извештаи, туку и во поглед на очекувањата на граѓаните за суштински резултати во борбата против корупцијата. Ажурното исполнување на обврските зависи од сите нас, кои ги водиме институциите. Приближувањето кон ЕУ значи да ја јакнеме одговорноста и отчетноста на сите институции“, додаде вицепремиерката Грковска. Таа изрази жалење што последниот извештај на Државната комисија за спречување на корупцијата покажува реализација на Стратегијата за спречување на корупцијата и судир на интереси од само 10 проценти и побара од институциите целосно да се посветат на оваа обврска.
Евроамбасадорот Гир нагласи дека напредокот на нашата држава во делот на справувањето со корупцијата ќе биде сериозно оценуван во наредниот извештај на Европската комисија и поради тоа, додаде тој, неопходно е сите институции, сите релевантни субјекти во државата да се обединат во справувањето со оваа појава. „Владата, опозицијата и Собранието на Република Северна Македонија мора да работат заедно во оваа насока, правосудниот систем мора да ја поврати довербата на јавноста, а важна е и улогата на граѓанскиот сектор и на медиумите. Мора сите да се вклучат во оваа борба“, изјави амбасадорот Гир.
Државната секретарка во СЕП, Дрита Абдиу Халили, информираше дека ефикасното справување со корупцијата е предуслов за затворање на секое поглавје и од тие причини е важно сите институции, во секоја област, во сите делови на системот посветено да работат на ова прашање.
Координацијата со институциите надлежни за справување со корупцијата е динамичен и континуиран процес, кој ќе продолжи со поединечни средби и во наредниот период, бидејќи целта е сите вклучени страни да придонесат кон остварување позитивни резултати што ќе се рефлектираат во во следниот извештај на Европската комисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Воз на релација Скопје – Гевгелија удрил во возило на излезот од Драчево
![](https://makfax.com.mk/wp-content/uploads/2022/07/zeleznichka-stanica-voz-6.jpg)
Регионалниот ЦУК Скопје, информира дека од Македонски железници известиле дека вчера во 17.15 часот, патничкиот воз што сообраќа на релација Скопје – Гевгелија, на излезот од станицата „Драчево“ на патничкиот премин, што е обележан со светлосна и звучна сигнализација, удрил во патничко моторно возило.
Според информациите до ЦУК, во возилото бил само возачот и нема настрадани.
На местото на несреќата, покрај Итната медицинска помош, биле од полицијата, а и Комисија од МЖ.
ЦУК информира и за состојбата со пожарите во земјава.
Во последното деноноќие, имало вкупно 18 пожари на отворено – сите се изгаснати и утрово нема активни, соопшти ЦУК.
Од центарот со алел до граѓаните да не се палат отпадоци и ѓубре на ова топло време и сува вегетација во природата.
РЦУК Скопје, известува дека вчера попладне била добиена пријава дека при рушење на објект во с.Грушино, во близина на основното училиште, било пронајдено неексплодирано експлозивно убојно средство. Од РЦУК Скопје, известени се ДЗС Скопје, од каде известиле дека за подигање на опасниот предмет ќе интервенираат во текот на утринските часови денеска. Инаку, превентивната препорака до тие што ќе најдат неексплодирани убојни средства (НУС) да не ги фаќаат и да не ги поместуваат туку едноставно да ги пријават на 112 во ЦУК.
Регионалниот ЦУК Скопје, известува дека денеска од 10:00 до 15:00 часот, се планира да се врши минирање на каменоломот „Зелениковец“ (Општина Сопиште) и околу местото ќе се слушаат детонациите од минирањето.
Регионалниот ЦУК Битола, информира, според најавата на ЦЈЗ „Прилеп“, дека од денеска, 08 јули до 10 десети јули, во периодот од 22.00 до 05.05 часот на територијата на Општина Прилеп ќе се спроведува прва фаза од дезинсекција со цел уништување на комарци. Со дезинсекцијата, освен градот Прилеп, ќе бидат опфатени населените места: Ореовец, Лениште, Селце, Лагово, Беровци, Кадино Село, Галичани, Тополчани, Ерековци, Канатларци, Чепигово, Тројкрсти, Мажучиште и Мало и Големо Коњари.
Се информираат пчеларите да ги заштитат нивните пчели во Прилепско каде што ќе се прска против комарци.
ЦУК предупредува и на состојбата со временската прогноза.
Следува период на многу топло време со дневна температура која насекаде ќе биде над 30, а наместа ќе достигнува 40 степени. Во попладневните часови претежно во планинските подрачја ќе има изолирана појава на нестабилност со краткотраен дожд и ретки грмежи.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации.
Македонија
СДСМ: Само Мицкоски и Чак Норис можат за два дена власт да донесат нова инвестиција, доста се китите со туѓи перја
![](https://makfax.com.mk/wp-content/uploads/2024/06/mickoski-1-2.jpg)
Тажно е да се гледа како Мицкоски и ВМРО-ДПМНЕ по секоја цена сакаат да покажат резултат и не бираат средства за да ги насамарат граѓаните. Но, потценување на интелигенцијата е дека само за два дена Мицкоски поканил, привлекол и договорил било кој нов инвеститор. Ова веројатно го можат само Мицкоски и Чак Норис, истакнуваат во соопштението од СДСМ.
Таков последен пример, како што велат, е инвестицијата на компанијата EPSOTECH, која Мицкоски ја објави како свое големо достигнување.
„Добро е што ВМРО-ДПМНЕ ќе овозможи инвестициите донесени од СДСМ да се реализираат, бидејќи тоа е добро за државата и граѓаните. Но, сметаме дека е политички простотилук да се тврди дека Владата на СДСМ ништо не работела, а во исто време Мицкоски да не признае дека се фали со наши проекти.
Јавноста треба да знае дека во моментов има шест нови инвестции кои се со завршени договори и спремни за работа. Единствена причина заради која не ги објави СДСМ е да не го наруши изборниот процес. За овие инвестиции се завршени сите процедури и го чекаат последниот филтер во Комисија за заштита на конкурентноста“, велат од опозициската партија.
Му порачуваат на ВМРО-ДПМНЕ наместо да продава магла и пропагнада, да се фати за работа и да реализира барем нешто свое.
„Срамно и смешно е два дена по преземањето на власта да промовира инвестиции како свои во услови кога уште немаат ни седнато на фотељите“, дополнуваат од СДСМ.
Македонија
Која земја ќе ја претставува Мицкоски во Вашингтон, Северна Македонија или никогаш Северна само Македонија, прашува Филипче
![](https://makfax.com.mk/wp-content/uploads/2024/06/sdsm-venko-filipce-1.jpeg)
Христијан Мицкоски, кој за Вашингтон отиде со пола од неговите министри, гордо преку видео ни порача дека е на самитот на НАТО.
Човекот кој жолчно работеше против членството во Алијансата и целата своја политичка стратегија ја базираше на блокада на тој процес, денес без грам срам се однесува како ништо да не било, реагира лидерот на СДСМ, Венко Филипче на најавата на премиерот Христијан Мицкоски од Вашингтон дека со дел од министрите ќе учествува на самитот на НАТО по повод 75-годишнината од формирањето на Алијансата.
„Лицемерието на политиката на ВМРО-ДПМНЕ и Мицкоски достигнува неверојатни граници. Тој заборави да каже во видеото која земја ќе ја претставуваат со Тошкоски, Мисајловски и Муцунски во Вашингтон, Северна Македонија или како што им ги подгреваа очекувањата на граѓаните – никогаш Северна само Македонија?
Мицкоски да не заборава дека тоа што денес е на најважниот политички настан во светот, а не во некој од месните штабови на ВМРО-ДПМНЕ е благодарение на храбрите и државнички одлуки на СДСМ, кој тој ги бојкотираше.
Не е далеку денот кога и целосно ќе се накити со перјата во надворешната политика, исто како што тоа го прави со инвестициите кои помпезно ги најавува, а се плод на работата на СДСМ.
Јавноста знае дека СДСМ беше и ќе остане мотор на развојот. СДСМ е партијата која ги реализира визијата и стратегијата на државата, додека ВМРО-ДПМНЕ ќе остане опортунистичка партија која ќе кочи се што е во интерес на граѓаните заради тесно политички интерес“, пишува Филипче на социјалните мрежи.