Македонија
Грковска – Фратини: Ќе ја продлабочиме соработката меѓу Италија и Северна Македонија

Заменик-претседателката задолжена за политики за добро владеење, Славица Грковска, денеска имаше состанок со претседателот на Државниот совет на Република Италија и поранешен еврокомесар за правда и безбедност, Франко Фратини, на кој се разговараше за можностите за меѓусебна соработка, особено во делот на добрите практики што Италија ги има во креирањето на антикорупциските политики, унапредување на регулативата за јавните набавки, како и политиките за добро владеење воопшто.
„За мене и за мојот кабинет, важно е искуството што Италија го има во креирањето и имплементирањето на антикорупциските политики. Јас се залагам за долгорочни, одржливи решенија, но и да испорачаме ефикасни резултати. Според првичните анализи, иако имаме релативно нов закон за јавни набавки, кој обезбедува висок степен на транспарентност, неопходни се одредени интервенции, кои ќе ја зголемат конкурентноста и ќе ги отстранат сите можности за манипулации“, рече вицепремиерката Грковска.
Претседателот Фратини нагласи дека во моментот Италија работи на ново законско решение за јавни набавки, во кое ќе биде вклучен и постојниот модел – ефикасен алгоритам што ги евалуира стандардите во сите јавни набавки и алармира доколку утврди одредени нелогичности.
„Одговорна за оваа дигитална електронска платформа е италијанската антикорупциска комисија. Во духот на пријателството и соработката меѓу Италија и Северна Македонија, со задоволство ќе ги споделиме искуството и начинот на примена на ова решение“, рече Фратини.
Тој додаде дека Италија како претседавач на eвропската мрежа на членови на претседатели на врховни и управни судови на земјите членки на ЕУ ја отвора можноста на овие состаноци да присуствуваат како набљудувачи и претседателите на врховните и управните судови на земјите кандидатки за членство во ЕУ.
Двајцата соговорници оценија дека чекорите за реализација на овие две прашања можe да почнат веднаш и изразија подготвеност да ја продлабочат соработката и во други општествени сфери, кои се важни за транспарентно, професионално и одговорно владеење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.
Македонија
„Вреди“: Посакуваме Бектеши да ја докаже невиноста, не сакаме ниту еден Албанец да биде одговорен за Кочани

Коалицијата „Вреди“ посакува ексминистерот за економија од редовите на ДУИ, Крешник Бектеши да ја докаже својата невиност во случајот со лиценцата за дискотеката „Пулс“ во Кочани, без оглед на ривалството со Интегративците.
„Без разлика што сме лути политички противници, не сакаме ниту еден Албанец да биде одговорен за трагедијата во Кочани. Но, за тоа одлучуваат правосудните органи, а не политичките чинители“, велат од „Вреди“.
Понатаму додаваат дека ДУИ веќе се претвориле во партија чија единствена идеологија е одбрана на своите поранешни функционери. За таа нивна цел, како што додаваат, се подготвени да ги бојкотираат локалните избори и да се обидат да предизвикаат политичка криза.
„Кога ДУИ зборува за систем, треба да одговори на што точно мисли. На системот кој нивниот режим го создаваше 22 години, додека беа дел од сите Влади на СДСМ и ВМРО-ДПМНЕ? На Јавното Обвинителство на Ислам Абази? На бегалците од правдата Артан Груби и Прпарим Бајрами? На системот на владеење кој од голобради функционерчиња на ДУИ направи милионери на грбот на Албанците? На системот во кој имаше селективна одговорност за трагедиите со модуларната болница во Тетово, Ласкарци, Беса транс?“, се додава во соопштението на коалицијата на албанските партии која е дел од владејачката гарнитура.
Понатаму заклучуваат и дека колку и да се препелка ДУИ, колку и лажно да се претставуваат како фактор меѓу Албанците, политичкиот крај на ова нивно корумпирано раководство пристигнува.
Македонија
Обезбедувачот на Мицкоски за 50.000 евра оддавал службени тајни, приведен е

За 50.000 евра откривал полициски службени тајни од истрага. Припадникот на обезбедувањето на премиерот Христијан Мицкоски е во притвор.
Од Обвинителството објавија дека се гони за Оддавање службена тајна. Вечерта на 30 март, на паркин пред хотел во Велес, се сретнал со сведок во постапка и му покажал службени документи на МВР, што претставуваат службена тајна.
Обезбедувачот му дозволил на сведокот и да ги снима документите, а и му кажувал кој документ на што се однесува.
Обвинителството побара притвор во траење од 30 дена, што беше прифатено од страна на судот.
За ова кривично дело предвидена е затворска казна од најмалку една година.
Основното јавно обвинителство за гонење на организиран криминал и корупција укажува дека ниту лицата, ниту документите во овој предмет, не се поврзани со лицата и групата од Грчец, како што во текот на вчерашниот и денешниот ден објавија дел од медиумите.