Заменичката на претседателот на Владата задолжена за политики за добро владеење, Славица Грковска, во рамките на посетата на Обединетите нации, имаше работен состанок со претставничката на Канцеларијата на Обединетите нации за дрога и криминал (УНОДЦ), Делфине Шантц, со која разговараше за потребата од организиран и системски пристап во справувањето со корупцијата и организираниот криминал.

Грковска ѝ се заблагодари на Шантц за поддршката што УНОДЦ ѝ ја дава на Северна Македонија како на експертско ниво така и во делот на координираниот регионален пристап. Во таа насока таа ја истакна соработката за имплементацијата на стратегијата за јакнење на капацитетите за водење финансиски истраги и конфискација на имот.

Особено се осврна на активностите што нејзиниот кабинет ги презема, а кои се фокусирани на младите и во поглед на јакнење на свеста за интегритетот како основна и клучна вредност и во однос на антикорупциското образование додавајќи дека овие политики се најважниот влог за иднината на државата.

Претставничката на УНОДЦ, Шантц ,ја поздрави посветеноста на македонската Влада на политиките на добро владеење и младинските политики, прашање на кое, како што рече таа, Обединетите нации посветуваат особено внимание имајќи предвид дека младите се оние што ќе бидат идни лидери и идни носители на одлуки.

Во тој контекст Грковска информира за кампањата „Зависи од мене и тебе“, што ја иницира таа, чија цел е на младите да им укаже дека промените зависат од сите нас и дека сите треба да учествуваат и да придонесат за создавање подобар, поефикасен и просперитетен систем.

Двете соговорнички разговараа и за активностите што нашата држава ги презема за справување со корупцијата во спортот, при што претставничката Шантц истакна дека ова прашање е од исклучително значење и во светски размери.

Во рамките на одбележувањето 30 години од зачленувањето на нашата држава во Обединетите нации, Грковска денеска во седиштето на ООН во Њујорк ќе го модерира панелот на тема „Граѓанско општество и солидарност“, на кој ќе учествуваат Ивана Живковиќ, помошничка на генералниот секретар и директор за Европа на УНДП, Уранија Пировска, од Хелсиншкиот комитет за човекови права, Вики Младенова, координатор на ЕРАЗМУС, и Љубомир Фаизов, координатор во ЛГБТИ-центарот за поддршка.