Македонија
Грковска – Шмид: Во услови на безбедносна, енергетска и економска криза, одговорноста на политичарите е уште поголема

Во рамки на работната посета на Виена, Австрија, заменичката на претседателот на Владата задолжена за политики за добро владеење, Славица Грковска, денеска имаше средба со генералната секретарка на ОБСЕ, Хелга Шмид.
Вицепремиерката Грковска нагласи дека Република Северна Македонија го презеде претседателството со ОБСЕ во многу чувствителен момент, имајќи предвид дека светот, особено Европа се соочува со безбедносна закана по агресијата врз Украина, што дополнително резултираше со енергетска и економска криза, а секако тука е и постковид кризата.
Таа нагласи дека граѓаните секојдневно се борат и ги чувствуваат последиците од овие предизвици и токму затоа политичарите имаат голема одговорност да изнаоѓаат брзи и ефикасни решенија и да се грижат за интересот на граѓаните.
Соговорничките се осврнаа и на значењето на жените во сите општествени и светски процеси, пришто вицепремиерката Грковска информираше за меѓународната иницијатива што таа ја покрена, а која се однесува на обединување на жените лидерки во процесите на добро владеење и справување со корупцијата од Југоисточна Европа во меѓународен Форум.
Генералната секретарка Шмид ја поздрави организацијата на Форумот, истакна дека иницијативата е одлична и ја нагласи улогата на жените во сите области на општествениот живот. Значајно е да се обезбеди родова еднаквост и вклучување на жените во процесот на носење одлуки.
Вицепремиерката Грковска информираше дека приоритет на нејзината работа е креирање на одржливи и ефикасни антикорупциски политики, имајќи предвид дека борбата со корупцијата е особен предизвик за нашата држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Студеничани денес без струја

ЕВН Македонија извести дека без електрична енергија ќе останат:
– во периодот од 08.30 до 16.00 часот, корисниците во областите Мала Река, Алдинци, Караџица и Солунска глава. ( општина Студеничани)
Македонија
Меџити: Ова е чиста победа, изградена со доверба и љубов кон Чаир

Синоќа во општина Чаир Изет Меџити и неговиот тим ја прославија победата на локалните избори.
Меџити им се заблагодари на партиските структури, активистите и граѓаните кои стоеле покрај него во текот на целата кампања.
„Победата што ја постигнавме не е случајност, туку резултат на работа, посветеност и доверба што ја изградивме заедно. Тоа е победа на нашата структура и активистите, на луѓето кои беа присутни во секој дел од Чаир, кои ја претворија нашата енергија и визија во вистинска граѓанска победа“, изјави Меџити.
Тој додаде дека секој час работа, секој чекор и секој напор на неговиот тим имале смисла, затоа што оваа победа е изградена врз чисти вредности, со доверба и љубов кон Чаир.
„Од срце ви благодарам за истрајноста, посветеноста и довербата што ми ја укажавте. Денес повеќе од кога било чувствувам дека Чаир има тим кој не се предава, кој работи и победува заедно. Горд сум на вас, горд сум на нашиот Чаир“, рече Меџити.
Според него, победата во Чаир се смета за јасна порака од граѓаните за континуитет, работа и доверба за развиен и обединет Чаир.
Македонија
Ќе се бориме за да ги браниме националните интереси, иднината на државата е во рамките на ЕУ, порача Мицкоски од Лондон

Економијата, безбедноста и процесот на интегрирање на Македонија во рамките на ЕУ, како што соопшти премиерот Христијан Мицкоски биле теми коишто биле опфатени на Самитот на Берлинскиот процес во Лондон.
„Тука беше додадена уште една тема, а тоа беше нелегална миграција. Морам да кажам дека денот беше инспиративен, го започнав со средба со министерот на Франција за Европа, господинот Бенжамин Хадад, којшто е исклучително близок на претседателот Макрон, на којшто ги кажавме нашите позиции, односно позициите коишто цело време ги повторуваме, дека мора да има испорака во дел на гаранции од страна на самата ЕУ, мора да има испорака од нашиот источен сосед во делот на почитување на меѓународното право, почитување на европските институции како што е Судот за човекови права, интегрирање на македонската заедница во рамки на Министерскиот совет за малцинства кај нашиот источен сосед итн.
Тоа не се дополнителни услови, туку тоа значи партнерство, тоа значи добрососедски односи помеѓу двете земји“.
Во делот на безбедноста, како што појасни, бил потенциран фактот за енергетската безбедност, развојот на гасните интерконектори.
„Овој што во моментот го градиме со нашиот јужен сосед со Грција и тој којшто планираме многу скоро да го отпочнеме да го градиме со нашиот северен сосед, а тоа е Србија. Потоа континуирано ги споменуваме коридорите 10 и 8, коишто се за нас како држава многу важни, но и за Европа се многу важни, посебно за јужното крило на НАТО, бидејќи ги поврзуваат Јонското и Јадранското море со Црното море, тоа е коридорот 8, и коридорот 10 коишто ги поврзува практично Медитеранот, овој дел на Медитеранот со Егејското море, со Централна Европа“.
Во делот на нелегалната миграција, нашиот став, како што подвлекува Мицкоски е апсолутно јасен.
„Ние практично ја браниме Европа од Европа, бидејќи кај нас мигрантите реално од земји членки на ЕУ нелегално влегуваат. Ја изнесов оваа идеја и пред премиерот Стармер, за време на билатералната средба, дека би биле добредојдени британски експерти, британска експертиза, па дури и полициски офицери, припадници на Армијата на Британија, да заедно со нашите припадници ја штитиме нашата јужно-источна граница од нелегалната миграција и на тој начин да ја штитиме и Европа, ја презентирав нашата отворена покана“.
Потсети и на процедурата на потпишување на меморандумот на разбирање со американско-британскиот конзорциум којшто, како што рече, ќе инвестира во фабрика за производство, а е дел од наменската индустрија.
„Околу 150 милиони долари и каде што неколку стотици би рекол, до илјада луѓе ќе се вработат, но тоа е само почеток, планот е да стигнеме до бројка од една милијарда.
Јас многупати кажувам дека мора да победуваме дома и тука немам никаква дилема, дека домашната задача е најважна, но мора да победуваме и во Лондон и во Брисел и во Париз и во Берлин и во Рим и во Вашингтон и во другите главни градови на земји-членки и на ЕУ, но и на влијателни држави во светот.
Ќе се бориме за да ги браниме националните интереси и интересите на Македонија, генерално и на граѓаните. Иднината на државата е во рамките на ЕУ, тоа е една од нашите последни стратешки цели.
Ние ќе сториме се што е во наша моќ да ја исполниме оваа стратешка цел, но истовремено да ги заштитиме македонските интереси.
Нормално дека пораката од нивна страна е дека местото на нашата земја е во рамките на ЕУ, како и генерално на целиот регион на Западен Балкан. Прилично инспиративна и конкретна дискусија имаше германскиот канцелар господинот Мерц, којшто јасно кажа како го гледа регионот, нормално тоа е затворен состанок и сега не би сакал јас да ги зборувам деталите, но многу јасна насока даде, како го гледа регионот и кои се плановите за иднината на регионот поврзани со интеграцијата во рамките на ЕУ“.
Мицкоски вели дека останува оптимист, но важно е според него да се испорача домашната задача.
„Тоа се реформите и тоа ќе го правиме во периодот којшто следува, очекувам прогрес и во делот на откочување на проблемот којшто го имаме во овој момент, но ајде да видиме, рековме наша цел е да го заштитиме нашето национално достоинство, нашиот идентитет и нашите национални интереси“.