Македонија
Гром предизвика пожар на четири куќи во Прилеп

Синоќа, од удар на гром изгореа 4 куќи на улицата Кузман Шапкарев во Прилеп. Пожарот се случил по полноќ кога гром удри во една од куќите и ја опожарил, па огнените пламени бргу се прошириле на соседните три куќи. И покрај навремената интервенција на ТППЕ Прилеп, куќите изгореле до темел, се вели во соопштението од Општина Прилеп.
Рано утрово градоначалникот на Прилеп, Борче Јовчески, ги посети семејствата и ја увиде состојбата на терен, при што веднаш беа ангажирани екипите од ЈКП „Комуналец“ и ЈКП „Водовод и канализација“ со своја механизација во расчистување на остатоците од опожарувањето.
Градоначалникот изрази жалење за настанатата трагедија и посочи дека оваа беше една страшна ноќ за Прилеп, предизвикана од природна непогода, притоа апелирајќи до општествено одговорните компании во Прилеп и Македонија да им помогнат на прилепските семејства во обновување на нивните домови.
„Рано утрово ги посетив семејствата и сочуствувам со нивната трагедија. Четири семејства останаа без покрив над главата кога за неполн час од удар на гром изгореа нивните семејни куќи. И покрај навремената интервенција на Противпожарната единица Прилеп, куќите изгореа до темел, материјалната штета е огромна, но, за среќа, нема повредни и човечки жртви!
Веднаш свикав итна средба со сите релевантни структури и претставници на институциите од градот со цел, секој од својот домен, да им излеземе во пресрет на овие семејства, кои за миг го изгубија сѐ она што го печалеле целиот свој живот.
На средбата првично одлучивме како локална самоуправа семејствата да ги ослободиме од комунални давачки додека се обновуваат нивните куќи, а Општината ќе помогне со максималната можна финансиска помош предвидена за вакви немили случки. Семејствата, кои не може да најдат сместување кај своите роднини или пријатели, ќе бидат привремено сместени во Домот за стари лица и ќе добиваат топол оброк од кујната на домот.
Но, во оваа пригода апелирам до сите општествено одговорни компании, како и до сите хумани луѓе, да им излезат во пресрет и да им помогнат на овие прилепски семејства, на овие наши сограѓани, да си ги обноват своите домови. Секоја помош е добредојдена!“, потенцира градоначалникот на Прилеп, Борче Јовчески.
Инаку, ТППЕ Прилеп интервенирала со 4 возила и 17 пожарникари, кои го гаснеле пожарот до три часот по полноќ. За среќа, нема повредени лица. Сопствениците на куќите изјавија дека огнот бргу се ширел и повикуваат на помош од сите хумани луѓе и компании.
Општина Прилеп набргу на својата веб-страница ќе ги објави и жиро-сметките на семјствата за донирање помош како можност што повеќе граѓани да помогнат во обновата на домовите на припепските семејства што настрадаа од удар на гром, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски – Кос: реформите поврзани со евроинтеграциите остануваат високо на домашната политичка агенда

Во рамки на дводневната работна посета на Брисел, министерот за надворешни работи и надворешна трговија, Тимчо Муцунски, денеска оствари средба со еврокомесарката за проширување на Европската Унија, Марта Кос.
Соговорниците ја нагласија силната поддршка за проширувањето на Унијата, и од страна на земјите членки и од страна на граѓаните на Северна Македонија – што го потврдуваат и наодите од последниот „Евробарометар“.
На средбата беше поздравен реформскиот пристап на Владата, особено исполнувањето на обврските од реформскиот процес и имплементацијата на Планот за раст. Муцунски нагласи дека реформите поврзани со евроинтеграциите остануваат високо на домашната политичка агенда, со силен фокус на владеењето на правото и борбата против корупцијата.
Изрази благодарност за личниот ангажман на еврокомесарката Кос во пристапниот процес, особено во контекст на нејзиното учество и поддршка на Самитот за Планот за раст, што неодамна се одржа во Скопје.
Соговорниците разменија мислења и за неодамнешното приклучување на државата кон СЕПА, како и за иницијативата за постепено укинување на роаминг трошоците помеѓу земјите од Западен Балкан и Европската Унија. Одлуката за оваа иницијатива се очекува на почетокот на 2026 година, како дел од бенефитите на постепената интеграција во Унијата.
На средбата се дискутираше и за актуелните регионални и глобални случувања, при што беше потврдена заедничката поддршка за Украина и заложбата за што побрзо постигнување на праведен и одржлив мир.
Македонија
Meџити: Мајка Тереза е една од најсветлите личности на човештвото

Првиот заменик-претседател на Владата и министер за животна средина и просторно планирање, Изет Меџити, заедно со делегации од Владата, Собранието и општините положи венец со свежо цвеќе на спомен-плочата во центарот на Скопје, посветена на албанската нобеловка Гонџе Бојаџиу – Мајка Тереза, по повод 115-годишнината од нејзиното раѓање.
По церемонијата, Меџити изјави дека на 115-годишнината од раѓањето на Мајка Тереза – Гонџе Бојаџиу, родена во Скопје, се сеќаваме на една од најсветлите фигури на човештвото – мисионерката на љубовта и добитничка на Нобеловата награда за мир.
„Таа нѐ научи дека величината не се мери со функции и моќ, туку со служење, посветеност и љубов кон другиот. Нејзината порака останува водилка за нашата политика и општество, да работиме за мир, правда и солидарност, без да заборавиме никого. Мајка Тереза ни остави света порака дека љубовта се мери преку делата што ги правиме“, изјави Меџити.
Тој вети дека се гради иднина во која Скопје повторно ќе биде препознаено во светски рамки како центар на висока култура, развиено образование, наука и технологија, со перспектива за младите и хуманизам.
Македонија
ДОМ: Самоуништување на природата, Дошница жртва на владината неодговорност

Зелената партија ДОМ остро реагира на одлуката на Министерството за животна средина да не ја стави реката Дошница под привремена заштита, иако врз нејзиниот слив се планира изградба на две мали хидроцентрали кои ќе ја доведат клисурата до еколошки колапс.
ДОМ ја оценува оваа институционална пасивност како политичка одлука за самоуништување на природните богатства и суров удар врз иднината на нашите граѓани и граѓанки.
„Министерството ги прикрива своите намери зад изговори дека „предлогот не е формално доставен“. Ова е безобразно игнорирање на алармот што дојде од експерти, биолози и невладини организации уште пред еден месец, кога побараа мораториум се’ додека не се заврши Студијата за валоризација на природните вредности. Сезонското пресушување на реката Дошница и најавеното дополнително исушување се директна последица од оваа неодговорност.
Веднаш да се воведе мораториум на сите активности поврзани со концесијата, да се затвори пристапот до локациите и да се прогласи привремена заштита на текот и околниот предел, во корист на идното заштитено подрачје „Демиркаписка клисура“. Без тоа, ендемичните видови, македонските риби и планинските инсекти се на пат кон неповратна деградација“.
Бараат итна изработка и усвојување на елаборат за мониторинг на биолошката разновидност и еколошкиот проток во Дошница, со јавни дебати и независни експерти.
Министерството, како што додаваат, да испрати јасна порака до концесионерот: без зелено светло за заштита, нема ни нови брани.
„Зелената партија ДОМ нема да молчи пред ова политичко насилство над природата. Ако не прекине оваа тенденциозна институционална воздржаност, ќе покренеме граѓански и правни активности за да ја спасиме Дошница од катастрофа. Природата не чека, ниту ние ќе го дозволиме нејзиното уништување.