Македонија
„Груба лага е дека Владата субвенционира одреден процент за струја на сметките на граѓаните“, вели Мицкоски

Тоа е уште една груба манипулација и навистина, јас сум шокиран од тоа што на сметките од компанијата што ги наплаќа од граѓаните средствата стои оваа груба невистина дека Владата субвенционира одреден процент, вели претседателот на ВМРО-ДПМНЕ, Христијан Мицкоски, одговарајќи на новинарско прашање.
Мицкоски потенцира дека не е точно оти сметките на граѓаните се субвенционираат и апелира да престанат да ги злоупотребуваат сметките за политички маркетинг на Владата.
„Јас апелирам до таа компанија да престане да ги злоупотребува своите сметки за политички маркетинг на Владата бидејќи тоа не е точно. Тоа е исто како да ги прашате граѓаните во Саудиска Арабија или во Обединетите Арапски Емирати или во некои држави каде што се произведува нафта зошто имаат најевтина нафта. Тоа некако така би му дошло“, рече тој и додаде:
„Поголема глупост немам слушнато бидејќи, граѓаните во Македонија, плаќајќи ги задолжувањата на Владата преку изградба на производните капацитети во Македонија, без разлика дали се тоа хидроцентрали или термоцентрали, практично се тие што си овозможиле овие производни капацитети да произведуваат електрична енергија, која во моментот според Евростат и според сите, морам да признам, дека во регионот е најголема“.
Претседателот Мицкоски истакна дека овој тип на лажно политиканство набргу ќе се ревидира укажувајќи дека идната влада предводена од ВМРО-ДПМНЕ има намера да се однесува чесно спрема своите граѓани.
„Така што овој тип на злоупотреба, набргу по формирањето на новата влада, ќе биде ревидиран и идната влада предводена од ВМРО-ДПМНЕ има намера да се однесува чесно спрема своите граѓани, а не со вакви лажни политиканства и флоскули“, заклучи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ве чекам во 20 часот, на плочникот кај Градски ѕид“, Герасимовски повика на концерт

Градоначалникот на Општина Центар, Горан Герасимовски, ги повика сите скопјани, вечерва да бидат дел од културната манифестација „Центарска симфонија“ што ќе се одржи на плочникот кај Градски ѕид (Клуб на новинари, зади Соборниот храм) со почеток во 20:00 часот.
Александар Тарабунов и камерниот оркестар вечерва ќе ги интерпретираат најпознатите мелодии од македонската и светската кинематографија, специјално аранжирани во ново, симфониско руво. Меѓу нив се и култните музики од „Исправи се Делфина“, „До Балчак“, како и новата песна на музичката ѕвезда Тарабунов „Заедно“, која за првпат ќе биде изведена со камерен оркестар.
„Оваа вечер ја посветуваме на музиката која нè обединува, Центар повторно станува сцена на културното доживување. Повелете сите, со пријателите, со семејствата, заедно да уживаме во спојот на класичното и модерното, на звуците што раскажуваат приказни. Музиката е најубавиот начин да се сплотиме, Ве поканувам на добра музика и убава летна саботна вечер. Ве чекам во 20 часот, на плочникот кај Градски ѕид“, вели Герасимовски.
Влезот е слободен за сите граѓани. Настанот е во организација на Општина Центар, во партнерство со МГ Мјузик продукција.
Македонија
Филипче на конгрес на СПД во Берлин: Средба со германскиот вицеканцелар Клингбајл

Претседателот на Социјалдемократскиот сојуз на Македонија, Венко Филипче, денеска, ќе присуствува на конгресот на германската Социјалдемократска партија (СПД), кој под слоганот „Промената започнува со нас“ се одржува во Берлин, Сојузна Република Германија, соопшти утрово СДСМ.
Во рамки на конгресот претседателот Филипче ќе има средба со актуелниот вицеканцелар на Германија и сојузен министер за финансии, Ларс Клингбајл кој воедно е и ко-претседател на СПД. Предвидени се и билатерални средби со европски политичари и функционери присутни на конгресот.
На конгресот, на кој, меѓу другото, ќе се избира и новото раководство на СПД, ќе присуствуваат истакнати актуелни германски политичари и функционери, како и претседатели на социјалдемократски партии од Европа.
Поканата за присуство на Филипче на овој конгрес од СДСМ ја сметаат за израз на заедничката заложба за европска иднина, социјална правда и регионална соработка, засновани на вредностите на социјалдемократијата – еднаквост, солидарност и демократија.
Македонија
УХМР: Денес температури до 36 степени и ветер кој на места ќе дува и со над 70 километри на час

Управата за хидрометеоролшки работи за денес прогнозира сончево време со мала до умерена локална облачност. Ќе дува умерен до засилен ветер од северен правец кој локално може да достигне и над 70 километри на час.
Максималната температура ќе биде во интервал од 27 до 36 степени.
Во Скопје, сончево со мала до умерена облачност и со умерен до засилен северен ветер. Максималната температура ќе достигне до 34 степени.