Македонија
Груби: Видете што постигнавме за 20 години, сè е и на албански јазик
 
																								
												
												
											Активностите за одбележување на 20-годишнината од Охридскиот договор продолжија денеска со организирана трибина од страна на Институтот за духовно и културно наследство на Албанците на тема „Скопје и новите албански адреси, рефлекција на Охридскиот договор“.
На трибина на која учествуваше и првиот вицепремиер, Артан Груби, главна тема беше именувањето на скопските улици со имиња на истакнати личности и важни настани од албанската национална историја.
Имено, околу 150 имиња на албански дејци се поставени како имиња на улици, плоштади и булевари во Скопје, а Груби во неговиот говор истакна дека тоа е големо достигнување како резултат на имплементацијата на Охридскиот договор.
„Патот на еднаквоста бара секојдневен третман и ангажман од секој од нас, во секоја институција каде што сме присутни, од претседателот, претседателот на Собранието, претседателот на Владата, Советникот на Град Скопје, директорот во институција, вклучително и административниот службеник ја има најголемата можна човечка одговорност за да ја гарантира еднаквоста и за да ја одржи таа еднаквост до денот на неговото пензионирање“, изјави вицепремиерот.
Груби ги извести присутните и за текот на преземените активности од страна на Владата за одбележувањето на 20-годишнината на Охридскиот договор, а се осврна и на неговото подлабоко значење.
„20 години не се далеку. Застанете само, направете ја разликата како сме биле пред 20 години и како сме денес. Во Влада зборуваме на албански, во Собрание зборуваме албански, влезете на веб-страницата на претседателот, сè е и на албански јазик. Дури и вчера на одбележувањето на Илинден ечеше албанска музика и албанско оро среде Крушево и немаше никакво двоумење од ниеден учесник околу достоинствената презентација и на албанската култура. Нема институција во ова земја која не зборува и албански. Нема ништо невозможно кое ние не можеме да го реализираме и ова е благодарение на сите оние кои ја имаа храброста од логорите до Собранието да ја променат политичката, правната реалност на оваа држава правејќи го Албанецот државнотворец и придонесувач во нашето општество“, кажа првиот вицепремиер и министер за политички систем и односи меѓу заедниците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
Бесплатна телефонска линија за пријавување на повреда на избирачкото право
 
														Во канцеларијата на Народниoт правобранител во недела (2 ноември) на денот на одржувањето на вториот круг од локалните избори во периодот од 7:00 до 19:00 часот ќе функционира беслатната телефонска линија: 0800-54321, на којашто граѓаните ќе можат да пријават каква било повреда на избирачкото право.
Отворени за граѓаните ( покрај главната канцеларија во Скопје) ќе бидат и подрачните канцелари на народниот правобранител во: Битола, Кичево, Куманово, Штип, Струмица во Тетово со цел да им се помогне во остварувањето и заштитата на нивните избирачки права.
Покрај на бесплатната линија, граѓаните ќе можат за заштита на своите права да се јават и на следниве телефонски броеви: Тетово: 044 344-082, Кичево: 045 228-586, Битола: 047 242-310 и Куманово: 031 431-488,Струмица 034 329 -996 и Штип 032 389-700.
„Народниот правобранител, правата на граѓаните ќе ги штити со преземање на итни мерки за ефективно постапување од странa на надлежните органи во изборниот процес и другите институции кои се должни да им обезбедат заштита на нивните загарантирани права“, се наведува во соопштението.
Народниот правобранител потенцира, дека, избирачкото право е уставно загарантирано како еднакво, општо и непосредно и се остварува на слободни избори со тајно гласање и дека никој не смее да биде повикан на одговорност заради остварување на ова право, поради што не случајно повредата на слободата на определувањето на избирачите како и други повреди на избирачкото право се казниви дела. Исто така, народниот правобранител апелира до сите чинители во изборниот процес да ги почитуваат здравствените протоколи утврдени за начинот на гласање.
Македонија
АВМУ: Сите медиуми од ноќеска на полноќ да ја прилагодат својата програма за изборниот молк
 
														Со денешниот ден завршува изборната кампања за вториот круг од Локалните избори 2025 година, односно од полноќ започнува изборниот молк кој трае до 19:00 часот на 2 ноември 2025 година. За време на молкот медиумите продолжуваат да известуваат за изборите и за текот на гласањето, но не смее да се емитува ниту еден од облиците на изборно медиумско претставување, извести АВМУ.
„При известувањето во деновите на изборниот молк ќе се смета дека медиумите го прекршиле изборниот молк доколку емитуваат, односно објават какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта“, соопшти АВМУ.
Агенцијата очекува сите медиуми, почнувајќи од ноќеска на полноќ, да ја прилагодат својата програма за изборниот молк.
Македонија
Мециновиќ: По првиот круг системот прокрваре – во вториот круг може да го добие конечниот удар, ако ние тоа го преточиме во одлука
 
														,,По првиот круг системот прокрваре. Во вториот круг може да го добие конечниот удар. Нормално, ако ние тоа го направиме, ако го преточиме во одлука. И сметам дека времето на одлуката е дојдено, затоа што мислам дека ни е на сите доста од вакви удбашки, бизнисменски, одвратни приказни кои ги живееме триесет и пет години. Системот е на нозе. Сега Скопје на нас е оставено”, порачува кандидатот за градоначалник од партијата Левица за Град Скопје, Амар Мециновиќ.
„Ова е класна борба. Класна борба кога имаш две спротивставени страни кои се потполно различни. Една која е наоружана со сите капацитети на државата и друга која сака да се ослободи од тие притисоци“, потенцира Мециновиќ.
Тој додава дека „во оваа кампања ги видовме сите можни лични напади, фабрикации, измислици, притисоци кои можевме да ги замислиме“.
„И зошто мислите дека за прв пат се случува вакво нешто во кампања? Тоа е затоа што за првпат после триесет и пет години им го оспоруваме статус-квото“, појаснува тој.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											