Македонија
Груби: И Ковачевски се согласи за премиер Албанец, како што беше договорено со Заев

Вицепремиерот Артан Груби изјави дека Северна Македонија ќе има премиер од албанска националност во согласност со коалицискиот договор во 2020 година од страна на ДУИ и СДСМ во кој се наведува дека во последните 100 дена од Владата премиер треба да биде Албанец.
Во интервју за „Дебат плус“ на косовска телевизија , Груби потсети дека зад договореното стојат првиот човек на ДУИ, Али Ахмети, и поранешниот премиер Зоран Заев.
„Во 2020 година смисливме модерна кампања, која одекна во Приштина и Тирана велејќи дека е дојдено време за првиот албански премиер и ова е проект на Али Ахмети за да ги урне табуата. Дојде време да се надминат предрасудите со изборот на албански премиер. Социјалдемократскиот сојуз освои 46 пратеници, ДУИ 15 пратеници, заедно направија 61“, рече тој.
Според коалицискиот договор што го постигнавме со Зоран Заев, вели Груби, во последните 100 дена тој ќе ја напушти Владата и ќе биде заменет со премиер Албанец. Ова го потпишавме, а излезе и Заев и рече дека првпат ќе имаме премиер Албанец, рече Груби.
Според него, договорот сè уште важи, а такво нешто му ветил и актуелниот премиер Димитар Ковачевски.
„Ковачевски на првата средба пред да биде избран вети дека ќе важи истиот договор што беше постигнат со Ахмети и се ракувавме. Тој рече дека во последните 100 дена, кој и да е, ќе ја напушти функцијата, ќе биде претседател на Собранието, а Албанец ќе биде премиер“, рече Груби.
Додаде дека Али Ахмети ќе го предложи премиерот Албанец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Премиерот уверува дека Владата е стабилна и силна

Владата е стабилна и силна, и ги исполнува очекувањата на граѓаните, и покрај бројните предизвици и општата економска катастрофа која беше наследена. Општ став е дека се вложуваат сите сили Македонија да се стави на брза трка за економски раст и развој, соопшти денеска владејачката ВМРО-ДПМНЕ по седницата на Централниот комитет на партијата.
Како што се наведува во соопштението по средбата, генералниот секретар Ѓорѓија Сајкоски го информирал претседателот и партијата дека општинските комитети се силно мотивирани и подготвени за избори, на кои се очекува огромна победа.
„Претседателот на ВМРО ДПМНЕ Христијан Мицкоски истакна дека Македонија ја очекуваат успеси и добри резултати кои се последица на реформите преземени во изминатиот период, и дека целта е економска стабилност и просперитет на сите граѓани“, се посочува во соопштението.
Мицкоски исто така информирал и дека во идниот период продолжуваат испитувањата и мерењата на јавното мислење за кандидатите на ВМРО-ДПМНЕ, кои покажуваат неколукратна предност пред политичките конкуренти, но и дека треба да се сполни одговорноста на преземените ветувања пред граѓаните.
Македонија
Детето што загина со мотор немало ниту возачка, ниту кацига, а возело со брзина над дозволената

Дежурен јавен обвинител од Основното јавно обвинителство Скопје извршил увид на местото на тешката сообраќајната несреќа во која загина 16-годишен возач на мотоцикл, која ноќеска се случила во близина на трговскиот центар „Чаирчанка”.
Како што соопшти државното Јавно обвинителство, според првичните сознанија по увидот, 16-годишникот управувал без возачка дозвола и заштитна кацига, како и со брзина поголема од дозволената.
-На критичната локација не успеал да избегне електричен тротинет со кој по коловозот управувал 14-годишник. Во сообраќајната несреќа, возачот на моторот се здобил со тешки телесни повреди од кои починал на лице место, додека малолетникот кој управувал со тротинетот е повреден и задржан на лекување, соопшти ЈОРСМ.
Со цел точно утврдување на причините за несреќата, јавниот обвинител издал повеќе наредби и насоки.
-Се обезбедуваат и се прегледуваат снимки од видеонадзорот на конкретната локација. Издадена е наредба за обдукција на телото на починатиот, а и кај малолетникот кој управувал со тротинетот ќе бидат извршени анализи за евентуално присуство на алкохол или други недозволени супстанции, наведува Обвинителството.
Министерството за внатрешни работи претходно информираше дека во СВР Скопје денеска во 02.28 часот било пријавено дека на ул.„Цветан Димов“ во скопски Чаир се случила сообраќајна несреќа помеѓу мотоцикл пиаџо беверли со скопски регистарски ознаки, управуван од 16-годишник од Скопје, и електричен тротинет управуван од 14-годишник од Скопје.
Од здобиените повреди на местото на несреќата починал 16-годишниот мотоциклист, а смрт констатирал лекар од Итна медицинска помош. Четиринаесетгодишник кој управувал електричен тротинет, пак, се здобил со телесни повреди констатирани во Ургентниот центар при Комплекс клиники „Мајка Тереза“.
Македонија
Пијани возеле автомобили, полицијата ги фати и ги приведе

Полициски службеници од полициската станица за безбедност на патниот сообраќај Куманово и полициски службеници од полициското одделение за безбедност на патниот сообраќај Кратово денеска ги лишиле од слобода А.М.(38) од Куманово, А.Р.(49) од село Ваксинце, општина Липково и З.Л.(60) од село Страцин, кратовско.
МВР соопшти дека при контрола на патниот сообраќај во Куманово, полициските службеници констатирале дека кај А.М., кој управувал патничко моторно возило цитроен, биле измерени 1,56 промили алкохол во крвта, а кај А.Р., кој управувал патничко моторно возило опел, биле измерени 1.55 промили алкохол. При контрола на патниот сообраќај во Кратово, З.Л. не застанал на знак за запирање и се обидел да побегне, но набргу бил запрен и полициските службеници кај него измериле 2,28 промили алкохол во крвта.
По целосно документирање на настаните, против лицата ќе бидат поднесени пријави по член 297-А од Кривичниот законик „безобѕирно управување со моторно возило”.