Министерството за политички систем и односи меѓу заедниците кое го предводи првиот вицепремиер Артан Груби од денеска функционира во нови простории и нов објект со вкупна површина од 5.302 квадратни метри, кој се наоѓа на улицата Филип Втори, во непосредна близина на Македонскиот народен театар (МНТ).

На свеченото отворање присуствуаа премиерот Зоран Заев, претседателот на ДУИ, Али Ахмети, претседателот на Собранието, Талат Џафери, првиот вицепремиер Артан Груби и вицепремиерот Љупчо Николовски.

Со десетици уметнички фотографии, кожена гарнитура, маса од масивно дрво, сето тоа во честерфилд стил се опремени новите простории во објектот од „Скопје 2014“ кој досега го користела Службата за општи и заеднички работи на Владата, а отсега ќе го користат вработените во Министерството за политички систем и односи меѓу заедниците.

Премиерот Заев во оваа пригода рече дека Владата донела одлука за купување на објектот за Министерството за политички систем на 30 декември минатата година и дека оваа одлука е донесена со цел да се обезбедат максимални услови за работа на ова министерство.

Во оваа зграда првично беше планирано да се смести Државната комисија за спречување на корупцијата, но Заев рече дека за Комисијата биле предвидени пари да се направи реконструкција на постојните простории, па објектот му е доделен во трајно користење на новото министерство кое го предводи Груби.

Тој, како прв вицепремиер и министер за политички систем истакна дека овој објект во вредност од 14 милиони евра ќе биде новиот дом на Министерството.

Според него, со обезбедувањето на овој објект за Министерството за политички систем, се обезбедило и успешно функционирање на политичкиот систем, како и реализација на стратешките приоритети што произлегуваат од Охридскиот рамковен договор и истовремено се обезбедила подобра координација и усогласување на работата на органите на државната управа за спроведување на овој договор.