Македонија
(Видео) СЈО ги осомничи Груевски и Ахмети за пропаднатиот попис од 2011 година

Специјалното јавно обвинителство отвори истрага за пропаднатиот попис од 2011 година. Со истрагата се опфатени тогашните коалициски партнери, претседателот на ВМРО-ДПМНЕ, Никола Груевски, и претседателот на ДУИ, Али Ахмети, кои според СЈО, ја злоупотребиле функцијата и му нанеле штета на буџетот од 175.123.909 денари. Причината за престанок на пописот, според СЈО, било тоа што со спроведениот попис ќе им се нанело огромна штета на угледот на лидерите на ДУИ и ВМРО-ДПМНЕ. Според обвинителката Фатимe Фетаи, Груевски и Ахмети се сомничат дека се договориле да го прекинат пописот во 2011 година за да се задржат на власт, а тоа да го прикажат во јавноста како неможност за реализација поради технички причини.
„Доказниот материјал упатува на сомневање дека во октомври во 2011 година осомничените ги искористиле своите овластувања и како одговорни лица, претседатели на политичките партии, ја злоупотребиле својата функција и го оштетиле буџетот. Постои основано сомнение дека како владејачка коалиција сакале да го сокријат фактот дека немаат политички капацитет да организираат реален попис, како и да ги сокријат неповолните факти за демографската и економската состојба, што резултирало со огромно иселување на работоспособното население. Помеѓу 10 и 11 октомври осомничените се договориле да го стопираат пописот на населението“, посочи Фетаи. Таа додаде дека двајцата тогашни лидери како причини за стопирање на пописот ги навеле проблемите од техничка природа и некадарност на институциите. Но, вистинската причина, спред СЈО, е што по започнувањето на постапката за попис на населението во земјава сфатиле дека пописот ќе им нанесе штета на тогаш владејачките ВМРО- ДПМНЕ и ДУИ, па водејќи се од лични интереси и задржување на моќта во општеството, ја прекинале постапката, со што е предизвикана штета од над 175 милиони денари.
„По договорот со образложение дека со отпочнување на примена на Законот се јавиле недоречености, Владата до Собранието предложила да престане да важи Законот за попис на населението, па посредно преку парламентарните групи на 15 октомври 2011 бил изгласан закон со кој престанува да важи операцијата на попис. Сепак, причината не било тоа што е наведено од Владата туку осомничените сфатиле дека со пописната операција ќе им се нанесе штета на владејачките ВМРО-ДПМНЕ и ДУИ, и самите како лидери водејќи се од лични интереси и задржување на моќта одлучиле дотогаш потрошените средства да ги ‘фрлат во вода“, истакна Фетаи.
Специјалната јавна обвинителка, Катица Јанева информираше дека лидерите на политичките партии ВМРО-ДПМНЕ и ДУИ, Никола Груевски и Али Ахмети, кои се осомничени во случајот „Попис“, досега не дошле на распит, но кога ќе треба, според законските прописи, ќе бидат повикани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.