Група граѓани со транспаренти и пеејќи патриотски песни ги пречекуваат лидерите на партиите кои денеска попладне во Клубот на пратеници во Скопје ќе седнат на заедничка маса за да се информираат околу последните предлози за решавање на спорот за името со Грција.

Иако средбата првично требаше да започне во 13 часот, штотоку во Клубот на пратеници почнаа да присгинуваат лидерите на партиите. Прв дојде лидерот на ДУИ, Али Ахмети, а по него пристигна и претседателот на Собранието, Талат Џафери.

Вицепремиерката и министерка за одбрана Радмила Шекеринска дојде придружувана од министерот за надворешни работи Никола Димитров, а зад нив влезе и премиерот Зоран Заев.  На средбата, како што беше најавено пристигна и претседателот Ѓорге Иванов, придружуван со членови од неговиот кабинет.

Во Клубот на пратеници присутен е и лидерот на опозициската ВМРО-ДПМНЕ, Христијан Мицкоски.

Премиерот Заев и министерот за надворешни работи, Никола Димитров денеска на заедничка средба ќе информираат за деталите од преговорите за името. „Ќе дозволите деталите и можноста за нешто прифатливо да ги соопштам прво на претседателот на државата, на лидерот на опозицијата, на лидерот на најголемата албанска партија, претседателот на Собранието… Тоа е редот, за да имаме шанса да изградиме национален консензус по вака важно прашање. Веднаш по состанокот ќе дадеме изјава и сето ќе го споделиме со јавноста“, порача вчера Заев од Струга.

Тој не откри повеќе детали за можниот предлог Република Илинденска Македонија. „Многу опции се разгледуваа, една од опциите може да биде крај на процесот, со комплетно решение кое никогаш повеќе нема да отвора вакви проблематики помеѓу две соседни држави како Република Македонија и Република Грција“, рече Заев.

Република Илинденска Македонија неофицијално е предлогот за кој вчера дискутирале двајцата премиери на средбата во Софија, но официјална потврда нема ниту од македонска ниту од грчка страна.