Македонија
Данев: ВМРО-ДПМНЕ ќе поднесе до Собранието информација за енормното загадување
Пратеникот Драган Данев од Пратеничката група на ВМРО-ДПМНЕ на прес-конференција читаше цитат од изјава на министерот Дамјан Манчевски, дадена од него како опозиционер:
„Прв и најважен чекор за намалувањето на загадувањето е смената на власта. Само нова и одговорна власт може да го намали загадувањето на воздухот. Само нова и одговорна власт може да го подобри квалитетот на живот на граѓаните“, рекол Манчевски кога бил во опозиција.
„Почитувани граѓани, нова власт добивме, но одговорна, сигурно НЕ! Пратеничката група на ВМРО-ДПМНЕ ќе поднесе до Собранието информација за енормното загадување на амбиентниот воздух во Република Македонија, поради алармантната сосотојба во која се наоѓаат државата и граѓаните.
Поради неспособноста, неработењето и негрижата на актуелната власт, предводена од СДСМ, Република Македонија е во центарот на светските медиуми, посочена како најзагадена земја во Европа и една од најзагадените во светот.
Ситуацијата за овие три години откако таканаречените „спасители“ од СДСМ се на власт е влошена и секоја година, секој ден имаме сè поголемо и поголемо загадување на воздухот како никогаш досега, што е потврдено од страна на голем број меѓународни организации и институции. Светската здравствена организација и Европската агенција за животна средина ја оценија состојбата во Македонија како крајно алармантна.
Загрижувачки се и информациите кои кружат во јавноста и во медиумите, дека одредени мерни станици низ државата се исклучени или не функционеираат, а со тоа и граѓаните не можат да се информираат за квалитетот на воздух и случајно или не власта не прави ништо за овие мерни станици да профункционираат.
Изјавите од власта дека не се пробиени границите на загаденост и дека доколку тие граници се пробијат, ќе мораат да спроведуваат мерки се неискрени бидејќи гледаме дека нивните мерки се само препораки до граѓаните да останат дома и да не излегуваат надвор.
Ова е крајно неодговорно и манипулативно!
Ние како пратеници во Собранието на Република Македонија избрани од граѓаните имаме обврска да алармираме за ваквата состојба и да го заштитиме здравјето на граѓаните. Токму затоа, поднесуваме Информација за енормното загадување на амбиентниот воздух во Република Македонија со цел за овој проблем да се дебатира и да се реагира, односно да се дефинираат итни мерки кои морат да се преземат за заштитата на здравјето на граѓаните, подобрување на воздухот со крајна цел конечно спречување на загадувањето на воздухот и на разобличивање на неспособноста на власта предводена од СДСМ“, рече Данев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Стојаноска: Време е да се обединиме сите околу тоа повеќе да не функционираме како до сега
„Во текот на вчерашниот ден направивме анализа од резултатите од првиот изборен ден на претседателските избори и истото покажува дека голем број на нашите сограѓани Албанци, Турци, Роми и Бошњаци го имаат дадено својот глас за нашиот претседателски кандидат Гордана Силјановска Давкова“, рече Дафина Стојаноска, носител на изборна единица 6.
„Во име на тоа, од срце им се заблагодарувам на сите мои сограѓани и ги повикувам истото да го направат да го направат и во вториот круг имено ВМРО-ДПМНЕ подава рака кон сите, време е, момент е да се обединиме сите околу тоа повеќе да не функционираме како до сега, туку да вложиме да инвестираме во вистинска слобода, вистинска благосостојба и вистински соживот особено за нас особено во шестата изборна единица. Време е заедно да се спротивставиме на криминалот и Македонија да ја направиме своја и горда“, изјави Дафина Стојаноска, носител на изборна единица 6.
Македонија
„Алкалоид“ добитник на „Патент на годината за 2023“ за иновативниот „Омепразол“ во течна форма
Иновативната формулација на „Алкалоид“ АД за лекот со додадена вредност „Омепразол“ во течна форма, готов за употреба, прва од ваков тип во светски рамки, е прогласена за „Патент на годината за 2023“ од Државниот завод за индустриска сопственост, во рамките на пригодното одбележување на Светскиот ден на интелектуалната сопственост – 26 април.
Меѓународната патентна пријава на „Алкалоид“ за „Oмепразол“ во течна форма беше поднесена на 17 април 2020 година, со опфат на голем број региони и земји, меѓу кои земјите од Европската Унија, САД, Канада, Кина, земјите од Евроазиската економска унија и други. Патентната пријава при Европскиот завод за патенти, чии ингеренции опфаќаат патентни активности во 39 земји во Европа, беше одобрена на 3 август минатата година и валидирана во триесетина земји, меѓу кои и Македонија.
Патентот на „Алкалоид“ АД ја заштитува течната фармацевтска дозна форма на „Омепразол“, која се базира на два посебни раствори содржани во двокоморско пакување, кое при отворањето автоматски ги меша двата раствора и така се добива готовиот течен омперазол за употреба. Овој препарат е наменет, пред сѐ, за третман на рефлуксен езофагитис и на гастроезофагеалната рефлуксна болест (ГЕРБ) кај малите деца кои не можат да голтаат таблети, како и кај возрасните пациенти кои имаат тешкотии со голтањето (пациети со дисфагија) и неможност за голтање (пациенти со поставени сонди за гастрично хранење и/или геријатриски пациенти).
Државниот завод за индустриска сопственост е основан на 1 декември 1993 година како самостоен орган на државната управа и е надлежен за вршење на работите во врска со стекнувањето и со заштитата на правата од индустриска сопственост кои опфаќаат патенти, индустриски дизајни, трговски марки и ознаки за потеклото на производите. Оваа институција триесетта година по ред традиционално организира активности во насока на афирмација на улогата на индустриската сопственост во поттикнувањето иновации и креативни творби.
ПР
Македонија
Први и шести мај неработни за сите граѓани на Македонија, трети мај за граѓаните од православна вероисповед
Министерството за труд и социјална политика, согласно со Законот за празниците на РМ („Службен весник на РМ“ бр.21/98 и 18/07) соопштува дека:
1 мај 2024 година (среда), Денот на трудот е неработен ден за сите граѓани на Република Северна Македонија.
03 мај 2024 година (петок), Велики Петок, петок пред Велигден, е неработен ден за граѓаните од православна вероисповед во Република Северна Македонија.
06 мај 2024 година (понеделник), Велигден, вториот ден на Велигден според православниот календар, е неработен ден за сите граѓани на Република Северна Македонија.
Министерството за труд и социјална политика на граѓаните им ги честита престојните празници.