Синоќа се одржа седница на Извршниот одбор на СДСМ, на која на дневен ред беше актуелната состојба во земјата по воената агресија врз Украина. Се разговараше за мерките за заштита на стандардот на граѓаните и економијата, за спречување ценовен шок и справување со последиците од глобалната енергетска криза.

Претседателот на СДСМ и премиер, Димитар Ковачевски, информира дека Владата внимателно ги следи состојбите дома и надвор и навреме презема соодветни мерки за да се зачува стандардот на граѓание и економијата.

„Граѓаните треба да бидат спокојни, како членка на НАТО нашата безбедност и сигурноста се гарантирани. Земјата има задоволителна количина прехранбени производи, нафтени деривати во стоковите резерви. Со преземените мерки на Владата не се очекува ценовен шок на основните прехранбени производи.

Во моментот нема потреба да се стават во функција стоковите резерви, институциите продолжуват со снабдување на државните резерви, а се разгледуваат и евентуалните потреби за дополнително зајакнување на динамиката на резерви. Централната банка изминатиот период информира дека девизниот курс на денарот е стабилен, а стабилна е состојбата и со девизните резерви.

Следејќи ја ситуацијата, Владата предводена од СДСМ веќе подготвува нови пакети за помош на граѓаните и економијата врз основа на анализи. Продолжува социјалниот дијалог, по покачувањето на миниминалната плата, се работи на методологија за ново покачување на пензиите, како и за дополнителна помош на пензионерите во услови на криза“, се вели во соопштението на СДСМ.

Во согласност со одлуката на членовите на Извршниот одбор, на оваа седница Дарко Каевски е избран за портпарол на СДСМ по изборот на Костадин Костадинов за градоначлник на Струмица.