Општина Кисела Вода соопшти дека ги проширува бесплатните логопедски, дефектолошки и психолошки услуги и за децата од Драчево и од околните населби Пинтија, Усје и Стаклара, како одговор на зголемениот интерес и реалните потреби на семејствата.

Денес, во Домот на културата во Драчево, каде што ќе бидат сместени новите простории на ГАСПАР Центарот, беше промовирано проширувањето на оваа услуга. Настанот се одржа во присуство на родители, деца, дефектолози, наставници од училиштата и градинките, како и стручни лица вклучени во процесот.

„Со оглед на тоа што веќе една и пол година, ГАСПАР Центарот успешно реализира вакви часови во Припор, а интересот и бројот на корисници постојано расте, Општина Кисела Вода одлучи да ја направи услугата подостапна и за овој дел на општината, уште еднаш потврдувајќи ја својата лидерска улога како прва општина во државата што овозможи ваков тип бесплатна поддршка за децата.

-Со ова, ја прошируваме услугата која веќе 1.5 година успешно се реализира во Припор, а од денес, таа станува подостапна и за овој дел на општината. Нашата цел е јасна- треба и мора да има навремена поддршка, полесен пристап и услуга поблиску до семејствата.

Општина Кисела Вода беше и останува првата општина во државата која воведе ваков тип бесплатни логопедски, дефектолошки и психолошки услуги за деца. Со денешното проширување, ја потврдуваме нашата лидерска улога и покажуваме континуитет во политиките кои се насочени кон реалните потреби на граѓаните. Сакам јасно да нагласам дека овие услуги се целосно бесплатни за децата од семејства во социјален ризик, како и за децата кои имаат наод и проценка од стручна комисија (МКФ). Дополнително, обезбедена е и бесплатна психолошка поддршка за овие семејства, затоа што поддршката мора да биде сеопфатна и долгорочна.

Особено важен сегмент од оваа соработка е и тоа што, согласно договореното, ГАСПАР врши обуки за вработените во градинките и училиштата во општината, со цел унапредување на нивните знаења и вештини за работа со деца кои имаат ваков тип потешкотии. Тоа значи подобар систем, поголем квалитет и сигурност за родителите- истакна градоначалничката Бети Стаменкоска Трајкоска.

Премиерот Христијан Мицкоски одговарајќи на пратеничко прашање во врска со извештајот на Европската комисија за напредокот на државата и во однос на преземените чекори кон евроинтеграциите, ги потенцираше специфичните условувања кон Македонија, билатерализацијата на патот кон членство во Унијата, се наврати на однесувањето на минатите влади и неколкупати прифатените условувања вон Копенхашките критериуми, но и посочи на конкретни преземени мерки во овој период наведени во извештајот на ЕК. Притоа напомена дека ваквиот однос и оценување од страна на ЕК во извештајот не треба да биде причина за евроскептицизам, ниту пак да биде модел за исполнување на сè што е ставено на маса, а притоа да се нема гаранции дека друго, освен зацртаните критериуми нема да го попречат патот.

„Не треба да имаме дилема ниеден во Собранието дека иднината на Македонија е во рамките на ЕУ. Се разбира дека пристапот до реализирање на таа цел е поинаков. Претходната влада имаше пристап дека со тоа што ќе потпишуваат и прифаќаат сè што ќе им е ставено на маса ќе им бидат простени криминалот и корупцијата и сето она што беше заштитен знак за нивната влада и дека ако стават потпис на секој од документите на маса, некој од таму на магичен начин ќе ги остави на власт и ќе продолжат сложно да ги крадат граѓаните и државата.

Заедничка цел на сите нас е да бидеме дел од ЕУ. За тоа треба да ги завршиме преговорите, но пред да ги завршиме треба да ги започнеме. Многу пати до сега високи функционери на претходната влада, почнувајќи од претходните премиери, ни ја кажуваа невистината, дека сме ги почнале преговорите, дека преговараме, дека имаат добра вест, проследени со објавувани селфи-фотографии од авиончиња, од бротчиња, од понекоја јахта од Егејското Море итн. како еве патуваме кон Европа, возот е незапирлив само што не сме стигнале, а во суштина се наоѓаме на истото место каде што бевме за жал пред 25 години. На самиот почеток. И ние сме единствениот случај, во којшто не можеме да напредуваме, затоа што имаме активна блокада, активно вето, поради билатерални прашања. Прво тоа беше спорот со нашиот јужен сосед, спорот за името на државата, па на начин на којшто сите бевме сведоци се случи таа промена. А сега е повторно нова измена на Уставот, којашто претходната Влада го суспендираше Парламентот и прифати нешто коешто не успеа да го испорача. И сега е дел од заклучоците на Европскиот совет дека ние треба тоа да го направиме, без притоа да имаме јасна гаранција и предвидливост дека и тоа да се направи, дека ние ако ги завршиме преговорите и сето тоа што треба да го завршиме, бидеме дел од ЕУ, и дека нема да има дополнителни блокади поради билатерални прашања. Влегоа во таа авантура, реков кој беше мотивот на претходната Влада“, посочи Мицкоски.

Тоа, како што додаде, не е начин на размислување на оваа влада.

„Сè ќе сториме во наша моќ за да стигнеме и да ја реализираме таа стратешка цел, но мора тоа да биде без двојни стандарди, да биде согласно Копенхашките критериуми и мора да имаме двонасочна улица. Не може улицата да биде еднонасочна, бидејќи за името на европската цел и за името на европските интеграции граѓаните на Македонија направија многу отстапки во минатото, ако тргнеме од промената на банкнотите, преку промената на знамето, потоа промената на името, Уставот неколку пати“, дециден е Мицкоски.

Претседателката Гордана Сиљановска-Давкова ќе престојува во работна посета на Црна Гора, по повод учеството на Балканскиот форум за интеграција 2025 којшто ќе се одржи во Подгорица во организација на Европското движење во Црна Гора и Министерството за надворешни работи и меѓународна соработка на Италија.

Сиљановска-Давкова ќе се обрати на сесијата насловена „Претседателите за ЕУ интеграциите – Имаме ли план?“ и ќе оствари билатерална средба со претседателот на Црна Гора, Јаков Милатовиќ.

Во фокусот на Балканскиот форум за интеграција се геополитичките предизвици во светот, ЕУ и регионот на Западен Балкан, како и клучните области во евроинтегративниот процес: основните човекови слободи и права, владеењето на правото, доброто управување, безбедноста, борбата против корупцијата и организираниот криминал.

Покрај државни функционери од регионот, на Форумот ќе учествуваат истакнати експерти за европски интеграции и претставници од бизнис-секторот.