Македонија
Да зборуваме за Б-витамините

Истоштеност, расеаност и едноставно да се функционира во некое расположение како „преживување“ за да може да се заврши уште една работна задача. Телото често дава сигнали дека нешто недостига, дека нешто е нарушено, но брзото темпо на живеење кое повторно ни го освои секојдневието, едноставно е добар изговор да не послушаме. Состојби на постоење кои на пример матичниот доктор не би ги игнорирал. И кога преморени и расеани ќе посетите доктор, тој се грижи и претпочита да го освежи пациентот со една болна инекција од неколку Б витамини, како на пример Ниацин (Б3), Пантотенска киселина (Б5), витамин Б1 (Тиамин), Битамин Б6 (Пиридоксин) и витамин Б12 (кобаламин). Овие комбинации се достапни и во аптеките и суплементите може да се набават без рецепт.
Добро избалансираната исхрана е еден од начините како да ги внесете овие витамини, бидејќи телото, иако му се неопходни, само не ги произведува. Но, при подолгото готвење на храната, брзата храна или консумацијата на алкохол се намалуваат и можностите телото да ги добие витамините кои се многу важни за метаболичките процеси. А, спојот на овие витамини, кои може да се внесат и во форма на таблетки, обезбедува поддршка на нервниот систем, но и на имунитетот, како и на општата енергетска состојба на телото.
Докторите ги препорачуваат кога пациентот се жали на слабост, главоболки или вртоглавици, а и кога имунитетот е нарушен. Всушност, подолготраен или постојан недостаток на Б комплекс може да доведе и до анемија, мускулна слабост, интестинални проблеми, оштетување на нервите, нарушување на видот и други состојби.
Оваа група на витамини се растворливи во вода и затоа откако ќе земат учество во различни метаболички процеси, вишокот витамини од телото се исфрла со течностите.
Комплексот Б витамини на Галеника, што на пазарот е присутен од 1955 година, е оптимална комбинација зад која стојат 68 години искуство, доверба и пред сẻ, докажан квалитет.
Секој од Б витамините кои се вклучени во комплексот имаат различна улога во телото.
Б1 или тиамин е есенцијален микронутриент што не се создава во телото, и како и останатите Б витамини му помага на телото да создаде енергија, а влијае и врз работата на нервниот систем, срцето и другите мускули.
Б2 или рибофлавин исто така помага во разградувањето на протеините, мастите и јаглехидратите и игра витална улога во снабдувањето на телото со енергија. Рибофлавин делува како антиоксиданс во телото.
Б3 или ниацин е добар за нервниот систем, циркулацијата на крвта и го намалува нивото на лош холестерол. Исто така помага и во одржувањето на здрава кожа.
Б5 или пантотенска киселина е значаен за одржување на здрава кожа, влијае врз работата на нервниот систем и помага при стрес.
Б6 или пиридоксин помага при разградувањето на протеините и го одржува здравјето на нервниот систем.
Б12 или кобаламин влијае на апетитот и помага во превенцијата од анемија.
Сите Б витамини имаат единствена улога, но најчесто работат заедно, а честопати го занемаруваме нивното значење за правилен развој и процеси во телото.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родители и блиски на жртвите во Кочани бараат Обвинителството да објасни кој е обвинет, а кој ослободен

Родителите, роднините, пријателите на загинатите деца, како и нивните поддржувачи, излегоа на уште еден марш во Кочани, барајќи правда за 62-та жртви кои загинаа во трагичниот пожар во дискотеката „Пулс“. Тие упатија јавен апел до Јавното обвинителство – конечно и директно да ги информира за тоа кои лица се обвинети, а за кои е запрена постапката.
„Ние не сме правници, соопштението ни е дадено по членови и закони… и реално ништо не сфативме. Претпоставувам и другите родители, освен градоначалниците и обезбедувачите, не сфатиле“, рече Марија Петрушева, мајката на загинатиот Андреј Панов.
Таа истакна дека во понеделник официјално ќе испратат барање до Обвинителството, со кое ќе побараат лична средба со надлежните обвинители.
„Чувствуваме морална и човечка должност да се обратиме. Сметаме дека е од суштинско значење Обвинителството конечно и целосно да нѐ запознае со исходот од истражната постапка и со содржината на поднесениот обвинителен акт, кои лица се опфатени, а кои се изземени од одговорност, за да ги отстраниме сите дилеми кои се јавуваат кај нас. Неприфатливо е за нас да добиеме информации преку медиуми. Очекуваме транспарентност и директна комуникација“, порача Петрушева.
Таа изрази загриженост што, и покрај укажувањата, одредени лица сè уште не биле повикани ни на распит.
„Нашата болка е тешка, но борбата е праведна. Бараме одговорност и вистина“, додаде таа.
Со остар тон се обрати и Васка Стојанова, мајката на загинатиот Томче, која директно го обвини газдата на „Пулс“, познат како Деко, дека во моментот на пожарот се скрил, оставајќи ги младите да се борат за живот.
„Јас не знам зошто партиите преку медиумите кажуваат кој што и колку дал. Господ рекол кога левата рака дава, десната не треба да знае. И обратно. На нашите деца никој и ништо не им помогна, само помогнаа со тоа што им ја затворија вратата и што многу повеќе уништија. Да била вратата отворена, немало толку да бидат уништени и ќе се спасија. А не како оној монструмот Деко што се криел долу во скривницата, за да се спаси, а нашите деца ги оставил на милост и немилост“, изјави Стојанова со солзи во очите.
Присутните граѓани порачаа дека нема да престанат со протестите додека не добијат јасни и транспарентни одговори од институциите. Бараат правда, но и човечка емпатија – не правни термини и соопштенија кои, како што велат, никој од нив не ги разбира.
Македонија
Шведски експерти и преживеани од трагедија ќе понудат поддршка во Кочани

Од 16 до 18 јуни, во Кочани ќе престојува седумчлена делегација од Гетеборг, Шведска, составена од социјални работници, пожарникари и лица кои преживеале трагедија слична на онаа што неодамна го потресе овој град. Посетата е во организација на групата „Support Kocani“, која информира дека целта на настанот е споделување на искуства, поддршка и заедничко градење на сила и надеж.
Шведската делегација доаѓа како симбол на солидарност, откако пред 27 години, во нивниот роден град Гетеборг, избувна пожар во дискотека при што загинаа 63 лица – трагедија што длабоко го промени шведското општество.
„Ова не е само делегација, туку група луѓе кои лично ја почувствувале болката што ја носи ваква трагедија. Тие ќе споделат како низ годините се соочувале со последиците, како изградиле психолошка издржливост и како повторно нашле надеж“, велат од „Support Kocani“.
Тие додадоа дека посетата има силна симболика и за Кочани – како потсетник дека заедницата не е сама и дека солидарноста не познава граници.
„Ги пречекуваме со отворени срца. Тие се сведоци на болка, но и симболи на сила. Заедно ќе споделиме искуства, ќе создадеме мостови на поддршка и ќе покажеме дека од болката може да се роди нова енергија за живот“, велат „Support Kocani“.
Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.