Македонија
Движењето Беса: Речиси еден месец целата политичка сцена е во хаос а власта се држи на стаклени нозе

Сведоци сме дека во овој период секој неуспех, корупција, несреќа и друга девијантна акција во нашето општество, актуелната власт се обидуваше да го прикрие наводно со добивање на датум за почеток на преговорите со ЕУ. Движењето Беса, преку своите конзистентни политики во овој период молчеше, не затоа што немавме за што да зборуваме, туку бевме убедени дека нема да има датум за преговори, им дозволивме на владините експоненти со помош на некои политичари да го претстават нивниот филм дека Северна Македонија ќе добие датум за почеток на преговори со ЕУ, велат од таму.
Според движењето Беса, недобивањето датум од страна на ЕУ уште еднаш докажува дека оваа власт е делегитимирана и дека политичкото дејствување на движењето Беса да не седи во власт со партии и експоненти кои криминалот и корупцијата сакат да ги покријаат со евроинтеграциите, заробувањето на државата и тенденциите за претворање во хибриден режим се доволен доказ, како што потенцираат, дека што побрзо земјата треба да оди на предвремени избори и легитимитетот да се врати кај народот и оттаму да изникне новиот политички легитимитет на избраното мнозинство од страна на граѓаните со што ќе го свртат евроинтегративниот курс на земјата, не само во декларативна форма, туку и на дело и со конкретни чекори.
„Убедени сме дека покрај ветото од страна на Бугарија, неодамнешните настани во државното собрание, формата на притисок врз пратениците и сите оние кои не мислат исто како владата се дополнителна причина ЕУ да ја изгуби вербата дека оваа влада може да биде достоен партнер за преговори. За жал, како што за време на режимот Груевски-ДУИ граѓаните беа поделени на патриоти и предавници, така и денес оваа власт се обидува да ги подели на про-еу и анти-еу, што и во тој режим, па и во овој режим служи само за покривање на криминалот, корупцијата, неуспехот и неспособноста на власта“, велат од Беса.
Движењето Беса уште еднаш ги потврдува политичките ставови, како што велат од таму дека Северна Македонија има итна потреба од реконфигурирање на политичката сцена со тоа што ќе се дозволи доаѓање на политички сили кои ќе бидат подготвени да работат во овие димензии: политичките пазарења да ги заменат со долгорочни политички стратегии, бескомпромисна борба против криминалот и корупцијата, како и целосно обелоденување на неодамнешните случаи кои се идентификувани како несреќи, економско закрепнување со отстранување на бариерите за странските инвеститори кои бегаат од Северна Македонија бидејќи некој бара финанциски придобивки, надворешна политика заснована на целосно партнерство и постојан дијалог со сите страни кои сакаат да помогнат во интеграцијата на земјата во ЕУ.
Од Беса повторуваат дека единствената опција на Северна Македонија е интеграција во ЕУ. Таква интеграција, велат, може да се направи само со нова влада, со целосен легитимитет од народот, посветена на длабоки реформи и со врвен приоритет во борбата против криминалот и корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и потопло со мала до умерена облачност

Времето денеска ќе биде сончево и потопло со мала до умерена облачност. Ќе дува слаб до умерен ветер претежно од југозападен правец.
Минималната температура ќе биде во интервал од 6 до 17, а максималната ќе достигне од 28 до 35 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 13, а максималната ќе достигне до 33 степени.
Времето во наредните денови
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец. Во сабота попладне и во текот на ноќта кон недела ќе биде нестабилно со локален пороен дожд и грмежи. Ќе дува умерен до засилен југозападен ветер, а во недела ветерот ќе го смени правецот во северен. Потоа следува период на стабилно и потопло време.
Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.
Македонија
Од утре се нормализира сообраќајот на регионалниот пат Нова Брезница – Македонски Брод преку националниот парк Јасен

Утре од 05.00 часот регионалниот пат Р 1106 Нова Брезница – Македонски Брод преку националниот парк Јасен ќе биде пуштен за сообраќај во термините од Министерство за внатрешни работи, извести АМСМ.