Македонија
Движењето ЗНАМ ги објави носителите на листите за пратеници

Политичката патија Движењето ЗНАМ – За наша Македонија на денешната прес конференција информира дека вчера со акламација на седницата на Извршниот, а потоа и на седницата на Централниот одбор, утврдени се носителите на листите во сите шест изборни единици за претстојните парламентарни избори.
Како што рече портпаролот на движењето, Никола Мемов, за носители на листите се кандидирани луѓе, кои се нови во политиката, стручни во областите во кои работат, чесни, луѓе со карактер и вистински вредности, но и луѓе што веќе имаат политичко искуство, со чист образ.
За носители на листите се утврдени следните кандидати:
– За носител на листата во ИЕ 6, Небојша Захариевски, претседател на ОО Движењето ЗНАМ – За наша Македонија – Тетово.
– За носител на листата во ИЕ 5, Весна Бендевска, поранешна пратеничка во Собранието на Република Македонија, поранешна претседателка и член на Комисијата за спречување и заштита од дискриминација и потпретседателка на Движењето ЗНАМ – За наша Македонија.
– За носител на листата во ИЕ 4, Миле Цеков, претседател на Стопанската комора на југоисточна Македонија и претседател на ОО на Движењето ЗНАМ За наша Македонија – Струмица.
– За носител на листата во ИЕ 3, Павле Арсоски, генерал-мајор во пензија и потпретседател на Движењето ЗНАМ – За наша Македонија.
– За носител на листата во ИЕ2, Даниел Стојчевски, директор на ЈП „Чистота и зеленило“ – Куманово и претседател за ОО на Движењето ЗНАМ – За наша Македонија – Куманово, и
– За носител на листата во ИЕ 1, Бобан Карапејовски, професор на катедрата за македонски јазик при Филолошкиот факултет „Блаже Конески“ во Скопје и член на ИО на Движењето ЗНАМ – За наша Македонија.
Портпаролот Мемов истовремено информира дека в недела, во Скопје, Движењето ЗНАМ – За наша Македонија ќе одржи конвенција, на која ќе ги претстави носителите на листите за следните парламентарни избори во сите шест изборни единици.
На конвенцијта, како што рече Мемов, ќе се обрати и кандидатот за претседател на Македонија, Максим Димитиревски.
Тој додаде дека конвенцијата е од отворен карактер и упати покана до сите граѓани што имаат интерес да присуствуваат на настанот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ за одлуката за плаќање ДДВ за пратки под 22 евра од странство: До евтините пратки ли и дојде на власта?

Власта донела одлука од 1 ноември, граѓаните да мора да плаќаат ДДВ и за најмалите порачки од странство и тоа за пратки под 22 евра. Па до евтините пратки кои луѓето ги нарачуваат и ги плаќаат скромно ли и дојде на власта?, прашуваат од СДСМ.
„Наместо да ги заштитат интересите на обичниот човек, на младите и семејствата кои преку интернет нарачуваат евтино, Мицкоски и неговата влада избраа да им го олеснат џебот дополнително. Мора ли оваа власт да го дере народот, кај ќе стигне за се и сешто? Зошто се удира по џебот на граѓаните и се ускратува можностада купуваат поевтино онлај? Или Мицкоски до толку е седнат во скутот на олигарсите па удира по народот за да им обезбеди профити по секоја цена?“, прашуваат од СДСМ.
Според партијата, уште еднаш се потврдува дека за Мицкоски и ДПМНЕ профитот на неколкумина моќници и олигарси е поважен од стандардот на народот.
„Ова е уште еден удар врз граѓаните во време кога цените растат, платите мируваат, а економијата е во пад. Владата на ВМРО-ДПМНЕ и Мицкоски ја претвора Македонија во земја каде што богатите стануваат побогати, а обичниот човек плаќа за нивниот луксуз додека не може да врзе крај со крај“, велат од СДСМ.
Македонија
Управниот суд ја отфрли тужбата на Левица против АВМУ

Управниот Суд, на седницата одржана на 6 октомври, донесе Решение со кое ја отфрли тужбата на политичката партија Левица за поништување на Упатството за радиодифузерите за локалните избори 2025 година, донесено од Агенцијата за аудио и аудиовизуелни медиумски услуги, соошшти АВМУ.
„Во образложението на Решението на Управниот суд, меѓу другото е наведено дека Агенцијата „во согласност со своите надлежности како јавен орган донела Упатство со кое го пропишува начинот на постапување во извршувањето на одделни одредби од Изборниот законик“. Имено, со донесеното Упатство се појаснува начинот на примена на одредбите од Изборниот законик за распределба на времето за платено политичко рекламирање, распределба на времето во вестите кај Јавниот радиодифузен сервис, бесплатното политичко претставување на Собранискиот канал и за обезбедување пристапност на содржините за изборниот процес“, се наведува во соопштението.
Со ова, велат од АВМУ, како и со претходно донесеното Решение на Основниот граѓански суд – со кое како неоснован се одбива предлогот на политичката партија Левица за издавање привремена мерка за забрана на доставување на Упатството до комерцијалните медиуми, како и за доставување на извештајот за емитуваното платено политичко рекламирање до ДИК, само уште еднаш се потврдува дека Агенцијата постапува согласно законските прописи и професионално ги спроведува законските решенија.
Македонија
Обвинение за омраза кон директорот на Фондот на Холокаустот на Евреите во Македонија: Извикувал нацистички поздрави и пцуел на германски јазик

Основното јавно обвинителство Скопје поднесе обвинение против едно лице за кривично дело предизвикување омраза, раздор или нетрпеливост врз основа на национална, расна, верска и друга дискриминаторска основа.
Во спроведената претходна постапка, јавниот обвинител обезбеди докази со кои се потврдува основаноста на сомненијата дека обвинетиот го извршил делото кон припадник на еврејската заедница – директор на Фондот на Холокаустот на Евреите во Македонија.
На 26.12.2024 година, пред просториите на Фондот на улицата „11-ти Март“ во Скопје, додека оштетениот ги извршувал своите работни задачи, пред влезот поминал обвинетиот кој бил агресивен. Тој со гнев и омраза го свртел погледот кон оштетениот и започнал да гестикулира и да извикува нацистички поздрави, да пцуе и да упатува навредливи зборови на германски јазик.
Потоа се обидел да замине, но оштетениот веднаш пристапил кон полициското возило во близина и го пријавил. Кога полициските службеници му пристапиле на обвинетиот 59-годишник за да го легитимираат, тој продолжил да се заканува, па оштетениот почувствувал загрозување, несигурност и страв и се повлекол во просториите на музејот.