На тема „Членство во ЕУ, предностите и предизвиците што ги донесе за Шведска“, денес Друштвото за македонско- шведското пријателство организира дискусија во шведската резиденција. Амбасадорот на Шведска во Македонија, Мат Стафансон, пред членовите на Друштвото ги сподели шведските искуства од членството во ЕУ.

„Кога ние, конечно, одлучивме да влеземе во ЕУ, значително доцна, мора да кажам, ЕУ е повеќе од 60 години стара, кога конечно одлучивме да аплицираме за членство во ЕУ, Швеѓаните беа скептични за влез во Унијата. На референдумот што го имавме, само 52 отсто од гласовите беа ‘за’. Но, од тогаш, во овие 25 години, Швеѓаните станаа едни од најголемите евроентузијасти, членови на ЕУ со голема поддршка на членството“, рече амбасадорот Стафансон.
Тој порача дека Шведска ја чека Македонија во ЕУ и нагласи дека и покај многубројните лажни вести во медиумите, посебно за договорот со Грција, в недела граѓаните ќе донесат вистинска одлука. Стафансон смета дека бојкот на референдумот не е опција за оние што навистина се грижат за земјата.
Претседателот на Друштвото за македонско-шведското пријателство, Тихомир Илиевски, како поранешен амбасадор на Македонија во Шведска и во Романија, зборуваше за сопствените искуства во овие земји на нивниот пат до членство во ЕУ.

„Искуствата се толку видливо позитивни што јас не можам да ги скријам затоа што лично сведочев или бев сведок на промените што се случуваат во сите земји кога стапуваат во овој сојуз, а ова можам да го потврдам и со моето амбасадорско искуство кога Романија во 2005 година стана членка на ЕУ заедно со Бугарија и со некои други земји и, се разбира, од тој момент, па сè до мојот престој таму, можев да забележам какви промени се случуваат, од животот на социјално ниво, па до економијата и до некои други вредности и предности и подигање на стандардите и критериумите, кои се многу битни за граѓаните што живеат во тие држави и што членуваат во сојузот на европските држави“, рече претседателот Илиевски.

Дека инвестициите и гарантираната безбедност во сите сфери се најголемите бенефити од членството во ЕУ, на членовите на македонско-шведското друштво им објасни Драган Тилев, државен советник за европски политики и координација во Секретаријатот за европски прашања.